འདི་ག་ཚགས་པར་ཁང་དུ་གནས་ཚུལ་འབྱོར་གསལ།ཟླ9པའི་ཚེས23དང་ཚེས24ཉིན། གྲོང་ཁྱེར་སྲིད་གྲོས་སྐབས་གསུམ་པའི་ཚོགས་འདུ་ཐེངས་དང་པོར་ཞུགས་མཁན་སྲིད་གྲོས་ཨུ་ཡོན་དང་གྲོང་ཁྱེར་མི་དམངས་འཐུས་ཚོགས་སྐབས་གསུམ་པའི་ཚོགས་འདུ་ཐེངས་དང་པོར་ཞུགས་མཁན་གྱི་མི་དམངས་འཐུས་ཚོགས་ཀྱི་འཐུས་མི་རྣམས་རིམ་བཞིན་བཅའ་སྡོད་བྱ་ཡུལ་དུ་ཕེབས་ནས་འབྱོར་ཐོ་བཀོད་པ་དང་། ཆབ་མདོའི“ཚོགས་འདུ་གཉིས”ཀྱི་དུས་ཚོད་དངོས་སུ་འཁེལ་བ་རེད།

ཚེས་23ཉིན། གྲོང་ཁྱེར་སྲིད་གྲོས་སྐབས་གསུམ་པའི་ཚོགས་འདུ་ཐེངས་དང་པོའི་འབྱོར་ཐོ་བཀོད་ཡུལ་དུ་བབ་བརླིང་གོ་རིམ་ལྡན་པ་དང་། ཞབས་འདེགས་ཞིབ་ཚགས་བསྒྲུབས་ཤིང་། ཨུ་ཡོན་ཚོས་ཐོབ་ཐང་ལ་ཞིབ་བཤེར་དང་།འབྱོར་ཐོ་བཀོད་པ།ལག་ཁྱེར་དང་དཔྱད་ཡིག་ལེན་པ།གྲོས་གཞིར་ནན་ཏན་གྱིས་བལྟས་པ་དང་། ཕན་ཚུན་གྲོས་གཞི་འདོན་པ་བཅས་བྱས་ཏེ། ཚོགས་ཆེན་གྱི་འགན་འཁྲི་སྒྲུབ་པར་གྲ་སྒྲིག་གང་ལེགས་བྱས་ཡོད་པ་རེད།

གྲོང་ཁྱེར་སྲིད་གྲོས་ཀྱི་ཨུ་ཡོན་ནམ་མཁའ་ཚེ་དབང་གིས་ཆབ་མདོ་གྲོང་ཁྱེར་སྲིད་གྲོས་སྐབས་གསུམ་པའི་ཨུ་ཡོན་ལ་འདེམས་ཐོན་བྱུང་བར་ཧ་ཅང་དགའ་པོ་བྱུང་སོང་། འདི་ནི་གཟི་བརྗིད་ལྡན་པའི་མཚན་སྙན་དང་འགན་འཁྲི་ཞིག་ཀྱང་རེད།“ཚོགས་འདུ་གཉིས”འཚོག་ཉེར་ཡོད་པས་ངས་གཞི་རིམ་གྱི་གྲོས་གཞི་ཁག་གཉིས་འདོན་རྒྱུ་ཡིན། གཅིག་ནི་ཆབ་མདོའི་རང་ཡུལ་གྱི་མངོན་མིན་རིག་གནས་ཤུལ་བཞག་ཐོན་ལས་སྤུས་ཚད་མཐོ་པོའི་ངང་འཕེལ་རྒྱས་གཏོང་བར་སྲུང་སྐྱོང་བྱ་རྒྱུའི་སྐོར་གྱི་གྲོས་གཞི་དང་། གཉིས་ནི་གྲོང་གསེབ་དར་རྒྱས་ཀྱི་ཆེད་བསྐོས་ལས་བྱེད་པ་སྲིད་ཇུས་གཞིར་བཟུང་ཕུལ་བྱུང་དམངས་སྲིད་ཆེད་བསྐོས་ལས་བྱེད་པར་དམིགས་བཙུགས་རྒྱུགས་སྤྲོད་བསྡུ་ལེན་གྱིས་བྱ་གཞག་སྒྲིག་ཁོངས་ལམ་སྲོལ་འཛུགས་རྒྱུའི་སྐོར་གྱི་གྲོས་གཞི་དེ་ཡིན།ད་རེས་ཚོགས་འདུ་གཉིས་ཀྱི་ཐོག་གཞི་རིམ་གྱི་འདོད་ཚུལ་ཉན་པ་དང་། ཚོགས་འདུ་འཚོགས་རིང་ཆབ་མདོའི་འཕེལ་རྒྱས་ཆེད་ཐབས་ཇུས་འདོན་རྒྱུའི་རེ་བ་བྱེད་ཀྱི་ཡོད་ཅེས་བཤད།

ཚེས24ཉིན། གྲོང་ཁྱེར་མི་དམངས་འཐུས་ཚོགས་སྐབས་གསུམ་པའི་ཚོགས་འདུ་ཐེངས་དང་པོར་ཞུགས་པའི་འཐུས་མི་ཚོས་ཚོགས་ཆེན་གྱི་གནས་ཡུལ་དུ་འབྱོར་ནས་འབྱོར་ཐོ་བཀོད་པ་དང་། ཁོང་ཚོ་ནི་ལས་རིགས་ཁག་ནས་ཡོང་བ་དང་། གྲོང་གསེབ་དར་རྒྱས་དང་།སློབ་གསོ་སྨན་བཅོས། སྐྱེ་ཁམས་སྲུང་སྐྱོང་།ལས་ཞུགས་འབབ་འཕར་སོགས་དམངས་འཚོའི་བྱ་བ་དངོས་ལ་དོ་ཁུར་ཆེན་པོ་བྱེད་ཀྱི་ཡོད་ལ། ཁོང་ཚོས་གཞི་རིམ་གྱི་དམངས་འདུན་དེ་བསམ་འཆར་དང་གྲོས་འགོར་བཅོས་སྒྲིག་བྱས་ནས་ཁྲིམས་ལྟར་དམངས་ཀྱི་འཐུས་ཚབ་བྱས་ཡོད་པ་རེད།

གྲོང་ཁྱེར་མི་དམངས་འཐུས་ཚོགས་ཀྱི་འཐུས་མི་ཚེ་བརྟན་གཡང་མཚོ་ཡིས་ང་རང་ད་ཐེངས་ཀྱི“ཚོགས་འདུ་གཉིས”ལ་ཞུགས་ཐུབ་པར་སེམས་པ་དགའ་པོ་བྱུང་།རྒྱུན་གཏན་གྱི་ལས་ཀའི་ཁྲོད་ངས་དམངས་འཚོ་ལ་དོ་ཁུར་ཆེ་ཤོས་བྱེད་ཀྱི་ཡོད། ཚོགས་ཆེན་འདིའི་ཐོག་གཞི་རིམ་གྱི་སྐད་སྒྲ་བརྒྱུད་སྤྲོད་ཐུབ་པ་དང་གྲོང་ཁྱེར་ཡོངས་ཀྱི་འཐུས་མི་ཚོ་དང་མཉམ་དུ་གྲོས་བསྡུར་དང་སློབ་སྦྱོང་ཡག་པོ་ཐུབ་རྒྱུའི་རེ་བ་ཡང་བྱེད་ཀྱི་ཡོད་ཅེས་བཤད།