འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ9པའི་ཚེས23ཉིན། གྲོང་ཨུད་ཀྱི་ཧྲུའུ་ཅི་ཀྲང་ལི་འཇོ་མདའ་རྫོང་འཐུས་མི་ཚོགས་པའི་གྲོས་ཞིབ་ནང་ཞུགས་ཏེ་ཏང་གི་འཐུས་མི་ཚོ་དང་མཉམ་དུ་གྲོང་ཨུད་ཀྱི་སྙན་སྒྲོན་དང་གྲོང་ཁྱེར་སྒྲིག་ཨུད་ཀྱི་ལས་དོན་སྙན་སྒྲོན་ལ་གྲོས་ཞིབ་བྱས་ནས་གྲོང་ཁྱེར་ཡོངས་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་ཇུས་ཆེན་ལ་མཉམ་གྲོས་གནང་ཡོད།

གྲོས་ཞིབ་བྱ་ཡུལ་གྱི་རྣམ་པ་ཧ་ཅང་འཁྲུག་ཆ་དོད་པ་དང་འཐུས་མི་རྣམ་པས་གཏམ་བཤད་ཚ་ཚ་འུར་འུར་ངང་སྤེལ་གནང་ཞིང་། ཚང་མས་ལས་དོན་སྙན་སྒྲོན་ནི་ཆབ་སྲིད་ཀྱི་ཚུགས་གནས་མཐོ་བ་དང་། ཕྱོགས་བསྡོམས་ཀྱི་ཕན་འབྲས་ཏན་ཏིག་ཡིན་པ། འཕེལ་རྒྱས་ཀྱི་བསམ་ཕྱོགས་གསལ་བ། ལས་དོན་བཀོད་སྒྲིག་ཏན་ཏིག་ཡིན་པས། ངར་ཤུགས་སྐྱེད་ཅིང་སྐུལ་སློང་ཐུབ་པའི་སྙན་སྒྲོན་ལེགས་པོ་ཞིག་རེད་ཅེས་གཅིག་རྗེས་གཉིས་མཐུད་ངང་བཤད་པ་རེད། པད་མ་བཀྲ་ཤིས་དང་། ཀྲང་ལིས་མིན། འཆི་མེད་རིག་འཛིན། དབྱང་ཧྥུའུ་ཧུའེ་སོགས་འཐུས་མི་ཚོས་ལས་ཀའི་དོན་དངོས་དང་ཟུང་འབྲེལ་གྱིས་རྫོང་ཁོངས་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་དང་། གཞི་རིམ་བཅོས་སྐྱོང་། རིག་གནས་རྒྱུད་འཛིན་སོགས་ལ་དམིགས་ནས་བསམ་འཆར་དང་གྲོས་འགོ་བཏོན་གནང་བ་རེད།

ཀྲང་ལི་ཡིས་གསན་ཞོར་དུ་ཟིན་བྲིས་བཀོད་པར་མ་ཟད་དུས་ངེས་མེད་དུ་འཐུས་མི་རྣམས་དང་མཉམ་དུ་བསམ་འཆར་བརྗེ་རེས་གནང་ཞིང་། ཁོང་གིས་གྲོང་ཁྱེར་གྱི་ཏང་གི་འཐུས་མི་ཚོགས་ཆེན་ཐེངས་གསུམ་པ་ནི་གྲོང་ཁྱེར་ཡོངས་ཀྱི་མི་རིགས་ཁག་གི་མི་དམངས་ཀྱི་ཆབ་སྲིད་དང་འཚོ་བའི་ཁྲོད་ཀྱི་དོན་ཆེན་ཞིག་རེད། འཐུས་མི་རྣམ་པ་ནི་འཐབ་ཕྱོགས་མི་འདྲ་བ་དང་ཁྱབ་ཁོངས་མི་འདྲ་བ་ནས་ཡོང་ཞིང་ཏང་ཡོན་ལས་བྱེད་ཁྲོད་ཀྱི་སྔོན་ཐོན་འཐུས་ཚབ་པ་ཡིན་པས། ཆབ་སྲིད་ཀྱི་ཚུགས་གནས་མཐོ་རུ་གཏོང་བ་དང་། ལས་འགན་དང་འགན་འཁྲི་ཕྲག་ཏུ་འཁུར་བ། ད་རེས་ཀྱི་ཏང་གི་འཐུས་མི་ཚོགས་ཆེན་གྱི་དགོངས་དོན་སྣེ་ཁྲིད་དེ་སློབ་སྦྱོང་དྲིལ་བསྒྲགས་དང་། ལག་བསྟར་དོན་འཁྱོལ་ཡག་པོ་བྱས་ཏེ། གྲོང་ཁྱེར་ཡོངས་ཀྱི་གོང་འོག་གི་བསམ་བློ་དང་བྱ་སྤྱོད་ཏན་ཏིག་གིས་ཚོགས་ཆེན་གྱི་དམིགས་ཚད་ལས་འགན་ཐོག་གཅིག་གྱུར་ཡོང་བར་བྱེད་པ་དང་། དངོས་འཛིན་དངོས་སྒྲུབ་དང་དཀའ་སྤྱད་ཡར་བརྩོན་གྱིས་ཀྲུང་གོའི་ལུགས་ཀྱི་དེང་རབས་ཅན་གྱི་ཆབ་མདོའི་ལེའུ་གསར་པ་ཧུར་ཐག་ངང་རྩོམ་ཆེད་དེ་བས་ཆེ་བའི་ལེགས་སྐྱེས་འབུལ་དགོས་ཞེས་བསྟན།

ཀྲང་ལི་ཡིས་འཇོ་མདའ་རྫོང་ནི་བོད་ཤར་གྱི་སྒོ་མོ་ཡིན་ལ། གྲོང་ཁྱེར་ཡོངས་ཀྱི་དཔལ་འབྱོར་དང་མི་གྲངས་མང་ཤོས་ཀྱི་རྫོང་ཡང་ཡིན་པས། ངེས་པར་དུ་འགན་འཁྲི་དེ་བས་ཆེ་བ་འཁུར་བ་དང་བྱས་རྗེས་དེ་བས་ཆེན་པོ་འཇོག་དགོས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱེད་པ་དང་། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་ལེན་བསྟར་བ། ཡང་དག་པའི་སྲིད་དོན་ལས་རྗེས་ཀྱི་ལྟ་བ་འཛུགས་པ་དང་ལག་ལེན་བརྟན་དུ་གཏོང་བ། བྱས་རྗེས་ཐོབ་པར་ངས་མི་རྩོད་པའི་བསམ་པའི་འཁྱེར་སོ་དང་བྱས་རྗེས་འཇོག་པར་ང་ཡིས་འབད་པའི་ལོ་རྒྱུས་ཀྱི་འགན་འཁྲིར་བརྟེན་ནས“དོན་ཆེན་བཞིར”དམ་པོར་དམིགས་པ་དང་།“འཛུགས་གཏོད་བཞིར”ཤུགས་རྒྱག་པ།“གཏོད་དགོས་པ་གསུམ”གྱི་སྤྱིའི་ངེས་གནས་གཞི་རྩ་འཛིན་པ། “མདུན་གྲལ་དུ་སླེབས་པ་བཞི”དང“ལྔ་ལྡན་ཆབ་མདོ”གཏོད་པར་གཞི་གཅིག་ཏུ་ཁོང་དུ་ཆུད་པ་དང་མཉམ་དུ་སྐུལ་འདེད་གཏོང་བ། འཆར་གཞི་ལག་བསྟར་མཐའ་གཅིག་ཏུ་མཐའ་འཁྱོངས་བྱེད་པ་དང་། ལས་དོན་གཅིག་རྗེས་གཉིས་མཐུད་ངང་སྒྲུབ་པ་བཅས་བྱས་ཏེ། འཇོ་མདའ་རྫོང་ཡུལ་གཅིག་གི་སྙན་གྲགས་བརྟེན་ནས་ཆབ་མདོའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་འགྲོ་བར་གཟི་བརྗིད་སྣོན་དགོས་པའི་ནན་བཤད་གནང་ཡོད།