དེང་སྐབས།མཆིན་ཚིལ་ནད་དེའང་རྒྱུན་མཐོང་གི་ནད་རིགས་ཤིག་ཏུ་གྱུར་ཡོད་མོད།ཡིན་ནའང་མཆིན་ཚིལ་ནད་ཕོག་མཁན་མང་ཆེ་བས་རང་ཉིད་ལ་ན་ཚ་འདི་ཕོག་ཡོད་པ་ཤེས་ཀྱི་མེད།སྤྱིར་ན་ནད་རིགས་འདིར་མངོན་གསལ་དོད་པའི་ནད་རྟགས་ཅི་ཡང་ཐོན་མི་སྲིད་ཀྱང་།ལུས་པོའི་བདེ་ཐང་ལ་གནོད་ངེས་རེད།

མི་མང་པོ་ཞིག་གིས་མཆིན་ཚིལ་ནད་ནི་ན་ཚ་ཆུང་ཆུང་ཞིག་རེད་བསམས་ནས་དོ་སྣང་དེ་ཙམ་བྱེད་གིན་མེད།དོན་དངོས་སུ་དེར་སྣང་ཆུང་མི་བྱེད་པར་ངེས་པར་དུ་དོ་སྣང་བྱེད་དགོས་པ་ཞིག་རེད།

མཆིན་ཚིལ་ནད་ཀྱི་སློང་རྐྱེན་གང་ཡིན་ནམ།

དུས་རྒྱུན་བཟའ་བཏུང་ཚོད་མི་འཛིན་པ་དང་འཚོ་བཅུད་ལ་དོ་སྣང་མི་བྱེད་པར།ཤ་རིགས་ཟས་དྲགས་པར་མ་ཟད།སྔོ་ཚོད་དང་ཤིང་ཏོག་མི་ཟ་བའི་གོམས་གཤིས་ངན་པ་ལས།ལུས་པོའི་ལྗིད་ཚད་ཚད་ལས་བརྒལ་ན།མཆིན་ཚིལ་ནད་ཕོག་གི་ཡོད།

བཏུང་བྱ་མང་ཆེ་བར་མངར་ཆ་མང་པོ་འདུས་ཡོད།མངར་ཆ་མང་པོ་བསྟེན་པ་ནི་བྱིས་པ་དང་དར་མར་མཆིན་ཚིལ་ནད་ཕོག་པའི་སློང་རྐྱེན་གཙོ་བོ་རེད།

རྒྱུན་དུ་ཐཱན་ཆུ་འདྲེས་འགྱུར་གྱི་ཟས་རིགས་མང་པོ་ཟོས་ན།མཆིན་ཚིལ་ནད་ཕོག་སླ།

མཆིན་ཚིལ་ནད་ཇི་ལྟར་བཅའ་དགོས་སམ།

ཤ་རྒྱགས་པ་ནི་མཆིན་ཚིལ་ནད་སློང་བའི་རྒྱུ་རྐྱེན་གཙོ་བོ་རེད།ཤ་རྒྱགས་པ་མང་ཆེ་བར་མཆིན་ཚིལ་ནད་ཕོག་ཡོདདེའི་ཕྱིར་མཆིན་ཚིལ་ནད་བཅའ་དགོས་ན། ངེས་པར་ཚོ་བྱང་དུ་འཇུག་དགོས། ཉིན་རེར་ལུས་སྦྱོང་བྱེད་དགོས་ཤིང་།ཐེངས་རེར་ལུས་རྩལ་སྐར་མ་སུམ་ཅུའི་ཡན་རྩེས་ན་ཚོ་བྱང་བར་ཕན།

གཞན་ཡང་།མཆིན་ཚིལ་ནད་འདི་སྤྱིར་ན་ཆང་རག་དང་འབྲེལ་བ་ཆེན་པོ་ཡོད། མཆིན་ཚིལ་ནད་ཡོད་ཚེ་རབ་ཡིན་ན་རང་ཉིད་ཀྱི་ལུས་པོའི་བདེ་ཐང་གི་ཆེད་དུ་ཆང་རག་སྤང་དགོས། དགོས་པ་ཡོད་ཚེ། མཆིན་ཚད་ཀ་པ་དང་།མཆིན་ཚད་ཁ་པ།ཆམ་རིམས།དེ་བཞིན་གློ་བའི་གཉན་རིམས་སོགས་ཀྱི་རིམས་འགོག་སྨན་ཁབ་བརྒྱབ་ནས།མཆིན་པར་སྲུང་སྐྱོང་ཡག་པོ་བྱེད་དགོས།