འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ4པའི་ཚེས28ཉིན་ཏཱ་ཐང་དགྲ་ལྷ་ཆུ་ཤུགས་གློག་ཁང་གི་འཕྲུལ་ཚན་དང་པོའི་འཕྲུལ་འཁོར་འདེགས་སྒྲིག་ལེགས་གྲུབ་ཟིན་པ་རེད།

དགྲ་ལྷ་ཆུ་ཤུགས་གློག་ཁང་ནི་ཆབ་མདོ་གྲོང་ཁྱེར་གྱི་མཛོ་སྒང་རྫོང་དང་ཉིང་ཁྲི་གྲོང་ཁྱེར་གྱི་རྫ་ཡུལ་རྫོང་གཉིས་ཀྱི་ཁོངས་སུ་ཡོད། དེ་ནི་ཡུལ་ཆུ་རྒྱུག་ཁུལ་གྱི“མཛོད་གཉིས་རིམ་བདུན”གསར་སྤེལ་ཀྱི་རིམ་པ་དྲུག་པ་དེ་རེད། སྤྱི་ལེ་60ཟིན་པའི་ཁུག་པ་ཆེན་པོའི་རང་བྱུང་གཟར་ཁྱད་སྤྱད་དེ་གུག་ཀྱོག་སྲིང་ཞིང་འགག་དོག་སེལ་བས་སྨི་700ཟིན་ཙམ་གྱི་འབབ་ཤུགས་གྲུབ་པ་དང་། དེ་ལ“འབབ་ཤུགས་མཐོ་བ་དང་། ཤོང་ཚད་ཆེ་བ། སྐྱོམ་རྡབ་ལྡན་པ། ས་དོང་ཟབ་པ་བཅས་ཀྱི”ལས་གྲྭའི་ལག་རྩལ་གྱི་ཁྱད་ཆོས་ལྡན་ཞིང་། དེ་ནི་རྒྱལ་ཁབ་ཀྱིས་ཤོང་ཚད་ཆེ་བའི་སྐྱོམ་རྡབ་རྣམ་པའི་ཆུ་སྐོར་གློག་འདོན་འཕྲུལ་ཚན་ཞིབ་བཟོ་བྱེད་པའི་འདེགས་སྐྱོར་རྣམ་གྲངས་ཤིག་རེད།

ཤེས་རྟོགས་བྱུང་བ་ལྟར་ན། དགྲ་ལྷ་ཆུ་ཤུགས་གློག་ཁང་རྣམ་གྲངས་ནི་2020ལོའི་ཟླ12ཞིབ་དཔྱད་ཆོག་མཆན་ཐོབ་པ་དང་། གཞུང་ཁོངས་རྒྱུ་ནོར་ལྟ་སྐུལ་དོ་དམ་ཨུ་ལྷན་གྱི་གཙོ་གནད་ཁྱབ་ཁོངས་ཀྱི་འགག་རྩའི་ལྟེ་བའི་ལག་རྩལ་འགག་སྒྲོལ་དཔེ་སྟོན་རྣམ་གྲངས་ཤིག་ཡིན་པ་མ་ཟད། ད་དུང་རྒྱལ་ཁབ་ནུས་རྒྱུ་ཅུས་ཀྱི་ནུས་རྒྱུ་ཁྱབ་ཁོངས་ཀྱི་གཙོ་ཆེའི་ལག་རྩལ་སྒྲིག་ཆས་ཐོག་མའི་རྣམ་གྲངས་ཀྱི་ཁོངས་སུ་ཚུད་ཡོད། རྣམ་གྲངས་འཛུགས་སྐྲུན་བྱས་པ་དེས་གོ་ལ་ཧྲིལ་པོའི་འཕྲུལ་ཆས་རྐྱང་པའི་གློག་འདོན་ཚད་ཆེ་ཤོས་ཡིན་པའི་སྐྱོམ་རྡབ་རྣམ་པའི་ཆུ་སྐོར་གློག་འདོན་འཕྲུལ་ཚན་དུ་གྱུར་ནས། འཁོར་འབྲེལ་ཧྲིལ་པོ་རྒྱལ་ཐོན་ཅན་ཡིན་པ་མ་ཟད་ད་དུང་འཕྲུལ་ཚན་གྱི་ལས་ཕྱོད་འཛམ་གླིང་གི་སྔོན་ཐོན་ཆུ་ཚད་དུ་བསླེབས་ནས། རང་རྒྱལ་གྱི་ཆུ་གློག་འདོན་སྤེལ་ནུས་པ་ཆེ་རུ་གཏོང་བ་དང་། ཆུ་གློག་སྒྲིག་ཆས་ཀྱི་འགག་རྩའི་ལྟེ་བའི་ལག་རྩལ་རང་བརྟེན་ཚོད་འཛིན་ཐུབ་པར་སྣེ་ཁྲིད་དང་དཔེ་སྟོན་གྱི་ནུས་པ་གལ་ཆེན་ཐོན་ཏེ། བོད་ཀྱི་ནུས་རྒྱུ་གཙང་མ་གསར་སྤེལ་འཛུགས་སྐྲུན་མགྱོགས་སུ་གཏོང་བ་དང་། ས་ཁོངས་ཀྱི་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་གཏོང་བ། དེ་བཞིན་སྐྱེ་ཁམས་ཁོར་ཡུག་སྲུང་སྐྱོང་བཅས་ལ་དོན་སྙིང་གལ་ཆེན་ལྡན་ཡོད།