འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཉིན་ཤས་བསྟུད་མར། ཆབ་མདོ་གྲོང་ཁྱེར་གྱི་མི་རིགས་ཁག་གི་ལས་བྱེད་མང་ཚོགས་དང་། དམག་དཔུང་གི་དཔོན་དམག སློབ་གྲྭའི་དགེ་སློབ། སྤྱི་བདེ་ལས་བྱེད་ཉེན་རྟོག་པ། མེ་གསོད་རོགས་སྐྱོབ་མི་སྣ་དེ་བཞིན་སྤྱི་ཚོགས་ལས་རིགས་ཁག་གི་མང་ཚོགས་བཅས་སྔ་རྗེས་སུ་ཆབ་མདོ་གྲོང་ཁྱེར་སྔོན་གཤེགས་དཔའ་བོའི་བང་སོའི་སྐྱེད་ཚལ་དུ་བསྐྱོད་དེ་མེ་ཏོག་སོས་པ་འབུལ་བ་དང་། ངག་བསྡམས་ནས་མྱ་ངན་ཞུ་བ། ཏང་ཞུགས་དམ་བཅའ་བསྐྱར་འཇོག སྔོན་གཤེགས་དཔའ་བོའི་དྲན་གསོ་ཁང་དུ་རྗེས་དྲན་ཞུ་བ་སོགས་ཀྱི་བྱེད་ཐབས་བརྒྱུད་རྒྱལ་གཅེས་རིང་ལུགས་ཀྱི་སློབ་གསོ་དང་ལེན་བྱས་པ་རེད།

བང་སོའི་སྐྱེད་ཚལ་དུ་གསར་བརྗེའི་སྔོན་གཤེགས་དཔའ་བོའི་དྲན་གསོའི་རྡོ་རིང་བརྗིད་ཉམས་ལྡན་ལ་འགྱིང་ངེར་གནས་པ་དང་། དུར་ཕྱགས་བྱེད་མཁན་གྱི་ལས་རིགས་ཁག་གི་མི་སྣ་ཚོས་མདུན་དུ་དལ་བུར་བསྐྱོད་ནས་མི་དམངས་ཀྱི་དཔའ་བོ་ཚོར་མེ་ཏོག་སི་ར་དང་མེ་ཏོག་ཆོན་བུ་ཕུལ་བ་མ་ཟད། སྔོན་གཤེགས་དཔའ་བོའི་བང་སོའི་རྡོ་རིང་མདུན་གྱི་རྩྭ་ངན་བཀོག་པ་དང་། བང་སོའི་རྡོ་རིང་འཕྱིས་པ། མེ་ཏོག་སོས་པ་འབུལ་བ་བཅས་བྱས་ཏེ། གསར་བརྗེའི་སྔོན་བྱོན་པ་ཚོར་རྗེས་དྲན་ཟབ་མོ་ཞུ་ལུགས་དང་། གསར་བརྗེའི་ལོ་རྒྱུས་བློ་ལ་བརྟན་པོར་ངེས་ནས་རྒྱུན་འཛིན་བྱེད་ལུགས། དེ་བཞིན་སྔོན་གཤེགས་དཔའ་བོས་རང་སྲོག་བློས་བཏང་ནས་ལེགས་སྐྱེས་ཕུལ་བར་གུས་འདུད་ཚད་མེད་ཞུ་ལུགས་བཅས་མཚོན་པར་བྱས་ཡོད།

ཚང་མས་སྔོན་གཤེགས་དཔའ་བོའི་མཛད་རྗེས་བློ་ལ་བརྟན་པོར་ངེས་པ་དང་གསར་བརྗེའི་སྙིང་སྟོབས་རྒྱུན་འཛིན་བྱེད་པ་དང་། སྔོན་གཤེགས་དཔའ་བོར་གུས་བཀུར་ཞུ་བའི་བརྩེ་སེམས་དེ་དངོས་སྒྲུབ་ཡར་བརྩོན་གྱི་སྒུལ་ཤུགས་ཆེན་པོར་འགྱུར་བ་བྱེད་པ། རང་འཁྲིའི་ལས་གནས་ལ་གཞི་ཚུགས་པ་དང་དུས་རབས་ཀྱི་འགན་འཁྲི་འཁུར་ཕོད་པ་བཅས་བྱས་ཏེ་སྤྱི་ཚོགས་རིང་ལུགས་དེང་རབས་ཅན་གྱི་ཆབ་མདོ་གསར་པ་འཛུགས་སྐྲུན་བྱ་ཆེད་སྟོབས་ཤུགས་ལེགས་སྐྱེས་སུ་འབུལ་གྱི་ཡིན་ཞེས་གཅིག་རྗེས་གཉིས་མཐུད་ངང་བརྗོད་པ་རེད།