ཆབ་མདོ་གྲོང་ཁྱེར་མི་དམངས་སྲིད་གཞུང་གི་ཧྲི་ཀྲང་། ལུའོ་ཆིང་ཝུའུ།
(ཚགས་པར་2184པར་མཐུད) སྤུས་ཚད་མཐོ་བའི་གྲོང་གསེབ་དར་རྒྱས་ལ་སྐུལ་འདེད་གཏོང་བ། “ལས་གཞི་ཁྲི་སྟོང་”གི་ཉམས་མྱོང་སློབ་སྦྱོང་དང་བེད་སྤྱོད་བྱས་ཏེ། ཡུལ་བབ་དང་བསྟུན་ནས་གྲོང་གསེབ་འཛུགས་སྐྲུན་གྱི་ལག་བསྟར་ལམ་སྲོལ་འཐུས་ཚང་དུ་གཏོང་བ་དང་། རིགས་དབྱེ་ཞིང་གོ་རིམ་ལྡན་པ་དང་། ཕྱོགས་ཁུལ་ཅན་གྱིས་གྲོང་གསེབ་དར་རྒྱས་ལ་སྐུལ་འདེད་གཏོང་ནས། གྲོང་གསེབ་ཀྱི་མི་སྡོད་ཁོར་ཡུག་གཅིག་སྡུད་བཅོས་སྒྲིག་ལ་སྐུལ་འདེད་མགྱོགས་སུ་གཏོང་བ། “ཁེ་ལས་ཁྲི་ཡིས་གྲོང་ཚོ་ཁྲི་དར་རྒྱས་གཏོང་བའི”བྱེད་སྒོར་སྤུས་ཚད་མཐོ་བ་དང་ལས་ཕྱོད་ཆེན་པོས་སྐུལ་འདེད་གཏོང་བ། ཐོན་ལས“ཁག་གཅིག་བྱས་པ་བཞིའི”རིགས་དབྱེ་འཕེལ་རྒྱས་ཀྱི་ལས་དོན་ལ་རོགས་སྐྱོར་བྱེད་ཤུགས་མགྱོགས་སུ་གཏོང་བ། གྲོང་གསེབ་ཀྱི་ཐུན་མོང་དཔལ་འབྱོར་གསར་པ་གོང་འཕེལ་དང་སྟོབས་ཆེར་གཏོང་དགོས། རྒྱུན་རྣམ་ཅན་གྱི་དབུལ་ལོག་དབུལ་འགྱུར་སྔོན་འགོག་བྱེད་པའི་ལམ་སྲོལ་གཅིག་གྱུར་ངང་བཙུགས་ནས། གྲོང་གསེབ་ཀྱི་གྲོང་མིའི་ཡོང་འབབ་འཕར་ཚད་དེ་གྲོང་ཁྱེར་དང་གྲོང་རྡལ་གྱི་གྲོང་མིའི་ཡོང་འབབ་འཕར་ཚད་ལས་མཐོ་བ་ཡོང་བའི་འགན་ལེན་བྱེད་པ་དང་། དབུལ་སྒྲོལ་མི་འབོར་གྱི་མི་རེའི་ཆ་སྙོམས་ཡོང་འབབ་ཁེར་གཙང་འཕར་ཚད་དེ་གྲོང་གསེབ་ཀྱི་གྲོང་མིའི་ཡོང་འབབ་འཕར་ཚད་ལས་མཐོ་བ་ཡོང་བ་བྱ་དགོས། ལོ་རྒྱུས་ཀྱི་རིག་དངོས་གནའ་ཤུལ་སྲུང་སྐྱོང་བེད་སྤྱོད་དང་གྲོང་ཁྱེར་གྱི་རྟེན་རྫས་བཤམས་མཛོད་ཁང་གི་ནུས་པའི་བཀོད་ཁྱབ་ལེགས་སུ་གཏོང་རྒྱུར་ཤུགས་སྣོན་བརྒྱབ་སྟེ། རང་སྐྱོང་ལྗོངས་རིམ་པའི་ལོ་རྒྱུས་རིག་གནས་ཀྱི་གྲོང་རྡལ་དང་གྲོང་ཚོ་གྲགས་ཅན་ལ་སྙན་ཞུ་ཧུར་ཐག་འབུལ་དགོས།
(བདུན) ཚན་རྩལ་གྱི་ནུས་སྐྱེད་མངོན་གསལ་དོད་པོ་ཡོང་བ་བྱས་ནས། ཐོན་ལས་རིམ་སྤོར་གྱི་སྒུལ་ཤུགས་གཙོ་བོ་གཏོད་དགོས།
སྟེགས་བུའི་གཞི་རྟེན་སྟོབས་ལྡན་དུ་གཏོང་བ། ནོར་སྲིད་ཀྱིས་ཚན་རྩལ་ལ་མ་དངུལ་འཇོག་གྲངས་མང་དུ་གཏོང་བ་དང་དོ་དམ་ལམ་སྲོལ་འཐུས་ཚང་དུ་གཏོང་བ། ཡུལ་བབ་དང་བསྟུན་ནས་ཐོན་སྐྱེད་ནུས་ཤུགས་གསར་པ་འཕེལ་རྒྱས་གཏོང་བ་དང་། རིམ་པ་བཞིན་དུ་གསར་གཏོད་ཅན་གྱི་ཁེ་ལས་འབྲིང་ཆུང་དང་“ཆེད་ཞིབ་ཁྱད་གསར་བཞི”གྱི་ཁེ་ལས་འཛུགས་སྐྱོང་བྱེད་དགོས། བོད་སྐྱོར་ཞིང་ཆེན་དང་གྲོང་ཁྱེར། ཁེ་ལས་སོགས་དང་མཉམ་ལས་བྱེད་རྒྱུར་ཤུགས་སྣོན་བརྒྱབ་སྟེ། “ཞིབ་འཇུག་གསར་སྤེལ-ཚོད་ལྟ-གཞན་སྒྱུར”བཅས་ཀྱི་འབྲེལ་མཐུད་ཐབས་ལམ་འཚོལ་ཞིབ་བྱས་ནས། ཆབ་མདོར་གཙོ་གནད་ཚོད་ལྟ་ཁང་དང་ལག་རྩལ་གསར་གཏོད་ལྟེ་གནས། ཚོད་ལྟའི་ལག་ཁྱེར་སྤྲོད་པའི་ལས་སྟེགས་སོགས་སྐྲུན་རྒྱུར་འབད་པ་བྱེད་དགོས། རང་ས་གནས་ཀྱི་ཚན་རྩལ་ཤེས་ལྡན་མི་སྣ་སྐྱེད་སྲིང་མགྱོགས་པོ་བྱེད་པ་དང་སྤུས་ཚད་མཐོ་བའི་ཤེས་ལྡན་མི་སྣ་ནང་འདྲེན་གྱི་བགྲོད་ལམ་ཤར་གཏོང་བྱས་ཏེ། རིགས་ཁག་གི་ཤེས་ལྡན་མི་སྣ་བོད་ཤར་དུ་གཞི་ཚུགས་པ་དང་འཇོན་ཐང་ངོམས་པ། རིན་ཐང་མངོན་པ་བཅས་བྱེད་དུ་འཇུག་དགོས།
ཐོན་ལས་དང་ཚན་རྩལ་མཉམ་འདྲེས་ལ་སྐུལ་འདེད་བྱེད་པ། ཚན་རྩལ་གསར་གཏོད་ལ་བརྟེན་ནས་ཐོན་ལས་གསར་གཏོད་ཀྱི་སྣེ་ཁྲིད་དེ། ནུས་རྒྱུ་གཙང་མ་དང་རིག་གནས་ཡུལ་སྐོར། ཞིང་འབྲོག་ལས་སོགས་གཙོ་གནད་ཁྱབ་ཁོངས་ཀྱི་ཚན་རྩལ་ལས་འགན་བཀོད་སྒྲིག་དང་ལག་བསྟར་བྱེད་མགྱོགས་སུ་གཏོང་བ། ཚན་རྩལ་གསར་གཏོད་རྟེན་གཞི་དང་རྩིས་ནུས་ལྟེ་གནས་གཙོ་གནད་དུ་བྱས་པའི“རྟེན་གཞི་བཞི་དང་ལྟེ་གནས་གཅིག”གི་འཛུགས་སྐྲུན་ལ་སྐུལ་འདེད་མགྱོགས་སུ་གཏོང་བ། སྣེ་ཁྲིད་རང་བཞིན་དང་སྐུལ་ཁྲིད་རང་བཞིན་ལྡན་པའི་ཐོན་ལས་ཁག་གཅིག་འཛུགས་སྐྲུན་བྱ་རྒྱུར་རྒྱབ་སྐྱོར་བྱེད་དགོས། འགག་རྩའི་ལྟེ་བའི་ལག་རྩལ་དང་ས་མཐོར་སྤྱོད་གོ་ཆོད་པའི་ལག་རྩལ། གཞན་སྒྱུར་བེད་སྤྱོད་བཅས་མགྱོགས་སུ་བཏང་སྟེ། ནུས་རྒྱུ་གཙང་མའི་ཐོན་ལས་ཀྱི་ས་མཐོའི་ཚན་རྩལ་ཞིབ་འཇུག་གསར་སྤེལ་གྱི་གསར་གཏོད་གྲོང་ཁྱེར་གཏོད་དགོས། ཆབ་མདོའི་ཞིང་ལས་ཚན་རྩལ་ཁང་གི་ལས་སྟེགས་ཀྱི་ནུས་པ་འདོན་པར་སྐུལ་འདེད་གཏོང་བ་དང་། སྦྲུམ་རྟེན་ལྟེ་གནས་དེ་བོད་ཤར་གྱི་ཞིང་འབྲོག་ལས་རིགས་ཚན་རྩལ་ཞིབ་འཇུག་ལྟེ་གནས་སུ་བསྐྲུན་དགོས།
གྲངས་ཀའི་ནུས་སྐྱེད་ཇེ་མགྱོགས་སུ་གཏོང་བ། གྲངས་འཛིན་ཆབ་མདོ་འཛུགས་སྐྲུན་བྱེད་རྒྱུ་གཏིང་ཟབ་ཏུ་གཏོང་བ་དང་། ས་གྲོལ་གླིང་ཁུལ་འཛུགས་སྐྲུན་བྱེད་རྒྱ་ཆེ་རུ་གཏོང་བ། 5Gདང་ཀྲའོ་སྟོང་གི་འོད་དྲ། ཟོག་འབྲེལ་དྲ་རྒྱ། རྩིས་ནུས་ལྟེ་གནས་སོགས་རྨང་གཞིའི་སྒྲིག་བཀོད་གསར་པ་མ་ལག་བཀོད་སྒྲིག་བྱས་ཏེ། ཆབ་མདོ་གྲོང་ཁྱེར་གྱི་གྲངས་གཞི་ཆེན་མོའི་ལྟེ་གནས་ཀྱི་ནུས་པ་འདོན་སྤེལ་གང་ལེགས་བྱེད་དགོས། རིག་ལྡན་གྲོང་ཁྱེར་གྱི་སྐྱེལ་འདྲེན་དོ་དམ་ཞབས་ཞུའི་ལས་སྟེགས་འཛུགས་སྐྲུན་ལ་སྐུལ་འདེད་བཏང་སྟེ། གྲོང་ཁྱེར་གྱི་དོ་དམ་ཁྲིམས་བསྟར་དང་ཞབས་ཞུའི་སྤུས་ཚད་རྒྱུན་མཐུད་ངང་མཐོ་རུ་གཏོང་དགོས། ཚན་རིག་ཁྱབ་སྤེལ་འགྲེམས་ཁང་དང་གཡུལ་ས་འཛུགས་སྐྲུན་ལ་སྐུལ་འདེད་བཏང་སྟེ་ཚན་རིག་ལ་བརྩི་འཇོག་དང་གསར་གཏོད་ལ་བསྔགས་སྐུལ་བྱེད་པའི་སྤྱི་ཚོགས་ཀྱི་རྣམ་པ་ཞིག་གཏོད་དགོས།
(བརྒྱད) རྩ་བཅོས་ཀྱི་སྣེ་ཁྲིད་མངོན་གསལ་དོད་པོ་ཡོང་བ་བྱས་ནས། དམར་མདངས་ཆབ་མདོའི་བརྗོད་དོན་གཙོ་བོ་མཆོག་ཏུ་འཛིན་དགོས།
“རྣམ་གྲངས་ལ་བརྟེན་ནས་ལས་སྟེགས་སྐྲུན་པ་དང་འགྲན་བསྡུར་ལ་བརྟེན་ནས་འཇོན་ཐང་འཕེལ་བ”མཐའ་འཁྱོངས་བྱས་ཏེ། “དམར་མདངས་ཆབ་མདོ། དར་རྒྱས་ཡར་བརྩོན”མང་ཚོགས་རང་བཞིན་གྱི་འགྲན་བསྡུར་བྱེད་སྒོ་མུ་མཐུད་སྤེལ་བ་དང་། ནང་དོན་སྔར་བས་ཕུན་སུམ་ཚོགས་སུ་གཏོང་བ། གཞི་རྟེན་གསར་གཏོད་བྱེད་པ། མང་ཚོགས“དོན་ཆེན་བཞི”དང“འཛུགས་གཏོད་བཞི”ཡི་ནང་ཧུར་ཐག་གིས་ཞུགས་རྒྱུར་སྐུལ་སློང་རྒྱ་ཁྱབ་གཏོང་དགོས། མང་ཚོགས་ལ་དངོས་ནས་སྐུལ་སློང་དང་སྒྲིག་འཛུགས་བྱེད་པ་དང་། ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་བྱས་ཏེ། གཞི་རིམ་ཏང་གི་རྩ་འཛུགས་དེ་ཉིད་འཐབ་འཛིང་གི་བཙན་རྫོང་བརྟན་པོ་ཞིག་ཏུ་འཛུགས་སྐྱོང་བྱེད་དགོས། དངོས་ཡོད་ཀྱི་ཕན་འབྲས་ལྡན་པའི་སྒོ་ནས་བྱེད་སྒོ་དེ་ཏང་འཛུགས་སྐྱོང་ལ་ཤུགས་སྣོན་རྒྱག་པ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་བ། སྤྱི་ཚོགས་བརྟན་ལྷིང་ལ་སྲུང་སྐྱོང་བྱེད་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། མང་ཚོགས་ཀྱི་འབབ་འཕར་ལ་སྐུལ་འདེད་གཏོང་བ། ཕྱོགས་ཡོངས་ནས་ཏང་ནན་སྐྱོང་བྱེད་པ་བཅས་ཀྱི་ཕྱོགས་བསྡུས་ལས་སྟེགས་ཤིག་ཏུ་བསྒྱུར་ནས། “དམར་མདངས་ཆབ་མདོའི”སྤུས་རྟགས་སྔར་ལས་བཀྲག་མདངས་རྒྱས་པ་དང་། “དར་རྒྱས་ཡར་བརྩོན”གྱི་སྒུལ་ནུས་སྔར་ལས་ངར་ཤུགས་དང་ལྡན་པར་བྱེད་དགོས།
(དགུ) ཏང་ནན་སྐྱོང་བྱ་རྒྱུ་མངོན་གསལ་དོད་པོ་ཡོང་བ་བྱས་ནས། རང་ངོས་འཛུགས་སྐྱོང་གི་ཁོར་ཡུག་ཡག་པོ་སྐྱོང་སྤེལ་བྱེད་པ།
སྲིད་གཞུང་གི་ལས་དོན་ཡག་པོ་སྒྲུབ་པའི་ཆེས་རྩ་བ་ནི་ཁྱོན་ཡོངས་ནས་ཏང་ནན་སྐྱོང་བྱ་རྒྱུ་མཐའ་འཁྱོངས་བྱེད་པ་དེ་ཡིན་ལ། ཆེས་འགག་རྩ་ནི་སྤྱོད་ཚུལ་འཛུགས་སྐྱོང་ལ་ཤུགས་སྣོན་རྒྱག་རྒྱུ་དང་། སྲོག་ཤིང་དུ་གྱུར་པ་ནི་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་བརྟན་སྲུང་བྱ་རྒྱུ་དེ་ཡིན། ཁྲིམས་སྐྱོང་སྲིད་གཞུང་འཛུགས་སྐྱོང་ལ་ཤུགས་སྣོན་རྒྱག་པ། མི་དམངས་འཐུས་ཚོགས་ཀྱི་བཅའ་ཁྲིམས་ལྟ་སྐུལ་དང་ལས་དོན་ལྟ་སྐུལ། སྲིད་གྲོས་ཀྱི་དམངས་གཙོའི་ལྟ་སྐུལ་བཅས་རང་འགུལ་ངང་དང་ལེན་བྱེད་པ་དང་། ལྟ་ཞིབ་ལྟ་སྐུལ་དང་གསར་འགྱུར་སྨྱན་སྦྱོར། སྤྱི་ཚོགས་སྤྱི་དམངས་བཅས་ཀྱི་ལྟ་སྐུལ་རང་འགུལ་ངང་དང་ལེན་བྱེད་པ། ཁྲིམས་འཛིན་ལྟ་སྐུལ་རང་འགུལ་ངང་དང་ལེན་བྱེད་པ། མི་དམངས་སྡེ་ཚོགས་དང་སྤྱི་ཚོགས་ལས་རིགས་ཁག་གི་བསམ་འཆར་ལ་རང་འགུལ་ངང་ཉན་པ། རྩིས་བཤེར་དང་ནོར་རྩིས། དེ་བཞིན་བསྡོམས་རྩིས་ཀྱི་ལྟ་སྐུལ་ལས་དོན་ལ་ཤུགས་སྣོན་རྒྱག་པ་བཅས་བྱས་ཏེ། ཚན་རིག་དང་མཐུན་ཞིང་དམངས་གཙོ་ལྡན་པའི་སྒོ་ནས་ཇུས་ཐག་གཅོད་པ་དང་ཁྲིམས་ལྟར་སྲིད་འཛིན་ཐུབ་པར་བྱ་དགོས། གསར་གཏོད་ཀྱི་སྲིད་གཞུང་འཛུགས་སྐྱོང་ལ་ཤུགས་སྣོན་རྒྱག་པ། གནད་དོན་གསར་རྙིང་ལ་ཁ་གཏད་གཅོག་ཕོད་པ་དང་། འགག་གནད་དང་དཀའ་གནད་སེལ་ཕོད་པ། སྒྱུར་བཅོས་གསར་གཏོད་ཁྲོད་དཀའ་གནད་སེལ་བ་དང་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ཏེ། རྨང་གཞིའི་སྒྲིག་བཀོད་བལྟོས་བཅས་ཀྱིས་རྗེས་ལུས་ཡིན་པ་སོགས་ཀྱི་འགག་གནད་ཐག་གཅོད་བྱེད་པར་མཐོང་ཆེན་བྱེད་དགོས་ལ། མི་འབོར་དང་མི་སེམས། ཤེས་ལྡན་མི་སྣ་སོགས་ཀྱི་ཚོད་འཛིན་ཐག་གཅོད་བྱེད་པར་ཡང་མཐོང་ཆེན་བྱེད་དགོས། སྤྱོད་གཙང་སྲིད་གཞུང་འཛུགས་སྐྱོང་ལ་ཤུགས་སྣོན་རྒྱག་པ། འགག་རྩའི་ཉུང་ཤས་དང་འགག་རྩའི་སྡེ་ཚན་ནན་འཛིན་དང་། གཙོ་གནད་ཁྱབ་ཁོངས་ཀྱི་སྲིད་གཙང་གི་མཐའ་ཚད་ནན་སྲུང་། རང་ཉིད་ནན་བཅུན་དང་རང་འགན་ནན་འཁུར། རང་ཁོངས་ནན་བསྡོམས་བཅས་བསྒྲུབ་ཐུབ་པ་བྱེད་དགོས། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོའི་གྲུབ་འབྲས་སྲ་བརྟན་དང་རྒྱ་ཆེར་གཏོང་བ། མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་ཀྱི་གནད་དོན་གཅིག་སྡུད་བཅོས་སྒྲིག་ལ་སྐུལ་འདེད་གཏིང་ཟབ་བཏང་སྟེ། ནན་བཅུན་གྱི་ཁོར་ཡུག་ནན་ཏན་གྱིས་བསྐྲུན་པ་དང་། ཚུལ་མཐུན་གྱི་དར་སྲོལ་ནན་ཏན་གྱིས་འཛུགས་དགོས། ཞབས་ཞུ་ཅན་གྱི་སྲིད་གཞུང་འཛུགས་སྐྱོང་ལ་ཤུགས་སྣོན་རྒྱག་པ། མི་དམངས་སེམས་ནང་གི་གོ་གནས་མཐོ་ཤོས་སུ་འཇོག་རྒྱུ་མཐའ་འཁྱོངས་ཀྱིས་མི་དམངས་ཀྱི་བློ་ཡིད་ཚིམ་མིན་དེ་ལས་དོན་ལ་ཞིབ་བཤེར་བྱེད་པའི་ཚད་གཞི་ཨང་དང་པོར་བརྩི་དགོས། གཞི་རྩའི་སྤྱི་པའི་ཞབས་ཞུ་ཆ་སྙོམས་ཅན་ལ་སྐུལ་འདེད་གཏོང་བ་དང་། སྤྱི་ཚོགས་བཅོས་སྐྱོང་གི་མང་ཚོགས་རྨང་གཞི་བརྟན་དུ་བཏང་ནས། རང་སྐྱོང་ལྗོངས་ཏང་ཨུད་དང།སྲིད་གཞུང། གྲོང་ཨུད་བཅས་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག སྲིད་གཞུང་ལ་འགན་འཁྲི་ཡོད་པ་དང། གྲོང་ཁྱེར་ལ་དྲོད་ཚད་ལྡན་པ། མི་དམངས་ལ་དྲོ་སྐྱིད་ཡོད་པ་བཅས་བྱེད་དགོས།
འཐུས་མི་རྣམ་པ། འཆར་གཞི་བཀོད་ཟིན་པས། འབད་འབུངས་བྱ་དགོས་པའི་སྒང་ཡིན། “ལོ་ལྔ་ཚན་བཅོ་ལྔ་པའི”འཕེལ་རྒྱས་ཀྱི་རྒྱང་སྐྱོད་ལམ་བུ་གསར་པའི་ཐོག་ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་དེ་བས་མཐུན་སྒྲིལ་དམ་ཟབ་བྱས་ཏེ། ལྗོངས་ཏང་ཨུད་དང་སྲིད་གཞུང་། གྲོང་ཨུད་བཅས་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག ཞུམ་མེད་མདུན་སྐྱོད་ཀྱི་ངར་སེམས་ཆེར་སྐྱེད་དང་། གོང་འོག་བློ་གཅིག་གི་མཉམ་ཤུགས་གཅིག་ཏུ་སྒྲིལ་ནས། སྐར་ཆ་ཙམ་ཡང་འཕྲོ་བརླག་ཏུ་མི་གཏོང་བའི་བརྩོན་པའི་ངར་ཤུགས་ཆེ་རུ་བསྐྱེད་དེ། ཐོག་མཐའ་བར་གསུམ་དུ་དོན་འཁྱོལ་ལ་དམ་འཛིན་བྱེད་པའི་སེམས་ཤུགས་དང་བློ་སྟོབས་ཐོག་ནས། “ལོ་ལྔ་ཚན་བཅོ་ལྔ་པའི”འཕེལ་རྒྱས་ཀྱི་འགོ་ཡག་པོ་འཛུགས་པ་དང་གོམ་སྟབས་ཡག་པོ་སྤོ་བ། ཀྲུང་ཧྭ་མི་རིགས་རླབས་ཆེའི་བསྐྱར་དར་གྱི་ཀྲུང་གོའི་ཕུགས་འདུན་གྱི་ཆབ་མདོའི་ལེའུ་ལེགས་པར་རྩོམ་ཆེད་འབད་བརྩོན་ཧུར་ཐག་བྱེད་དགོས། (རྫོགས་སོ། །)