འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཉེ་ཆར། 2026ལོའི་ལོ་གསར་འགྲུལ་སྐྱེལ་འགོ་ཚུགས་པས། ལོ་གསར་ལ་ཕ་ཡུལ་དུ་ལོག་མཁན་མི་རྣམས་ལམ་ལྷོངས་བདེ་བགྲོད་ཐུབ་ཕྱིར། རང་རེའི་གྲོང་ཁྱེར་གྱི་སྤྱི་བདེའི་འགྲིམ་འགྲུལ་ཉེན་རྟོག་སོགས་སྡེ་ཚན་ཁག་གིས་ཐབས་ཤེས་གང་དྲག་བཏོན་ནས། འགྲུལ་ལམ་བདེ་འཇགས་ཡོང་བར་མཐུན་རྐྱེན་གང་ལེགས་སྦྱར་ཡོད།

2026ལོའི་ལོ་གསར་ལ་ཕ་ཡུལ་དུ་ལོག་མཁན་གྱི་འགྲུལ་ཚ་ཤོས་སུ་བསླེབས་ཡོད།གཉེན་འཕྲད་དང་ཕ་ཡུལ་དུ་ལོག་མཁན། ཡུལ་སྐོར་བ་སོགས་ཇེ་མང་འགྲོ་བཞིན་ཡོད་པས་འགྲིམ་འགྲུལ་གྱི་གནོན་ཤུགས་ཉིན་རེ་ལས་ཇེ་ཆེར་ཡིན་པ་རེད། ཆབ་མདོའི་སྤྱི་བདེ་འགྲིམ་འགྲུལ་ཉེན་རྟོག་སོགས་སྡེ་ཚན་ཁག་གིས་མཉམ་འབྲེལ་ཐོག་ནས། དམངས་བདེ་ཞབས་ཞུ་དང་ཁྲིམས་བསྟར་བཅོས་སྒྲིག སྲིད་ཇུས་དྲིལ་བསྒྲགས་སོགས་ཀྱི་བྱ་ཐབས་སྣ་མང་བཏོན་ཏེ། མང་ཚོགས་ཐམས་ཅད་བདེ་མོ་ཐང་མོའི་ངང་ནས་ཕ་ཡུལ་དུ་བསླེབས་པའི་འགན་སྲུང་བྱས་ཡོད།

ཆབ་མདོ་གྲོང་ཁྱེར་སྤྱི་བདེ་ཅུད་འགྲིམ་འགྲུལ་དོ་དམ་ཉིང་ལག་རུ་ཁག་གི་ཉིང་ལག་རུ་དཔོན་གཞོན་པ་ཝུན་ཤིན་གྱིས་ད་ལོའི་ལོ་གསར་གྱི་འགྲུལ་སྐྱེལ་སྐབས་ལ་ང་ཚོས་མི་དམངས་གོང་བཀུར་དང་ཚེ་སྲོག་གོང་བཀུར་མཐའ་འཁྱོངས་ཀྱིས་འཁོར་རིགས་ཁྲིམས་འགལ་ལ་རྡུང་རྡེག་དང་འགྲིམ་འགྲུལ་དོན་རྐྱེན་ལ་འགོག་ཟོན་བྱས་ཏེ། མི་དམངས་མང་ཚོགས་ཀྱི་བདེ་འཇགས་ལ་སྲུང་སྐྱོང་གིས་མི་ཐམས་ཅད་ལོ་གསར་སྐྱིད་པོར་གཏོང་རྒྱུའི་འགན་སྲུང་གང་ཐུབ་ཞུ་རྒྱུ་ཡིན་ཞེས་བཤད།

ཤེས་རྟོགས་བྱུང་བར་གཞིགས་ན། ད་རེས་ལོ་གསར་གྱི་འགྲུལ་སྐྱེལ་སྐབས་ལ། གྲོང་ཁྱེར་ཡོངས་ཀྱི་སྤྱི་བདེའི་འགྲིམ་འགྲུལ་དོ་དམ་སྡེ་ཁག་གིས་ཆུ་ཚོད་24རིང་ལ་ལས་རེས་སྡོད་རྒྱུ་དང་འགོ་ཁྲིད་ཀྱིས་ལས་སྣེ་འཛིན་ཏེ། གནམ་གཤིས་ལས་ཁུངས་དང་། འགྲིམ་འགྲུལ་ལས་ཁུངས། འཕྲལ་སྡོམ་ལས་ཁུངས་སོགས་དང་མཐུན་སྦྱོར་བརྟག་ཞིབ་བྱས་ནས། དུས་ཐོག་ཏུ་ཉེན་བརྡའི་ཆ་འཕྲིན་ཁྱབ་བསྒྲགས་དང་། གངས་འཁྱགས་གཙང་སེལ། འཕྲལ་སྡོམ་རོགས་སྐྱོབ་སོགས་ཀྱི་གྲ་སྒྲིག་ཞུ་རྒྱུ་རེད། དེ་བཞིན་སྤྱི་བདེའི་ཞིབ་བཤེར་ས་ཚིགས་དང་ཞབས་ཞུའི་ས་ཚིགས་ལ་བརྟེན་ཐོག་དམངས་བདེའི་ཞབས་ཞུ་ས་ཚིགས་བཙུགས་ནས། ལམ་སྟོན་དང་ཆུ་ཁོལ། སྨན་རྫས་སོགས་ཀྱི་དགོས་མཁོ་སྐོང་རྒྱུ་ཡིན་པ་རེད།

བྲག་གཡབ་རྫོང་འགྲིམ་འགྲུལ་དོ་དམ་རུ་ཆེན་གྱི་སློབ་སྟོན་པ་ཀུང་ཀྲེང་གིས་ཉེ་ཆར་གཞུང་ལམ་ཐོག་རླངས་འཁོར་འགྲོ་མཁན་མང་པོ་འདུག་པས། ང་ཚོས་ལམ་སྟོན་དོ་དམ་དང་རྐྱེན་ངན་ཞིབ་བཤེར་བྱེད་ཀྱི་ཡོད། འདི་ནས་དྲན་སྐུལ་ཞུ་རྒྱུ་ཞིག་ལ། ཚང་མས་སྔ་ཙམ་ནས་གར་འགྲོ་ལམ་ཁ་འདེམས་དགོས་པ་དང་། ངལ་དུབ་སྒོ་ནས་རླངས་འཁོར་གཏོང་མི་རུང་ལ་མི་ཤོང་ཚད་ལས་བརྒལ་མི་རུང་། ད་དུང་བདེ་འཇགས་སྐེ་རགས་དམ་པོར་བཅིང་དགོས་ཞེས་བཤད།

ལོ་གསར་གྱི་འགྲུལ་སྐྱེལ་འགོ་ཚུགས་པས་བདེ་འཇགས་ནི་གཙོ་བོ་ཡིན། ཆབ་མདོའི་སྤྱི་བདེ་འགྲིམ་འགྲུལ་ཉེན་རྟོག་གིས་འགྲུལ་སྐྱེལ་གྱི་གྲ་སྒྲིག་ཡོད་ཚད་ཚར་ཟིན། ལག་ལེན་དངོས་ཀྱི་ཐོག་ནས་འགྲིམ་འགྲུལ་བདེ་འཇགས་ཀྱི་རྨང་ལེགས་པར་བཏིང་སྟེ། རྒྱ་ཆེའི་མི་དམངས་མང་ཚོགས་རྣམས་དགའ་བདེ་སྤྲོ་གསུམ་གྱི་སྒོ་ནས་ལོ་གསར་གཏོང་ཐུབ་པའི་རེ་བ་སྙིང་ནས་བཅངས་ཡོད།