འདི་ག་ཚགས་པར་ཁང་དུ་གནས་ཚུལ་འབྱོར་གསལ། ལོ་གསར་སྐབས་སུ་ལས་གནས་བརྟན་སྲུང་གིས་གྲོང་ཁྱེར་སྲུང་མཁན་ཡོངས་ལ་གུས་བཀུར་མཚོན་ཕྱིར། ཟླ་2ཚེས་13ཉིན། གྲོང་ཁྱེར་རིག་གནས་ཡུལ་སྐོར་ཅུད་དང་གྲོང་ཁྱེར་རྟེན་མཛོད་ཁང་གིས་མཉམ་འབྲེལ་ཐོག་ནས་རྟེན་མཛོད་ཁང་དུ་ལོ་གསར་གཏོང་བའི་བྱེད་སྒོ་སྤེལ་བ་རེད། ཁོར་ཡུག་གཙང་སྦྲ་བྱེད་མཁན་དང་། སྤྱི་བདེའི་འགྲིམ་འགྲུལ་ཉེན་རྟོག་པ། མེ་ཟོན་རོགས་སྐྱོབ་མི་སྣ། སྨན་དོན་མི་སྣ་སོགས་གྲོང་ཁྱེར་སྲུང་མཁན་གྱི་འཐུས་ཚབ་མི་སྣ་50ལྷག་རྟེན་མཛོད་ཁང་དུ་འཛོམས་ནས་མཉམ་དུ་ལོ་གསར་བཏང་བ་རེད།

བྱེད་སྒོ་སྤེལ་ཡུལ་དུ་བཀྲ་ཤིས་དགེ་ལེགས་འཕེལ་བའི་རྟེན་འབྲེལ་གྱི་རྣམ་པས་ཡོངས་སུ་ཁེངས་ཤིང་། མི་རྣམས་ལྷན་ཅིག་ཏུ་འཛོམས་ནས་བོད་ཇ་སྲུབས་མ་དང་ཁ་ཟས་ཀྱི་བྲོ་བ་མྱོང་ཞིང་ལས་ཀ་དང་འཚོ་བའི་སྐོར་ནས་ལྷུག་པོར་གླེང་སྟེ་དགའ་བདེའི་དཔལ་ལ་འཁོད་ཡོད།

ཆབ་མདོ་གྲོང་ཁྱེར་མེ་ཟོན་རོགས་སྐྱོབ་ཉིང་ལག་རུ་ཁག་གི་ནུབ་ལམ་མེ་ཟོན་རོགས་སྐྱོབ་ས་ཚིགས་ཀྱི་འཐབ་འཛིང་པ་རིག་འཛིན་ཕུན་ཚོགས་ཀྱིས“ལོ་གསར་པའི་ནང་། ང་ཚོས་སྤྲོ་བ་ཆེན་པོས་ལས་གནས་བརྟན་སྲུང་དང་རང་འགན་གཙང་སྒྲུབ་བྱས་ཏེ། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་འགན་སྲུང་གང་ཡོད་ཀྱིས་ཆབ་མདོ་དུས་བདེ་ཞོད་འཇགས་ཡོང་བར་འགན་ལེན་བྱ་རྒྱུ་ཡིན”ཞེས་བཤད།

བྱེད་སྒོ་སྤེལ་ཡུལ་དུ་རྔམ་ཟིལ་ལྡན་པའི་རྒྱལ་གླུ་གཏོང་བའི་མཛད་སྒོ་སྤེལ་བ་དང་ཆབས་ཅིག་ལོ་གསར་གྱི་འཚམས་འདྲིའི་བརྙན་ཐུང་ལ་མཉམ་དུ་བལྟས་པ་རེད། རིག་རྩལ་འཛོམས་འཁྲབ་ཀྱི་སྐབས་སུ་ལྟད་མོ་སྣ་ཁ་10ཙམ་ཅི་དགར་བཤམས་པས་མི་ཐམས་ཅད་དགའ་སྤྲོའི་དཔལ་ལ་མྱོས་ཡོད།

གྲོང་ཁྱེར་རྟེན་མཛོད་ཁང་གི་འགོ་འཛིན་གཞོན་པ་ཚེ་དཔག་འཇམ་དབྱངས་ཀྱིས“ང་ཚོས་ལོ་གསར་དང་བསྟུན་ནས། རིག་གནས་ཀྱི་འབྲེལ་ཟམ་བཙུགས་ཏེ་ལས་གནས་བརྟན་སྲུང་བྱེད་མཁན་ཐམས་ཅད་རིག་རྫས་དང་རིག་གནས་མྱོང་རོལ་གྱི་ཁྲོད་ནས་གུས་བཀུར་དང་བརྩི་འཇོག་ཐོབ་པ། དགའ་སྐྱིད་དང་སྤྲོ་བ་འཕེལ་བའི་རེ་བ་ཞིག་བཅངས་ཡོད། མ་འོངས་པར། རྟེན་མཛོད་ཁང་གིས་མུ་མཐུད་ནས་དམངས་ཕན་གྱི་རིག་གནས་བྱེད་སྒོ་སྤེལ་ཏེ། རིག་གནས་ཀྱི་འབྲས་བཟང་ལ་མང་ཚོགས་གང་མང་ཞིག་གིས་ལོངས་སུ་སྤྱོད་ཐུབ་པར་བྱ་རྒྱུ་ཡིན”ཞེས་བཤད།