འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ་2ཚེས་13ཉིན་གྱི་ཕྱི་དྲོར།ཆབ་མདོ་གྲོང་ཁྱེར་གྱི་2026ལོའི་དཔྱིད་གསར་དུས་ཆེན་དང་བོད་ལོ་གསར་ལ་བཀྲ་ཤིས་རྟེན་འབྲེལ་མཉམ་ཞུའི་ཚོགས་འདུ་འཚོགས་ཤིང་།གྲོང་ཨུད་ཀྱི་ཧྲུའུ་ཅི་དང་། ཆབ་མདོ་ཡན་ལག་དམག་ཁུལ་ཁང་གི་ཏང་ཨུད་ཧྲུའུ་ཅི་དང་པོ་ཀྲོང་ཅིན་སུང་གི་བཀའ་མངགས་ལྟར་གྲོང་ཨུད་ཀྱི་ཧྲུའུ་ཅི་གཞོན་པ་དང་།གྲོང་སྤྱི་ལུའོ་ཆིང་ཝུའུ་ཡིས་ཤིས་ཚིག་གནང་ནས་གྲོང་ཨུད་དང་།མི་དམངས་འཐུས་ཚོགས་རྒྱུན་ལས་ཨུ་ལྷན།སྲིད་གཞུང་།སྲིད་གྲོས།ཆབ་མདོ་ཡན་ལག་དམག་ཁུལ་ཁང་སོགས་ཀྱི་ཚབ་ཞུས་ཏེ་གྲོང་ཁྱེར་ཡོངས་ཀྱི་མི་རིགས་ཁག་གི་མི་དམངས་དང་། ཆབ་མདོའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐུགས་ཁུར་དང་རྒྱབ་སྐྱོར་གནང་མཁན་ལས་རིགས་ཁག་གི་གྲོགས་པོ་ཚང་མར་དཔྱིད་གསར་དུས་ཆེན་གྱི་འཚམས་འདྲི་དང་དུས་ཆེན་གྱི་སྨོན་འདུན་བཟང་པོ་ཞུས་ཡོད།

ལུའོ་ཆིང་ཝུའུ་ཡིས་ཤིས་ཚིག་ནང་།2025ལོ་ནི་སྤྱིར་བཏང་གཏན་ནས་མིན་པ་སྟེ།“ལོ་ལྔ་ཚན་བཅུ་བཞི་པ”ཕུན་སུམ་ཚོགས་པོའི་ངང་མཇུག་བསྡུས་པ་དང་། བོད་རང་སྐྱོང་ལྗོངས་དབུ་བརྙེས་ནས་ལོ་60འཁོར་བའི་རྟེན་འབྲེལ་བྱེད་སྒོ་གཟབ་རྒྱས་ངང་འཚོགས་པ། སྤྱི་ཁྱབ་ཧྲུའུ་ཅི་ཞི་ཅིན་ཕིང་སླར་ཡང་བོད་ལ་ཕེབས་ནས་གཟིགས་ཞིབ་གནང་བས། ཆབ་མདོ་ཚུད་པའི་བོད་ལྗོངས་ཀྱི་མི་རིགས་ཁག་གི་བུ་ཕྲུག་ཚོར་ཀྲུང་ཧྭ་མི་རིགས་གཅིག་མཐུན་ཚོགས་པ་མཉམ་དུ་བཏོད་ནས་མཛེས་སྡུག་ལྡན་པའི་བོད་ལྗོངས་ཀྱི་ལེ་ཚན་གསར་པ་རྩོམ་རྒྱུའི་ཡིད་ཆེས་དང་ཆོད་སེམས་ལ་སྐུལ་ལྕག་ཆེན་པོ་ཐེབས་ཡོད།

གྲོང་ཁྱེར་ཡོངས་ཀྱི་གོང་འོག་ཚང་མས“དོན་ཆེན་བཞི”ལ་དམིགས་པ་དང་།“འཛུགས་གཏོད་བཞི”ལ་སེམས་ཤུགས་གཅིག་ཏུ་བསྒྲིལ་ནས“ཐམས་ཅད་ཁ་ཤར་དུ་གཏད་དེ། ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་སྣེ་ཁྲིད་དཔེ་སྟོན་གྲོང་ཁྱེར་བསྐྲུན་རྒྱུའི”དམིགས་ཚད་ལ་གཞིགས་པས། ཆབ་སྲིད་ལྷིང་འཇགས་དང་།སྤྱི་ཚོགས་བརྟན་ལྷིང་།དཔལ་འབྱོར་འཕེལ་རྒྱས།མི་རིགས་མཐུན་སྒྲིལ།ཆོས་ལུགས་ལམ་ལྷོངས།སྐྱེ་ཁམས་བཟང་བ།མི་དམངས་བདེ་སྡོད་ལས་བརྩོན་བཅས་ཀྱི་གྲུབ་འབྲས་བཟང་པོ་ཐོབ་པ་མ་ཟད།ལྗོངས་ཡོངས་དང་མཉམ་དུ་འཕེལ་རྒྱས་ཡག་ཤོས་དང་།འགྱུར་ལྡོག་ཆེ་ཤོས།མི་རིགས་ཁག་གི་མང་ཚོགས་ལ་དངོས་ཕན་ཐོབ་མང་ཤོས་བཅས་ཀྱི་ལོ་རྒྱུས་ཀྱི་དུས་སྐབས་སུ་སླེབས་ཡོད། ལོ་ཧྲིལ་པོར་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་424.86ཟིན་པའི་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད་ལ། ནུས་རྒྱུ་གཙང་མ་དང་།ཁྱད་ལྡན་རིག་གནས་ཡུལ་སྐོར། འབྱུང་འཕྲོད་བཟོ་ལས་བཅས་ཀྱི་སྤུས་ཚད་མཐོ་རུ་སོང་བ་དང་ཕན་འབྲས་ཆེ་རུ་ཕྱིན་པ།དམངས་འཚོའི“སེམས་བཞི་ལས་གཞི”དོན་འཁྱོལ་གྱི་ཕན་འབྲས་གང་ལེགས་ཐོན་པ།སྐྱེ་ཁམས་སྲུང་ཡོལ་མུ་མཐུད་བརྟན་དུ་ཕྱིན་པ།གཉིས་བཀུར་མཉམ་སྐྲུན།གཞི་རིམ་བཅོས་སྐྱོང་ཟམ་མི་ཆད་པར་གཏིང་ཟབ་ཏུ་ཕྱིན་པ།བརྟན་ལྷིང་འཆམ་མཐུན་དང་འཕེལ་རྒྱས་ལེགས་པའི་ཕུལ་བྱུང་གི་རྒྱུགས་ལན་ཕུལ་ཡོད་ཅེས་བསྟན་ཡོད།

ལུའོ་ཆིང་ཝུའུ་ཡིས་2026ལོ་ནི“ལོ་ལྔ་ཚན་བཅོ་ལྔ་པའི”འཆར་འགོད་ཀྱི་འགོ་ཚུགས་ལོ་ཞིག་ཡིན་པས་ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་དམ་ཟབ་བྱེད་པ་དང་། ཧྲུའུ་ཅི་ཝང་ཅུན་ཀྲེང་གིས་འགོ་གཙོ་གནང་བའི་རང་སྐྱོང་ལྗོངས་ཏང་ཨུད་ཀྱི་འགོ་ཁྲིད་འོག“དོན་ཆེན་བཞི”ལ་དམིགས་པ་དང་། “འཛུགས་གཏོད་བཞིར”སེམས་ཤུགས་གཅིག་ཏུ་སྒྲིལ་བ། “ཐམས་ཅད་ཁ་ཤར་ཕྱོགས་སུ་གཏད་དེ་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་སྣེ་ཁྲིད་དཔེ་སྟོན་གྲོང་ཁྱེར་བསྐྲུན་པའི”ལས་ཀའི་དམིགས་ཚད་གཏན་འཁེལ་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་བོད་ཀྱི་ལེའུ་གསར་པ་རྩོམ་པ་དང་།ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ཆབ་མདོའི་འགན་འཁྲི་ལེགས་སྒྲུབ་བྱས་ནས།ཆབ་མདོར་ལེགས་སྐྱེས་གང་ལེགས་འབུལ་དགོས་ཞེས་ནན་གསུང་གནང་བ་རེད།

ལྷན་འཛོམས་རྟེན་འབྲེལ་ཚོགས་འདུའི་ཐོག རིག་རྩལ་ལས་དོན་པས་ལྟད་མོ་ཆེ་བའི་ལེ་ཚན་འཁྲབ་སྟོན་བྱས་ཡོད་པ་རེད།

གྲོང་ཁྱེར་གྱི་ཧྲི་རིམ་པའི་འགོ་ཁྲིད་དང་།ཆབ་མདོའི་ཡན་ལག་དམག་ཁུལ་ཁང་།དྲག་ཆས་ཉེན་རྟོག་ཆབ་མདོ་ཉིང་ལག་རུ་ཁག དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་གི་བབ་བསྟུན་ཡན་ལག་རུ་ཁག་གསུམ་པའི་འགོ་ཁྲིད་གཙོ་བོ། གྲོང་ཁྱེར་གྱི་ཀྲུང་དབྱང（ལྗོངས）ཐད་གཏོགས་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན།ལས་འཁྱུར་ངལ་གསོ་རྒྱག་མཁན་གྱི་བློ་མཐུན་རྒན་གྲས།ཁེ་ལས་ཀྱི་འཐུས་མི།མི་རིགས་ཁག་དང་ལས་རིགས་ཁག་གི་འཐུས་མི་བཅས་ལོ་གསར་ལ་བཀྲ་ཤིས་རྟེན་འབྲེལ་མཉམ་ཞུའི་ཚོགས་འདུའི་ཐོག་ཕེབས་ཞུགས་གནང་ཡོད་པ་རེད།