འདི་ག་ཚགས་པར་ཁང་དུ་གནས་ཚུལ་འབྱོར་གསལ། དཔྱིད་གསར་དུས་ཆེན་དང་བོད་ཀྱི་ལོ་གསར་འཆར་ཉེའི་མཚམས་འདིར། གྲོང་ཨུད་ཀྱི་ཧྲུའུ་ཅི་གཞོན་པ་དང་གྲོང་སྤྱི་ལུའོ་ཆིང་ཝུའུ་ཡིས་འཚམས་འདྲིའི་བྱེད་སྒོ་སྤེལ་བ་རེད། སྤྱི་བདེའི་མི་དམངས་ཉེན་རྟོག་པ་དང་ཆབ་སྡོད་དམག་དཔུང་གི་དཔོན་དམག མེ་ཟོན་རོགས་སྐྱོབ་མི་སྣ། ཁེ་ལས་ཀྱི་འཐུས་ཚབ། ལས་འཁྱུར་ངལ་གསོ་རྒྱག་མཁན། མངོན་མིན་རིག་གནས་རྒྱུན་འཛིན་པ། སློབ་ཆེན་སློབ་མའི་ལས་ཞུགས་འཐུས་ཚབ། བོད་སྨན་མཁས་དབང་སོགས་ལ་ཏང་དང་སྲིད་གཞུང་གི་ཐུགས་ཁུར་བྱམས་བརྩེ་མཚོན་བྱེད་ལོ་གསར་གྱི་འཚམས་འདྲི་ཞུས་པ་རེད།
སྤྱི་བདེའི་མི་དམངས་ཉེན་རྟོག་པ་ལ་གཟིགས་སྐོར་འཚམས་འདྲི་གནང་སྐབས། ལུའོ་ཆིང་ཝུའུ་ཡིས་ཁོང་ཚོ་དང་བྱམས་ལྡན་བརྩེ་གཟིགས་ཀྱིས་སྤེལ་རེས་ཐོག་མཇལ་དར་བསྒྲོན་པ་དང་འཚམས་འདྲིའི་དངོས་པོ་གནང་བ་རེད། ཁོང་ཚོ་ལ་ལས་རེས་རྟག་སྲུང་དང་སྐོར་གཡེང་བྱེད་ཤུགས་སྔར་བས་ཆེ་རུ་བསྐྱེད་དེ། བློ་གྲོས་ལྡན་པའི་བྱེད་ཐབས་ཐོག་ནས་འགྲིམ་འགྲུལ་འགན་ལེན་དང་དམངས་བདེའི་ཞབས་ཞུ་ལེགས་སུ་བཏང་ནས། མང་ཚོགས་ཐམས་ཅད་དགའ་དགའ་སྤྲོ་སྤྲོའི་ངང་ལོ་གསར་གཏོང་ཐུབ་པའི་འགན་ལེན་བྱ་རྒྱུའི་རེ་བ་ཡོད་ཅེས་གསུངས་པ་རེད།དམག་ཁུལ་ཁང་དང་། དྲག་ཆས་ཉེན་རྟོག་དཔུང་སྡེ། མེ་ཟོན་རོགས་སྐྱོབ་དཔུང་ཁག་བཅས་ལ་གཟིགས་སྐོར་འཚམས་འདྲི་གནང་སྐབས། ཁོང་གིས། ཚང་མ་ལ་སྤྱི་ཚོགས་ཀྱི་བརྟན་ལྷིང་སྲུང་སྐྱོང་དང་མི་དམངས་ཀྱི་བདེ་འཇགས་སྲུང་སྐྱོང་།ཉེན་སེལ་རོགས་སྐྱོབ་སོགས་ཀྱི་ལས་དོན་ཐད་ནས་ལེགས་སྐྱེས་མངོན་གསལ་ཕུལ་བར་ཁས་ལེན་གང་ལེགས་གནང་བ་དང་ཆབས་ཅིག་མི་སྣ་ཡོངས་ལ་ལས་གནས་བརྟན་སྲུང་དང་འགན་འཁྲི་གཙང་སྒྲུབ་ཀྱིས་བདེ་འཇགས་འགོག་སྲུང་གི་འཛིང་རགས་མུ་མཐུད་བརྟན་དུ་བཏང་ནས། ཆབ་མདོའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་དོན་དུ་གཡས་གཞོགས་གཡོན་འདེགས་བྱེད་དགོས་པའི་སྐུལ་ལྕག་གནང་བ་རེད།
ལས་འཁྱུར་ངལ་གསོ་རྒྱག་མཁན་ལས་བྱེད་རྒན་གྲས་ཀྱི་ཁྱིམ་དུ། ལུའོ་ཆིང་ཝུའུ་ཡིས་ལས་བྱེད་རྒན་གྲས་ཚོ་དང་སྙིང་གཏམ་ཤོད་རེས་གནང་སྐབས། གཟུགས་པོའི་གནས་ཚུལ་དང་འཚོ་བའི་གནས་ཚུལ་བཀའ་འདྲི་ཞིབ་ཕྲ་གནང་བ་དང་ཆབས་ཅིག་བསམ་འཆར་དང་གྲོས་འགོར་ནན་ཏན་གསན་པ་རེད། ཁོང་གིས། ལས་བྱེད་རྒན་གྲས་ནི་ཆབ་མདོའི་འཕེལ་རྒྱས་ཀྱི་རྩ་ཆེའི་རྒྱུ་ནོར་ཞིག་ཡིན་ལ། གྲོང་ཨུད་དང་གྲོང་ཁྱེར་སྲིད་གཞུང་གིས་སྔར་བཞིན་ལས་བྱེད་རྒན་གྲས་ལ་ཞབས་འདེགས་དང་འགན་ལེན་གྱི་ལས་དོན་ཡག་པོ་བསྒྲུབས་ནས། ཚང་མ་ཚེ་མཇུག་བདེ་ལ་འཁོད་པ་དང་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐུབ་པར་བྱ་རྒྱུ་ཡིན་ཞེས་གསུངས་པ་རེད།
ལུའོ་ཆིང་ཝུའུ་ཡིས། ད་དུང་མངོན་མིན་རིག་གནས་ཤུལ་བཞག་གི་རྒྱུན་འཛིན་པའི་འཐུས་ཚབ་དང་སློབ་ཆེན་སློབ་མའི་ལས་ཞུགས་འཐུས་ཚབ། ཁེ་ལས་ཀྱི་འཐུས་ཚབ་བཅས་ལ་གཟིགས་སྐོར་འཚམས་འདྲི་གནང་བར་མ་ཟད། ཁོང་ཚོ་དང་བྱམས་ལྡན་བརྩེ་གཟིགས་ཀྱིས་སྤེལ་རེས་གནང་བ་དང་ཆབས་ཅིག་ཁོང་ཚོར་ལོ་གསར་གྱི་སྨོན་འདུན་ཡང་ཞུས་པ་རེད།
བོད་ལུགས་གསོ་རིག་གི་མཁས་དབང་དང་བཞུགས་མོལ་གནང་སྐབས། ལུའོ་ཆིང་ཝུའུ་ཡིས་ཁོང་ཚོའི་ས་ནས་རྒྱུན་འཛིན་འཕེལ་རྒྱས་དང་སྨན་བཅོས་ཞབས་ཞུ། སྨན་བཅོས་འགན་བཅོལ་སྲིད་ཇུས་བཅས་ཀྱི་བསམ་འཆར་དང་གྲོས་འགོར་གསན་ནས། ཁོང་ཚོར་བོད་ལུགས་གསོ་རིག་དང་བོད་སྨན་བྱ་གཞག་གི་ཆེད་དུ་རང་ནུས་གང་ཡོད་འདོན་དགོས་པའི་སྐུལ་ལྕག་གནང་བ་རེད།
ལུའོ་ཆིང་ཝུའུ་ད་དུང་མ་ཐང་སྲང་ལམ་སྡེ་ཁུལ་གྱི་དམངས་ཕན་ཟ་ཁང་དུ་ཕེབས་ནས་སྔོ་ཚལ་དང་རིན་གོང་། ཁོར་ཡུག་བཅས་ཀྱི་ཐད་ནས་གཟིགས་ཞིབ་གནང་བ་དང་། ཟ་མ་ཟ་བཞིན་པའི་མང་ཚོགས་དང་བྱམས་ལྡན་བརྩེ་གཟིགས་ཀྱིས་སྤེལ་རེས་གནང་བ་དང་ཆབས་ཅིག་ཁོང་ཚོར་ལོ་གསར་གྱི་སྨོན་འདུན་ཡང་ཞུས་པ་རེད།
གྲོང་ཨུད་ཀྱི་རྒྱུན་ཨུ། གྲོང་ཨུད་ཀྱི་དྲུང་ཆེན་གྱ་ཤིན་ཡུས་ལྷན་དུ་ཕེབས་ཡོད་པ་རེད།