འདི་ག་ཚགས་པར་ཁང་དུ་གནས་ཚུལ་འབྱོར་གསལ།ཟླ་1ཚེས་20ཉིན།གྲོང་ཁྱེར་སྒྲིག་ཨུད་སྐབས་གཉིས་པའི་ཚང་འཛོམས་གྲོས་ཚོགས་ཐེངས་བདུན་པ་འཚོགས་ཤིང་།གྲོང་ཨུད་ཀྱི་ཧྲུའུ་ཅི་ཀྲོང་ཅིན་སུང་ཚོགས་འདུར་ཞུགས་ནས་གསུང་བཤད་གནང་བ་དང་།ལུའོ་ཆིང་ཝུའུ་ཚོགས་འདུར་ཞུགས་ཡོད་པ་རེད།

ཀྲོང་ཅིན་སུང་གིས།རིམ་པ་སྡེ་ཚན་ཁག་དང་རྒྱ་ཆེའི་ཏང་ཡོན་ལས་བྱེད་པས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཏང་འཛུགས་སྐྱོང་སྐོར་གྱི་དགོངས་པ་གལ་ཆེན་དང་ཏང་གི་རང་ངོས་གསར་བརྗེའི་སྐོར་གྱི་དགོངས་པ་གལ་ཆེན་སློབ་སྦྱོང་དང་ལག་བསྟར་ནན་ཏན་བྱེད་པ་དང་། ཀྲུང་དབྱང་སྒྲིག་ཨུད་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་ལྔ་པ་དང་རང་སྐྱོང་ལྗོངས་སྒྲིག་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་ལག་བསྟར་དོན་འཁྱོལ་བྱེད་པ། ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་བློ་བརྟན་འགྱུར་མེད་ངང་སྐུལ་འདེད་གཏོང་བ་བཅས་བྱས་ཏེ།“ཐབས་ཅད་ཁ་ཤར་ལ་གཏད་དེ། ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་སྣེ་ཁྲིད་དཔེ་སྟོན་གྲོང་ཁྱེར་འཛུགས་སྐྲུན”བྱ་ཆེད་ཆབ་སྲིད་དང་འཕེལ་རྒྱས་ཀྱི་ཁོར་ཡུག་བཟང་པོ་གཏོད་དགོས་ཞེས་བསྟན་ཡོད།

ཀྲོང་ཅིན་སུང་གིས། རིམ་ཁག་ཏང་རྩ་འཛུགས་དང་སྒྲིག་ཁྲིམས་ཞིབ་བཤེར་ལྟ་ཞིབ་ལས་ཁུངས་ཀྱིས་ཆབ་སྲིད་ཀྱི་ཁྲིད་སྟོན་དང་དོན་འཁྱོལ་དམ་འཛིན་བྱེད་ཤུགས་ཆེ་རུ་བཏང་སྟེ། ཏང་གི་ཆབ་སྲིད་འཛུགས་སྐྱོང་ལ་སྔར་བས་རྒྱུན་འཁྱོངས་ལྷོད་མེད་ཀྱིས་ཤུགས་སྣོན་རྒྱག་དགོས་པ་དང་། ཆབ་སྲིད་ཀྱི་ལྟ་སྐུལ་བྱེད་ཤུགས་ཆེ་རུ་བཏང་ནས་དོན་འཁྱོལ་དམ་འཛིན་གྱིས་ཏང་ཀྲུང་དབྱང་གི་ཐབས་ཇུས་དང་བཀོད་སྒྲིག་གལ་ཆེན་སྔར་བས་བློ་ཐག་རྦད་ཆོད་ཀྱིས་ལག་བསྟར་ནུས་ལྡན་བྱེད་དགོས།ལམ་ལུགས་ལག་བསྟར་བྱེད་ཤུགས་ཆེ་རུ་བཏང་ནས་དོན་འཁྱོལ་དམ་འཛིན་བྱེད་པ་དང་། སྔར་བས་ཚན་རིག་དང་མཐུན་ཞིང་ཕན་ནུས་ལྡན་པའི་སྒོ་ནས་དབང་ཆ་དེ་ཉིད་ལམ་ལུགས་ཀྱི་གཟེབ་ཏུ་འཇུག་དགོས། འཐབ་རྩོད་ཀྱི་ཆོད་སེམས་ཆེ་རུ་བཏང་ནས་དོན་འཁྱོལ་དམ་འཛིན་གྱིས་སྔར་བས་རིག་པ་དྭངས་གསལ་དང་བློ་བརྟན་འགྱུར་མེད་ཀྱི་སྒོ་ནས་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་སྐུལ་འདེད་གཏོང་དགོས་ཞེས་ནན་གསུང་གནང་ཡོད།

ཀྲོང་ཅིན་སུང་གིས། འཛེམ་མེད་དམར་འདོན་གྱི་སྙིང་སྟོབས་ཐོག་ནས་འགན་འཁྲི་ནན་པོར་བཟོས་ཏེ“ཏང་ཨུད་ཀྱིས་དམ་འཛིན་གཙོ་བོ་དང་། ཧྲུའུ་ཅིས་སྣེ་ཁྲིད། ཚན་པས་མཉམ་ལས། སྒྲིག་ཁྲིམས་ཞིབ་བཤེར་ཨུ་ལྷན་གྱིས་ལྟ་སྐུལ”བཅས་བྱེད་པའི་ཏང་དོ་དམ་དང་ཏང་བཅོས་སྐྱོང་གི་ལས་ཀའི་རྣམ་པ་ནུས་ཤུགས་ཡོད་རྒུས་འཛུགས་སྐྱོང་བྱེད་དགོས།རུས་འབྲད་དུག་སེལ་གྱི་བློ་སྟོབས་བསྐྱེད་དེ་སྤྱོད་ཚུལ་མུ་མཐུད་ལེགས་བཅོས་བྱས་ནས། གོ་གནས་གང་ཞིག་བཟུང་ན་དེའི་སྲིད་དོན་བསྒྲུབ་དགོས་ཤིང་། དངོས་སྒྲུབ་ལ་སྣང་ཆེན་གྱིས་ཕན་འབྲས་ལ་བརྩོན་དགོས། གྲི་དངོ་རང་གཏད་ཀྱི་རང་རྟོགས་ཐོག་ནས་ཉམས་སད་ཐེག་ཐུབ་པའི་དཔུང་ཁག་འཛུགས་སྐྱོང་བྱས་ཏེ་སྤྱི་ཚོགས་རིང་ལུགས་དེང་རབས་ཅན་གྱི་ཆབ་མདོ་གསར་པ་འཛུགས་སྐྲུན་བྱ་ཆེད་ལེགས་སྐྱེས་སྔར་ལས་ཆེ་བ་འབུལ་དགོས་པའི་བླང་བྱ་བཏོན་ཡོད།

ཚང་འཛོམས་གྲོས་ཚོགས་ཐེངས་དང་པོ་དེ་བརྙན་པར་ལམ་ནས་འཚོགས་ཤིང་། ཚང་འཛོམས་གྲོས་ཚོགས་ཐེངས་གཉིས་པའི་ཐོག་ཝང་ཧྲི་ཡུས་ཀྱིས་གྲོང་ཁྱེར་སྒྲིག་བཤེར་ཨུ་ལྷན་རྒྱུན་ལས་ཨུ་ལྷན་གྱི་ཚབ་ཞུས་ནས་ལས་དོན་སྙན་ཞུ་གནང་བ་དང་། གྲོང་ཁྱེར་རིམ་པའི་འགོ་ཁྲིད་བློ་མཐུན་དང་། གྲོང་ཁྱེར（ཀྲུང་དབྱང་དང་ལྗོངས）ཐད་གཏོགས་སྡེ་ཚན་དང་ཚན་པའི་ཏང་སྲིད་འགན་འཁུར་བློ་མཐུན་གཙོ་བོ་རྣམས་ཚོགས་ར་གཙོ་བོའི་ཚོགས་འདུར་ཞུགས་ཡོད་པ་རེད།