འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ་1ཚེས་19ཉིན། ཆབ་མདོ་གྲོང་ཁྱེར་གྱིས་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་ལམ་ལུགས་སྐོར་ཆེད་དོན་ཟུར་ཁྲིད་ཀྱི་སྙན་ཞུའི་ཚོགས་འདུ་འཚོགས་པ་རེད།

ཚོགས་འདུའི་ཐོག་རང་སྐྱོང་ལྗོངས་ཏང་ཨུད་ཀྱི་ཏང་གི་སློབ་གྲྭའི་ཚན་རིག་དང་སྤྱི་ཚོགས་རིང་ལུགས་སློབ་དཔྱོད་པུའི་ཀྲུའུ་རེན་དང་དགེ་རྒན་ཆེ་མོ་བ་སྟག་བུ་ཚེ་རིང་ལགས་གདན་འདྲེན་ཞུས་ནས་ཆེད་དོན་ཟུར་ཁྲིད་གནང་བ་རེད། སྟག་བུ་ཚེ་རིང་ལགས་ཀྱིས་སྤྲུལ་སྐུའི་ཡང་སྲིད་ངོས་འཛིན་ལམ་ལུགས་ཀྱི་ལོ་རྒྱུས་ཀྱི་ཁུངས་དང་འཕེལ་རིམ་སོགས་ཀྱི་ཐད་ནས་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་ལམ་ལུགས་ཀྱི་ནང་དོན་ཞིབ་ཅིང་ཕྲ་ལ་ཆད་ལྷག་མེད་པའི་སྒོ་ནས་འགྲེལ་བཤད་གནང་བ་རེད།

ཚོགས་འདུའི་ཐོག་རིམ་པ་སྡེ་ཚན་ཁག་གིས“དམར་མདངས་ཆབ་མདོ། དར་རྒྱས་ཡར་བརྩོན”གྱི་བྱེད་སྒོ་གཞི་རྟེན་དུ་བྱས་ནས། “འདུ་ཤེས་གསུམ”གྱི་དྲིལ་བསྒྲགས་སློབ་གསོ་དང་ཟུང་འབྲེལ་གྱིས་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་གྱི་འབྲེལ་ཡོད་དོ་དམ་བྱ་ཐབས་དང་སྒྲོག་འགྲེལ་གནད་བསྡུས་རྣམས་ཏང་གི་ཆོས་ལུགས་ལས་དོན་གྱི་སྲིད་ཇུས་དང་བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན་སོགས་དང་ཟུང་འབྲེལ་བྱས་ཏེ། ཆེད་དོན་སྒྲོག་འགྲེལ་གྱི་དོན་སྙིང་ལ་གོ་བ་ལེན་དགོས་ཤིང་། ཀྲུང་དབྱང་སྲིད་གཞུང་གི་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་ཐད་ཐག་གཅོད་པའི་དབང་ཆ་དང་། འབྲེལ་ཡོད་བཅའ་ཁྲིམས་ཁྲིམས་སྲོལ།ལོ་རྒྱུས་ཀྱི་གཏན་འཁེལ་སྒྲིག་སྲོལ་སོགས་ལས་བྱེད་པ་དང་མང་ཚོགས་ལ་གསལ་བཤད་བྱས་ནས་ཀྲུང་དབྱང་གི་དབང་གྲགས་ལ་སྲུང་སྐྱོང་བྱེད་དགོས། རིམ་ཁག་དྲིལ་བསྒྲགས་དང་འཐབ་ཕྱོགས་གཅིག་གྱུར་སོགས་སྡེ་ཚན་དང་ཚན་པ་ཁག་གིས་ད་ཐེངས་ཀྱི་སྒྲོག་འགྲེལ་སྙན་ཞུའི་ཚོགས་འདུ་གོ་སྐབས་སུ་བཟུང་སྟེ། ཁོངས་གཏོགས་དེ་གའི་སྒྲོག་འགྲེལ་ལས་དོན་བཀོད་སྒྲིག་ཡག་པོར་བྱས་ནས་འཆད་ཁྲིད་ཚོགས་པའི་ཆེད་དོན་སློབ་སྦྱོང་དང་བགྲོ་གླེང་སྒྲིག་འཛུགས་བྱེད་དགོས།རིམ་ཁག་སྒྲོག་འགྲེལ་པས་གནད་བསྡུས་གཞིར་བཟུང་། ཁྱོན་ཡོངས་ནས་གནད་འཕིགས་ཞིབ་ཚགས་ངང་སྒྲོག་འགྲེལ་བྱེད་པ་དང་།བོད་ཀྱི་འཕེལ་རྒྱས་གྲུབ་འབྲས་དང་མང་ཚོགས་ཀྱི་བསམ་བློ་གཏོང་ཕྱོགས་ལ་དམ་པོར་དམིགས་ཏེ་སྒྲོག་འགྲེལ་ཏན་ཏིག་ངང་དོན་འཁྱོལ་ཐུབ་པའི་འགན་ལེན་བྱེད་དགོས་ཞེས་ནན་གསུང་གནང་ཡོད།

ཚོགས་འདུའི་ཐོག་གྲོང་ཨུད་འཐབ་ཕྱོགས་གཅིག་གྱུར་པུའི་འབྲེལ་ཡོད་འགོ་ཁྲིད་ཀྱིས་དཔེ་སྟོན་སྒྲོག་འགྲེལ་གནང་བ་རེད།

སྙན་ཞུའི་ཚོགས་འདུ་དེ་བརྙན་ལམ་ཚོགས་འདུའི་རྣམ་པའི་ཐོག་ནས་འཚོགས་པ་དང་། གྲོང་ཁྱེར(ཀྲུང་དབྱང་དང་ལྗོངས)ཐད་གཏོགས་ཚན་པ་ཁག་གི་ལས་བྱེད་ལས་བཟོ་དང་།གྲོང་ཨུད་འཆད་ཁྲིད་ཚོགས་པའི་ཁོངས་མི།དེ་བཞིན་ཁ་རུབ་ཆུས་ཨུད་དྲིལ་བསྒྲགས་པུའུ་དང་ཁ་རུབ་ཆུས་འཆད་ཁྲིད་ཚོགས་པའི་ཁོངས་མི་བཅས་ཚོགས་ར་གཙོ་བོའི་ཚོགས་འདུར་ཞུགས་ཡོད་པ་རེད།