འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཉེ་ཆར། སྨར་ཁམས་རྫོང་གི“མཁོ་འཚོང་ཚོང་འདུས་ཆེན་མོའི”ལོ་གསར་མཁོ་ཆས་དུས་ཆེན་སྐབས་དང་པོ་དེ་པི་ཝང་ཐང་ཆེན་དུ་མཇུག་འགྲིལ་ཞིང་།ད་ཐེངས་ཀྱི་བྱེད་སྒོས“དམངས་ཕན་ཐོན་རྫས་སྣ་ཚོགས་མཁོ་འཚོང་ཡོད། ལོ་གསར་མཁོ་ཆས་ཉོ་སྒྲུབ་གནང་བར་ཕེབས”ཞེས་པ་བརྗོད་དོན་གཙོ་བོར་བྱས་ཏེ་2025ལོའི་ཟླ་12ཚེས་30ཉིན་འགོ་ཚུགས་པ་ནས་2026ལོའི་ཟླ་1ཚེས་15ཉིན་མཇུག་བསྒྲིལ་རྒྱུ་ཡིན་ཞིང་། མང་ཚོགས་ལ་ལོ་གསར་གོང་གི་ཉོ་སྒྲུབ་སྟེགས་བུ་ཞིག་བསྐྲུན་པ་མ་ཟད།ད་དུང་ས་གནས་དེ་གའི་ཐོན་ལས་འཕེལ་རྒྱས་ལ་སྐུལ་འདེད་ནུས་ལྡན་བཏང་ནས་དུས་ཆེན་གྱི་རྣམ་པ་ཟབ་མོ་ཞིག་བཏོད་ཡོད།

ཤེས་རྟོགས་བྱུང་བར་གཞིགས་ན།ད་ཐེངས་ཀྱི་བྱེད་སྒོ་དེ་སྨར་ཁམས་རྫོང་དཔལ་འབྱོར་ཆ་འཕྲིན་དང་ཚོང་དོན་ཅུད(མཁོ་འཚོང་ཁང)ཀྱིས་སྣེ་ཁྲིད་དེ་གྲོང་ཁྱེར་དོ་དམ་དང་རིག་གནས་ཡུལ་སྐོར་སོགས་སྡེ་ཚན་མང་པོ་དང་མཉམ་དུ་སྤེལ་ཞིང་། རྫོང་ཕྱི་ནང་གི་ཚོང་དུད་40ལྷག་ཙམ་དེའི་ནང་ཞུགས་རྒྱུའི་ཡིད་དབང་བཀུག་པ་དང་ཚོང་ཟོག་ནང་ས་གནས་དེ་གའི་ཞིང་ལས་ཐོན་རྫས་དང་། ཁྱད་ལྡན་ཞིམ་ཟས། དམངས་སྲོལ་རིག་གནས་གསར་གཏོད་སོགས་ཁྱབ་ཁོངས་མང་པོའི་ཐོན་རྫས་ཚུད་ཡོད་པ་རེད།བྱེད་སྒོ་སྤེལ་ཡུལ་དུ་ཚྭ་ཁ་ལྷོའི་རྒུན་ཆང་དང་། ཟུར་སྡེ་ཤོད་ཀྱི་སུར་པན། བོད་ཕག་གི་ཤ ཚགས་ཤ་སྐམ་པོ། ནས་ཀྱི་བག་ལེབ་སོགས་རྫོང་ཡོངས་ཀྱི་ཤང་དང་གྲོང་རྡལ་16གི་ཁྱད་ལྡན་ལོ་གསར་མཁོ་ཆས་གཅིག་སྡུད་ཐོག་འགྲེམས་འཚོང་བྱས་པ་ལས་སྨར་ཁམས་ཀྱི་ཁྱད་ཆོས་མངོན་ཡོད།དེ་དང་ཆབས་ཅིག་ད་དུང་ཁྲེང་ཏུའུ་ཡི་སྐྱུར་ཚོད་རྒྱ་ཐུག་དང་ཤ་བག་ལེབ་སོགས་ས་གནས་གཞན་གྱི་ཞིམ་ཟས་ནང་འདྲེན་བྱས་ནས་མང་ཚོགས་ཀྱི་དགོས་མཁོ་སྣ་ཚོགས་བསྐངས་ཡོད་པ་རེད།

“མཁོ་འཚོང་དམངས་ཕན”གྱི་ཐོག་མའི་བསམ་འདུན་རྒྱུན་འཁྱོངས་བྱས་ཏེ་ད་ཐེངས་ཀྱི་ལོ་གསར་མཁོ་ཆས་དུས་ཆེན་ལ“དྲ་ཐོག་དང་དྲ་ཕྱི་ཟུང་འབྲེལ་བྱེད་པའི་”མཉམ་འགུལ་བྱེད་སྟངས་སྤྱད་དེ་མང་ཚོགས་ཀྱིས་སྨར་ཁམས་ཀྱི་ཡུལ་ཟོག་དག་མ་ཉོ་རྒྱུར་སྟབས་བདེ་བསྐྲུན་པ་མ་ཟད།ས་གནས་དེ་གའི་ཞིང་དུད་དང་ཚོང་དུད་ལ་ཕྱིར་འཚོང་ཐབས་ལམ་རྒྱ་ཆེར་བཏང་ཡོད། ཤེས་རྟོགས་བྱུང་བར་གཞིགས་ན།ད་ཐེངས་ཀྱི་ལོ་གསར་མཁོ་ཆས་དུས་ཆེན་ལ་མི་ཐེངས་5000ཙམ་ཞུགས་པ་དང་སིལ་འཚོང་བསྡོམས་འབོར་སྒོར་ཁྲི་50ཟིན་ནས་འཛད་སྤྱོད་རིམ་སྤོར་དང་གྲོང་གསེབ་དར་རྒྱས་ལ་སྐུལ་མ་ནུས་ལྡན་ཐེབས་ཡོད་པ་རེད།