མ་འཇོག་ལུགས་མཐུན་ངང་འཕར་བ་མཐའ་འཁྱོངས་བྱེད་པ་དང་མ་འཇོག་གི་ཕན་འབྲས་ཆེ་རུ་གཏོང་དགོས། སྲིད་གཞུང་གི་མ་འཇོག་གྲུབ་ཚུལ་ལེགས་སྒྱུར་དང་། དམངས་འཚོའི་རིགས་ལ་སྲིད་གཞུང་གིས་མ་དངུལ་འཇོག་པའི་བསྡུར་ཚད་མཐོ་རུ་གཏོང་བ། རྒྱལ་ཁབ་ཀྱི་གནད་ཆེན་འཐབ་ཇུས་ལག་བསྟར་དང་གཙོ་གནད་ཁྱབ་ཁོངས་ཀྱི་བདེ་འཇགས་ནུས་པའི་ལས་གཞི་འཛུགས་སྐྲུན་ལ་སྤུས་ཚད་མཐོ་བའི་སྒོ་ནས་སྐུལ་འདེད་གཏོང་བ་བཅས་བྱེད་དགོས། མི་འབོར་གྲུབ་ཚུལ་གྱི་འགྱུར་ལྡོག་དང་འཁོར་རྒྱུག་གི་འཕེལ་ཕྱོགས་དང་འཚམ་པར་བྱེད་པ་དང་། རྨང་གཞིའི་སྒྲིག་བཀོད་དང་སྤྱི་པའི་ཞབས་ཞུའི་སྒྲིག་བཀོད་ཀྱི་བཀོད་པ་འཐུས་ཚང་དུ་གཏོང་བ། མི་ཤུགས་ཐོན་ཁུངས་གསར་སྤེལ་དང་མིའི་ཕྱོགས་ཡོངས་ཀྱི་འཕེལ་རྒྱས་ལ་མ་དངུལ་འཇོག་ཤུགས་ཆེ་རུ་གཏོང་བ་བཅས་བྱེད་དགོས། སྲིད་གཞུང་གི་མ་དངུལ་འཇོག་རིགས་ཁག་གཅིག་འདོམས་ཀྱིས་བེད་སྤྱོད་ཡག་པོ་བྱེད་པ་དང་། ལས་ཀའི་རྨང་གཞི་ཅུང་ལེགས་པའི་ས་གནས་སུ་ཡོངས་འདུས་ཀྱི་སྲིད་གཞུང་གིས་མ་དངུལ་འཇོག་པའི་འཆར་གཞི་སྒྲིག་བཟོ་བྱ་རྒྱུ་འཚོལ་ཞིབ་བྱེད་དགོས། སྲིད་གཞུང་གིས་མ་དངུལ་འཇོག་པའི་བརྒྱུད་རིམ་ཧྲིལ་པོར་དོ་དམ་བྱེད་ཤུགས་ཆེ་རུ་གཏོང་དགོས། མ་འཇོག་ལ་ཞིབ་མཆན་འགོད་པའི་ལམ་ལུགས་སྒྱུར་བཅོས་ཟབ་སྤེལ་བྱས་ཏེ། ཀྲུང་དབྱང་དང་ས་གནས་ཀྱི་མ་འཇོག་ཁ་ཕྱོགས་དང་གཙོ་གནད་སྔར་བས་ཁ་གསལ་བཟོ་དགོས། འཆར་འགོད་དང་རིགས་པས་ཁུངས་སྐྱེལ་བྱེད་ཤུགས་ཆེ་རུ་གཏོང་བ་དང་། མཚོན་རྟགས་རང་བཞིན་གྱི་ལས་གྲྭའི་ལས་གཞི་གནད་ཆེན་ཁག་གཅིག་ལག་བསྟར་བྱེད་དགོས། དམངས་གཉེར་ཁེ་ལས་ལས་གཞི་གནད་ཆེན་འཛུགས་སྐྲུན་ལ་ཞུགས་པའི་ཕུགས་ཕན་ལམ་སྲོལ་འཐུས་ཚང་དུ་གཏོང་བ་དང་། སྲིད་གཞུང་གིས་མ་འཇོག་ཐེབས་རྩའི་ཁྲིད་སྟོན་དང་སྐུལ་ཁྲིད་ཀྱི་ནུས་པ་འདོན་སྤེལ་བྱེད་པ། དམངས་ཁྲོད་མ་འཇོག་གི་གསོན་ཤུགས་སྐུལ་སློང་བྱེད་པ་དང་། དམངས་ཁྲོད་མ་འཇོག་གི་བསྡུར་ཚད་མཐོ་རུ་གཏོང་བ། ཁྲོམ་རས་གཙོ་ཁྲིད་བྱེད་པའི་ནུས་ལྡན་གྱི་མ་འཇོག་འཕར་སྣོན་ཡོང་བའི་སྒུལ་ཤུགས་ཆེ་རུ་གཏོང་དགོས།

རྒྱལ་ཡོངས་གཅིག་གྱུར་གྱི་ཁྲོམ་ར་ཆེན་པོ་འཛུགས་སྐྲུན་བྱེད་པར་འགོག་རྐྱེན་བཟོ་བའི་ཐོགས་ས་འགག་ས་མཐའ་གཅིག་ཏུ་སེལ་དགོས།

ཁྲོམ་རའི་རྨང་གཞིའི་ལམ་ལུགས་དང་སྒྲིག་སྲོལ་གཅིག་གྱུར་བྱེད་པ་དང་། ཐོན་དབང་སྲུང་སྐྱོབ་དང་། ཁྲོམ་རར་ཞུགས་འཐུས། ཆ་འཕྲིན་ཁྱབ་བསྒྲགས། སྤྱི་ཚོགས་ཡིད་རྟོན། ཟླ་སྒྲིལ་བསྐྱར་སྒྲིག ཁྲོམ་ར་ཕྱིར་འཐེན་སོགས་ཀྱི་ལམ་ལུགས་འཐུས་ཚང་དུ་གཏོང་བ། བདག་རྐྱེན་འཐོབ་ལེན་དང་། ཐོབ་ཐང་ངོས་འཛིན། དམིགས་འགུག་དམིགས་འཇོག སྲིད་གཞུང་གི་ཉོ་སྒྲུབ་སོགས་ཐད་ཀྱི་འགོག་རྐྱེན་སེལ་བ། ས་གནས་སྲིད་གཞུང་གིས་དཔལ་འབྱོར་ལ་སྐུལ་སྤེལ་གཏོང་བའི་བྱ་སྤྱོད་ཚད་ལྡན་དུ་གཏོང་བ། ས་གནས་ཀྱི་སྲུང་སྐྱོབ་དང་ཁྲོམ་ར་བཅད་བཟུང་བྱེད་རིགས་མེད་པར་བཟོ་བ་བཅས་བྱེད་དགོས། “ནང་རྨུག་རྣམ་པའི”འགྲན་རྩོད་ལ་ཕྱོགས་བསྡུས་བཅོས་སྒྲིག་བྱེད་དགོས། ཁྲོམ་རའི་ལྟ་སྐུལ་དོ་དམ་གྱི་ཁྲིམས་བསྟར་གཅིག་གྱུར་བྱེད་པ་དང་། སྤུས་ཚད་ལ་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ། སྲིད་འཛིན་ཁྲུན་གཅོད་དབང་ཆའི་ཚད་གཞིའི་ལམ་ལུགས་འཐུས་ཚང་དུ་གཏོང་བ། སྒེར་སྡེམ་ལ་ངོ་རྒོལ་དང་ཚུལ་མིན་འགྲན་རྩོད་ལ་ངོ་རྒོལ་བྱེད་པའི་ཁྲིམས་བསྟར་ཁྲིམས་འཛིན་ལ་ཤུགས་རྒྱག་པ་བཅས་བྱས་ཏེ། སྤུས་ལེཌ་གོང་བཟང་དང་འགྲན་རྩོད་བཟང་པོའི་ཁྲོམ་རའི་སྒྲིག་ལམ་ཆགས་པར་བྱེད་དགོས། གཞི་གཅིག་འབྲེལ་མཐུད་ཀྱི་འཁོར་རྒྱུག་སྒྲིག་སྲོལ་དང་ཚད་གཞི་ཆ་ཚང་དུ་གཏོང་བ་དང་། ཚད་གཞི་མཐོ་བའི་སྒོ་ནས་ཁྲོམ་རའི་སྒྲིག་བཀོད་འབྲེལ་མཐུད་བྱས་ཏེ། སྤྱི་ཚོགས་ཡོངས་ཀྱི་དངོས་ཟོག་སྐྱེལ་འདྲེན་གྱི་མ་གནས་དམའ་རུ་གཏོང་དགོས། གཅིག་གྱུར་གྱི་ཁྲོམ་ར་ཆེན་པོ་འཛུགས་སྐྲུན་བྱེད་པར་ཕན་པའི་བསྡོམས་རྩིས་དང་། ནོར་ཁྲལ། དཔྱད་ཞིབ་བཅས་ཀྱི་ལམ་ལུགས་འཐུས་ཚང་དུ་གཏོང་བ་དང་། ཁེ་ལས་ཀྱི་སྤྱི་ཁྱབ་པུའུ་དང་ཡན་ལག་སྒྲིག་གཞི། ཐོན་སྐྱེད་བྱེད་ས་དང་འཛད་སྤྱོད་བྱེད་ས་བཅས་ཀྱི་ཁེ་ཕན་མཉམ་སྤྱོད་ལེགས་སྒྱུར་བྱེད་དགོས།

ས་ཁོངས་འཕེལ་རྒྱས་ཀྱི་མཐུན་སྦྱོར་རང་བཞིན་ཆེ་རུ་གཏོང་དགོས།

ནུབ་རྒྱུད་གསར་སྤེལ་ཆེན་པོར་རྣམ་པ་གསར་པ་ཆགས་པ་དང་། བྱང་ཤར་ཕྱོགས་ཡོངས་ནས་དར་རྒྱས་གཏོང་བར་ཐོད་བརྒལ་གསར་པ་ཡོང་བ། དབུས་རྒྱུད་ས་ཁུལ་དར་རྒྱས་མགྱོགས་པོ་ཡོང་བ། ཤར་རྒྱུད་ས་ཁུལ་གྱིས་དེང་རབས་ཅན་ལ་སྐུལ་འདེད་གང་མགྱོགས་གཏོང་བ་བཅས་ལ་སྐུལ་འདེད་ཏན་ཏིག་བཏང་ནས། ཤར་དབུས་ནུབ་གསུམ་དང་ལྷོ་བྱང་ཕྱོགས་གཉིས་མཐུན་སྦྱོར་ངང་འཕེལ་རྒྱས་ཡོང་བར་སྐུལ་སྤེལ་གཏོང་དགོས། པེ་ཅིང་དང་། ཐེན་ཅིང་། ཧོ་པེ་གསུམ་དང་། འབྲི་ཆུའི་ཟུར་གསུམ་གླིང་། གཡོད་ཀང་ཨའོ་ཁུག་ཆེན་ཁུལ་བཅས་སྤུས་ཚད་མཐོ་བའི་འཕེལ་རྒྱས་ཀྱི་སྒུལ་ཤུགས་འབྱུང་ཁུངས་ཀྱི་ནུས་པ་སྲ་བརྟན་དང་མཐོར་འདེགས་གཏོང་དགོས། འབྲི་ཆུའི་དཔལ་འབྱོར་རྒྱུད་འཕེལ་རྒྱས་དང་། རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་རྒྱུན་མཐུད་ངང་སྐུལ་འདེད་གཏོང་དགོས། ཞུང་ཨན་ཁུལ་གསར་དེང་རབས་ཅན་གྱི་གྲོང་ཁྱེར་དུ་འཛུགས་སྐྲུན་བྱེད་པར་ཚད་གཞི་མཐོ་བ་དང་སྤུས་ཚད་མཐོ་བའི་སྒོ་ནས་སྐུལ་འདེད་གཏོང་བ་དང་། ཁྲེང་ཏུའུ་དང་ཁྲུང་ཆིང་ས་ཁུལ་གྱི་གྲོང་ཁྱེར་གཉིས་ཀྱི་དཔལ་འབྱོར་ཁུལ་འཕེལ་རྒྱས་ཀྱི་ནུས་རིམ་མཐོར་འདེགས་གཏོང་དགོས། ས་གནས་ཁག་གིས་བལྟོས་བཅས་ཀྱི་དགེ་མཚན་འདོན་སྤེལ་དང་སོ་སོའི་ཁྱད་ཆོས་མངོན་པར་བསྔགས་སྐུལ་བྱེད་པ་དང་། དཔལ་འབྱོར་ཞིང་ཆེན་ཆེ་གྲས་ཀྱིས་འགན་གཙོ་བོ་འཁུར་བར་རྒྱབ་སྐྱོར་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་ཁྲོད་མདུན་གྲལ་དུ་སྐྱོད་པ་དང་མིག་དཔེ་སྟོན་དགོས། ཁྱད་ཡོད་ཅན་གྱི་སྲིད་ཇུས་ཀྱི་རྒྱབ་སྐྱོར་བྱེད་ཤུགས་ཆེ་རུ་བཏང་ནས་གསར་བརྗེའི་གནས་རྙིང་ཁུལ་དང་། མི་རིགས་ས་ཁུལ། མཐའ་མཚམས་ས་ཁུལ་སོཌ་དར་རྒྱས་གོང་འཕེལ་ཡོང་བར་སྐུལ་སྤེལ་གཏོང་དགོས།