འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ6པའི་ཚེས19ཉིན། གྲོང་ཨུད་ཀྱི་ཧྲུའུ་ཅི་ཀྲོང་ཅིན་སུང་གིས་རྒྱལ་ཁབ་གློག་དྲ་བོད་ལྗོངས་གློག་ཤུགས་ཀུང་ཟིའི་ཏང་ཨུད་ཧྲུའུ་ཅི་དང་ཏུང་ཧྲི་ཀྲང་ཀུང་ཏུང་ཁྲང་དང་བཅས་པར་བཞུགས་མོལ་གནང་བ་རེད།

ཀྲོང་ཅིན་སུང་གིས་ཀུང་ཏུང་ཁྲང་དང་བཅས་པར་དགའ་བསུ་ཞུས་པ་དང་། རྒྱལ་ཁབ་གློག་དྲ་བོད་ལྗོངས་གློག་ཤུགས་ཀུང་ཟི་ཡིས་དུས་ཡུན་རིང་པོའི་ནང་ཐུགས་ཁུར་དང་རྒྱབ་སྐྱོར་བྱས་པར་ཐུགས་རྗེ་ཆེ་ཞུས་པ་རེད། ཁོང་གིས་རྒྱལ་ཁབ་གློག་དྲ་བོད་ལྗོངས་གློག་ཤུགས་ཀུང་ཟི་ཡིས་ཆབ་སྲིད་ཀྱི་རང་རྟོགས་དང་འགན་འཁྲི་འཁུར་སེམས་མཐོན་པོའི་ཐོག་ནས་གློག་དྲ་འཛུགས་སྐྲུན་དང་།

དམངས་འཚོར་འགན་སྲུང་དང་ལེགས་གཏོང་སོགས་ཀྱི་ཐད་ཆབ་མདོར་ཐུགས་ཁུར་དང་རོགས་རམ་བྱས་ཏེ། ཆབ་མདོའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་འགྲོ་བར་ལེགས་སྐྱེས་མི་དམན་པ་ཕུལ་ཡོད། རྒྱལ་ཁབ་གློག་དྲ་བོད་ལྗོངས་གློག་ཤུགས་ཀུང་ཟི་ཡིས་སྔོན་མ་ནང་བཞིན་ཆབ་མདོའི་ལས་དོན་ལ་རྒྱབ་སྐྱོར་གནང་བའི་ཁར། ནུས་རྒྱུ་གཙང་མ་འདོན་སྤྱོད་ལ་ཧུར་ཐག་ཞབས་འདེགས་ཞུ་བ་དང་ནུས་རྒྱུ་གཙང་མའི་ཕྱིར་སྐྱེལ་བགྲོད་ལམ་འཛུགས་སྐྲུན་ནང་ཞུགས་པ། མཉམ་འབྲེལ་སྒོས་ཚན་རིག་ཞིབ་འཇུག་ལྟེ་གནས་འཛུགས་རྒྱུར་འཚོལ་ཞིབ་བྱེད་པ། གློག་ཤུགས་ཤེས་ལྡན་མི་སྣའི་གསབ་སྦྱོང་ལྟེ་གནས་མཉམ་སྐྲུན་བྱེད་པ་བཅས་བྱས་ཏེ། ཆབ་མདོའི་གློག་ཤུགས་བྱ་གཞག་ལ་ས་གནས་ཀྱི་ཤེས་ལྡན་པ་གསོ་སྐྱོང་རྒྱུའི་རེ་བ་ཡོད། ཆབ་མདོས་ཞབས་ཞུའི་འགན་སྲུང་སྔར་བས་ཆེ་རུ་བཏང་ནས་ཁེ་ལས་ཆབ་མདོར་དར་ཞིང་རྒྱས་པ་ཡོང་ཕྱིར་ཁོར་ཡུག་བཟང་པོ་ཞིག་བསྐྲུན་རྒྱུ་ཡིན་ཞེས་བསྟན།

ཀུང་ཏུང་ཁྲང་གིས་ཆབ་མདོ་གྲོང་ཨུད་དང་གྲོང་ཁྱེར་སྲིད་གཞུང་གིས་ཀུང་ཟིའི་ལས་དོན་ལ་རྒྱབ་སྐྱོར་ཤུགས་ཆེན་གནང་བར་ཐུགས་རྗེ་ཆེ་ཞུས་པ་རེད། ཁོང་གིས་རང་ངོས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་ཆབ་མདོའི་འཕེལ་རྒྱས་ཀྱི་དགོས་མཁོ་དང་མཐུད་སྦྱོར་དམ་ཟབ་བྱེད་པ་དང་། གློག་ཤུགས་མཁོ་འདོན་དང་། ནུས་རྒྱུ་གཙང་མ་འདོན་སྤྱོད། ཕྱིར་སྐྱེལ། གཙོ་གནད་ལས་གྲྭ་འཛུགས་སྐྲུན་སོགས་ཤུགས་ཆེར་གཏོང་བའི་ཐད་མཉམ་ལས་གཏིང་ཟབ་བྱས་ནས། ཆབ་མདོའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་འགྲོ་བར་སྟོབས་ཤུགས་ལེགས་སྐྱེས་སུ་འབུལ་རྒྱུའི་བསམ་པ་བསྟན།

(དཔལ་ཐར་རྒྱལ་གྱིས་བསྒྱུར)