1.སྦྲུམ་བུར་ཡང་ཤུལ་འཛིན་དབང་ཆ་ཡོད་དམ།

ལན། སྦྲུམ་བུ་བཙའ་སྐབས་ཤི་བ་ཕུད་པར་ཤུལ་འཛིན་དབང་ཆ་ཡོད།

2.མི་གང་ཞིག་དམངས་དོན་བྱ་སྤྱོད་སྤེལ་ནུས་མེད་པའི་མིའི་ཁོངས་སུ་གཏོགས་སམ།

ལན། ལོ་བརྒྱད་ལ་མ་སླེབས་པའི་ན་སོ་དར་ལ་མ་བབས་པའི་མི་དང་རང་ཉིད་ཀྱིས་བྱ་སྤྱོད་སྤེལ་བ་བླངས་དོར་ལེགས་ཉེས་དབྱེ་འབྱེད་མི་ཐུབ་པའི་ན་སོ་དར་ལ་བབས་པའི་མི་དམངས་དོན་བྱ་སྤྱོད་སྤེལ་ནུས་མེད་པའི་མིའི་ཁོངས་སུ་གཏོགས་ཀྱི་ཡོད།

3.རྩ་འཛུགས་གང་ཞིག་གིས་ཁྲིམས་ཁང་ལ་མི་ཆེ་གེ་མོ་ནི་དམངས་དོན་བྱ་སྤྱོད་སྤེལ་ནུས་མེད་པའི་མི་ཡིན་པ་གཏན་འཁེལ་བྱ་རྒྱུའི་རེ་འདུན་ཞུ་ཆོག་གམ།

ལན། གྲོང་མི་ཨུ་ཡོན་ལྷན་ཁང་དང་། ཡུལ་མི་ཨུ་ཡོན་ལྷན་ཁང་། སློབ་གྲྭ སྨན་བཅོས་སྒྲིག་གཞི། བུད་མེད་མཉམ་འབྲེལ་ལྷན་ཚོགས། དབང་པོ་སྐྱོན་ཅན་མཉམ་འབྲེལ་ལྷན་ཚོགས། ཁྲིམས་ལྟར་བཙུགས་པའི་རྒན་རྒོན་རྩ་འཛུགས། དམངས་སྲིད་སྡེ་ཚན་སོགས་ཀྱིས་ཞུ་ཆོག

4.སྒྲིག་གཞི་གང་ཞིག་ལྟ་སྐྱོང་བྱ་ཡུལ་གྱི་གནས་སྐབས་ལྟ་སྐྱོང་བར་བརྩི་ཆོག་གམ།

ལན། ལྟ་སྐྱོང་བྱ་རྒྱུ་དམིགས་འཛུགས་མ་བྱས་གོང་དུ་ལྟ་སྐྱོང་བྱ་ཡུལ་གྱི་མི་ལུས་ཀྱི་དབང་ཆ་དང་། རྒྱུ་ནོར་གྱི་དབང་ཆ། དེ་བཞིན་ཁྲིམས་མཐུན་ཁེ་དབང་གཞན་དག་བཅས་ལ་སྲུང་སྐྱོང་བྱེད་མཁན་མེད་པའི་རིགས་ལ། ལྟ་སྐྱོང་བྱ་ཡུལ་སྡོད་སའི་གྲོང་མི་ཨུ་ཡོན་ལྷན་ཁང་དང་། ཡུལ་མི་ཨུ་ཡོན་ལྷན་ཁང་། བཅའ་ཁྲིམས་ནང་གཏན་འབེབས་བྱས་པའི་འབྲེལ་ཡོད་རྩ་འཛུགས་སམ་དམངས་སྲིད་སྡེ་ཚན་བཅས་ཀྱིས་གནས་སྐབས་ལྟ་སྐྱོང་བའི་འགན་འཁུར་རྒྱུ་རེད།

5.རྒན་རྒོན་གྱིས་རང་ཉིད་ཀྱི་ལྟ་སྐྱོང་བ་འདེམས་ཆོག་གམ།

ལན། དམངས་དོན་བྱ་སྤྱོད་སྤེལ་ནུས་རྦད་དེ་ཡོད་པའི་རྒན་རྒོན་གྱིས་ཡིག་ཐོག་ནས་རང་ཉིད་ཀྱི་གཉེན་ཉེ་དང་། མི་གཞན་པའམ་རྩ་འཛུགས་དང་སྔོན་ནས་གྲོས་བསྡུར་བྱས་ཏེ་རང་ཉིད་ཀྱི་ལྟ་སྐྱོང་བ་གཏན་འཁེལ་བྱས་ཆོག རང་ཉིད་ཀྱི་དམངས་དོན་བྱ་སྤྱོད་སྤེལ་ནུས་ཤོར་བའམ་ཆ་ཤས་ཤོར་བའི་སྐབས་སུ་མི་དེས་གཏན་འཁེལ་བྱས་པའི་ལྟ་སྐྱོང་བས་ལྟ་སྐྱོང་གི་འགན་འཁྲི་འཁུར་རྒྱུ་རེད།

6.གློ་བུར་དུ་གནས་ཚུལ་ཐོན་ནས་ལྟ་སྐྱོང་བྱ་ཡུལ་ལ་ལྟ་སྐྱོང་བྱེད་མཁན་མ་བྱུང་ཚེ་ཇི་ལྟར་བྱེད་དགོས་སམ།

ལན། ལྟ་སྐྱོང་བྱ་ཡུལ་སྡོད་སའི་གྲོང་མི་ཨུ་ཡོན་ལྷན་ཁང་དང་ཡུལ་མི་ཨུ་ཡོན་ལྷན་ཁང་ངམ་དམངས་སྲིད་སྡེ་ཚན་གྱིས་ལྟ་སྐྱོང་བྱ་ཡུལ་ལ་དགོས་ངེས་ཀྱི་གནས་སྐབས་ཀྱི་འཚོ་བར་ལྟ་སྐྱོང་བྱེད་ཐབས་བཀོད་སྒྲིག་བྱེད་དགོས།

7.བཟའ་ཚང་ཁ་བྲལ་སྐབས་བུ་ཕྲུག་གསོ་སྐྱོང་བྱེད་དབང་ཐོབ་པའི་ཕྱོགས་དེས། རང་ཉིད་ཀྱི་ཕ་མར་གསོ་སྐྱོང་བྱ་རྒྱུའི་མངགས་བཅོལ་བྱས་ན་ཆོག་གམ།

ལན། བཅའ་ཁྲིམས་ནང་བྱེད་མི་ཆོག་པའི་གཏན་འབེབས་ཁ་གསལ་བྱས་མེད་པས་བྱས་ན་ཆོག

8.གར་སོང་ཆ་མེད་དུ་གྱུར་པ་ཁྱབ་བསྒྲགས་བྱས་པའི་མིར་ཆ་མཚོན་ན། དེའི་རྒྱུ་ནོར་སུས་ཚབ་བྱས་དོ་དམ་བྱ་རྒྱུ་ཡིན་ནམ།

ལན། གར་སོང་ཆ་མེད་དུ་གྱུར་པའི་མིའི་རྒྱུ་ནོར་ལ་ཆ་མཚོན་ན། དེའི་བཟའ་ཟླ་དང་། ནར་སོན་པའི་བུ་ཕྲུག ཕ་མའམ་རྒྱུ་ནོར་ཚབ་བྱས་དོ་དམ་གྱི་འགན་འཁུར་འདོད་ཡོད་པའི་མི་གཞན་བཅས་ཀྱིས་ཚབ་བྱས་དོ་དམ་བྱས་ན་ཆོག གལ་ཏེ་རྩོད་གཞི་བྱུང་ན་ཁྲིམས་ཁང་གིས་དམིགས་འཛུགས་བྱ་རྒྱུ་རེད།

9.ཁེར་རྐྱང་བཟོ་ཚོང་དུད་ཚང་གི་བུ་ལོན་སུས་འཇལ་འགན་འཁུར་རྒྱུ་ཡིན་ནམ།

ལན། ཁེར་རྐྱང་བཟོ་ཚོང་དུད་ཚང་གི་བུ་ལོན་ལ་ཆ་མཚོན་ན། མི་སྒེར་གྱིས་གཉེར་སྐྱོང་བྱས་པའི་རིགས། མི་སྒེར་གྱི་རྒྱུ་ནོར་བཏང་ནས་འཇལ་དགོས་པ་དང་། ཁྱིམ་ཚང་གིས་གཉེར་སྐྱོང་བྱས་པའི་རིགས། ཁྱིམ་ཚང་གི་རྒྱུ་ནོར་བཏང་ནས་འཇལ་དགོས་པ། གལ་ཏེ་དབྱེ་བ་འབྱེད་ཐབས་མེད་ཚེ། ཁྱིམ་ཚང་གི་རྒྱུ་ནོར་བཏང་ནས་འཇལ་དགོས།

10.ཁྲིམས་གཏན་འཁེལ་བའི་འཐུས་ཚབ་པས་ལས་འགན་ལག་བསྟར་བྱས་པ་ལས་མི་གཞན་ལ་གནོད་འཚེ་ཕོག་ན། འགན་འཁྲི་སུས་འཁུར་དགོས་སམ།

ལན། ཁྲིམས་མིས་འགན་འཁུར་རྒྱུ་རེད། གལ་ཏེ་ཁྲིམས་བཀོད་འཐུས་ཚབ་པས་དབང་ཆ་ལས་བརྒལ་ནས་གན་རྒྱ་བཞག་ན། ཕ་རོལ་གྱིས་འཐུས་ཚབ་ཀྱི་དོན་དངོས་དབང་ཚད་མ་ཤེས་པའི་གནས་ཚུལ་འོག གན་རྒྱ་དེ་ཁྲིམས་མིའི་ངོས་ནས་བརྗོད་ན་སྔར་བཞིན་ནུས་པ་ལྡན་ཡོད། དེར་བརྟེན་ཁྲིམས་བཀོད་འཐུས་ཚབ་པ་གདམ་གསེས་གདན་ཞུ་བྱ་རྒྱུ་ནི་ཧ་ཅང་གལ་ཆེན་པོ་ཞིག་རེད། སྤྱིར་ན་མ་རྐང་ཚོད་འཛིན་རྐང་བདག་གི་རང་བྱུང་མིས་འགན་འཁུར་གྱི་ཡོད།

11.ཚུལ་མིན་གྱི་ཁེ་ཐོབ་ཅེས་པ་གང་ལ་ཟེར་རམ།

ལན། བཅའ་ཁྲིམས་ཀྱི་གཞི་འཛིན་ས་མེད་པར་ཐོབ་པའི་ཁེ་སྤོགས་དེ་ཚུལ་མིན་གྱི་ཁེ་ཐོབ་ཀྱི་ཁོངས་སུ་གཏོགས་ཀྱི་ཡོད། གྱོང་གུན་ཕོག་པའི་མིར་ཚུལ་མིན་གྱི་ཁེ་ཐོབ་ཕྱིར་སློག་བྱ་རྒྱུའི་རེ་བ་འདོན་དབང་ཡོད།

12.ལས་ཚབ་དང་ལས་ཚབ་བྱ་ཡུལ་གྱི་མིས་ཞོར་འདྲུད་འགན་འཁྲི་འཁུར་བའི་སྔོན་འགྲོའི་ཆ་རྐྱེན་གང་ཡིན་ནམ།

ལན། ལས་ཚབ་ཀྱིས་ལས་ཚབ་བྱ་ཡུལ་གྱི་མིའི་བྱ་བ་ཁྲིམས་འགལ་ཡིན་པ་ཤེས་པའམ་ཡང་ན་ཤེས་དགོས་ངེས་ཡིན་ཡང་སྔར་བཞིན་ལས་ཚབ་ཀྱི་བྱེད་སྤྱོད་སྤེལ་བའི་རིགས་ཡིན།

13.ལུགས་མཐུན་འགོག་སྲུང་དེ་དགོས་ངེས་ཀྱི་ཚད་གཞི་ལས་བརྒལ་ན། དམངས་དོན་འགན་འཁྲི་འཁུར་དགོས་སམ།

ལན། དགོས་ངེས་ཀྱི་ཚད་གཞི་ལས་བརྒལ་བའི་དབང་གིས་ཕ་རོལ་ལ་དགོས་མེད་ཀྱི་གནོད་འཚེ་བཏང་བའི་རིགས། དམངས་དོན་གྱི་འགན་འཁྲི་འོས་འཚམ་འཁུར་དགོས།

14.མི་གཞན་གྱི་དམངས་དོན་ཁེ་དབང་བསྲུངས་པའི་དབང་གིས་རང་ཉིད་ལ་གནོད་འཚེ་ཕོག་པའི་རིགས། ཕན་པ་ཐོབ་མཁན་གྱིས་ཁ་གསབ་སྤྲོད་དགོས་སམ།

ལན། གལ་ཏེ་བཙན་གནོད་བྱེད་མཁན་གྱིས་དམངས་དོན་འགན་འཁྲི་ཁུར་ཚེ། ཕན་པ་ཐོབ་མཁན་གྱིས་ཁ་གསབ་འོས་འཚམ་སྤྲད་ཆོག གལ་ཏེ་ཁེ་དབང་ལ་བཙན་གནོད་བྱེད་མཁན་མེད་པ་དང་། ཁེ་དབང་ལ་བཙན་གནོད་བྱེད་མཁན་བྲོས་བྱོལ་དུ་སོང་བའམ་དམངས་དོན་འགན་འཁྲི་འཁུར་ནུས་མེད་པའི་ཐོག གནོད་འཚེ་ཕོག་མཁན་གྱིས་ཁ་གསབ་རེ་འདུན་ཞུས་པའི་རིགས། ཕན་པ་ཐོབ་མཁན་གྱིས་ཁ་གསབ་འོས་འཚམ་སྤྲོད་དགོས།

15.རང་མོས་སུ་མི་གཞན་ལ་ཛ་དྲག་རོགས་སྐྱོབ་བྱས་པ་ལས་རོགས་རམ་བྱ་ཡུལ་ལ་གནོད་སྐྱོན་ཕོག་པའི་རིགས། འགན་འཁྲི་འཁུར་དགོས་སམ།

ལན། དམངས་དོན་འགན་འཁྲི་འཁུར་དགོས་མེད།

16.ཁྲིམས་ཁང་ལ་དམངས་དོན་ཁེ་དབང་སྲུང་སྐྱོང་བྱ་རྒྱུའི་རེ་འདུན་ཞུ་བའི་གཏུག་བཤེར་གྱི་གོ་ཆོད་དུས་ཡུན་ག་ཚོད་ཡིན་ནམ།

ལན། བཅའ་ཁྲིམས་ནང་ཟུར་དུ་གཏན་འབེབས་བྱས་པ་ཕུད་ལོ་གསུམ་རེད། སྲུང་སྐྱོང་དུས་ཡུན་རིང་ཤོས་ནི་ཁེ་དབང་ལ་གནོད་འཚེ་ཕོག་པའི་ཉིན་ནས་བཟུང་ལོ་ཉི་ཤུ་རེད། དམིགས་བསལ་གྱི་གནས་ཚུལ་ཡོད་པའི་རིགས། ཁྲིམས་ཁང་གིས་དབང་ཆ་ཡོད་མཁན་གྱི་རེ་འདུན་གཞིར་བཟུང་དུས་ཡུན་རིང་དུ་གཏོང་ཆོག

17.དུས་བགོས་འཇལ་སྤྲོད་བུ་ལོན་རིགས་ཀྱི་གཏུག་བཤེར་གྱི་གོ་ཆོད་དུས་ཡུན་ག་དུས་རྩིས་དགོས་སམ།

ལན། དུས་རིམ་མཐའ་མའི་ལག་བསྟར་དུས་ཡུན་ཐིམ་པའི་ཉིན་ནས་རྩིས་དགོས།

18.ཁྲིམས་ཁང་གིས་རང་འགུལ་ངང་གཏུག་བཤེར་གྱི་གོ་ཆོད་དུས་ཡུན་ནང་དོ་བདག་གི་གཏུག་བཤེར་རེ་འདུན་སྒྲུབ་ཆོག་གམ།

ལན། མི་ཆོག

19.ཁེ་དབང་འཛིན་མཁན་གྱིས་འོས་འགན་འཁུར་མིར་ལག་བསྟར་བྱ་རྒྱུའི་རེ་འདུན་ཞུས་ན་གཏུག་བཤེར་གྱི་གོ་ཆོད་དུས་ཡུན་གྱི་མཚམས་ཆད་སྲིད་དམ།

ལན། ཆད་སྲིད།

20.གཏན་འཇགས་རྒྱུ་ནོར་གྱི་རྒྱུ་དངོས་བདག་དབང་འཛིན་མཁན་གྱིས་རྒྱུ་ནོར་ཕྱིར་སློག་རྒྱུའི་རེ་འདུན་ཞུས་པའི་རིགས་ལ་གཏུག་བཤེར་གྱི་གོ་ཆོད་དུས་ཡུན་སྤྱད་ན་འཐུས་སམ།

ལན། མི་འཐུས།

21.གསོ་རྟེན་སྤྲོད་རྒྱུའི་རེ་འདུན་ཞུ་བའི་དབང་ཆར་གཏུག་བཤེར་གྱི་གོ་ཆོད་དུས་ཡུན་སྤྱད་ན་འཐུས་སམ།

ལན། མི་འཐུས།

22.གན་རྒྱའི་ནང་དུ་ཕྱོགས་གཅིག་གིས་གཏུག་བཤེར་གྱི་གོ་ཆོད་དུས་ཡུན་གྱི་ཁེ་ཕན་འདོར་བའི་གྲོས་དན་བཞག་ཆོག་གམ།

ལན། དོ་བདག་གིས་གཏུག་བཤེར་གྱི་གོ་ཆོད་དུས་ཡུན་གྱི་ཁེ་ཕན་སྔོན་ཚུད་ནས་དོར་ན་གོ་ཆོད་ཀྱི་མེད།

23.སྔོན་བརྡའི་ཐོ་འགོད་བྱས་ན་ཕན་ཐོགས་གང་ཞིག་ཡོད་དམ།

ལན། སྔོན་བརྡའི་ཐོ་འགོད་བྱས་རྗེས་སྔོན་བརྡའི་ཐོ་འགོད་བྱེད་དབང་ཡོད་མཁན་གྱི་མོས་མཐུན་མ་ཐོབ་པར་གཏན་འཇགས་རྒྱུ་ནོར་ཐག་གཅོད་བྱས་པའི་རིགས། དངོས་རྫས་བདག་དབང་གི་ནུས་པ་ཐོན་གྱི་མེད།

24.དོ་བདག་ཨུ་ཡོན་ལྷན་ཁང་གིས་གཏན་འབེབས་བྱས་པ་དེས་ལས་སྒོའི་ཐད་ཚོད་འཛིན་ཕོག་གམ།

ལན། ཕོག་པ་ཡིན། འོན་ཀྱང་གཏན་འབེབས་དེ་ལས་དོ་བདག་གི་ཁྲིམས་མཐུན་ཁེ་དབང་ལ་གནོད་འཚེ་ཕོག་པའི་རིགས་ལ། གནོད་འཚེ་ཕོག་མཁན་དོ་བདག་གིས་ཁྲིམས་ཁང་ལ་གཏན་འབེབས་ཕྱིར་འཐེན་བྱ་རྒྱུའི་རེ་འདུན་ཞུ་ཆོག

25.བོར་དངོས་འཚོལ་བའི་རྔན་སྤྲོད་བརྡ་ཁྱབ་ཀྱི་ཁས་ལེན་ལ་གོ་ཆོད་ནུས་པ་ལྡན་ནམ།

ལན། ནུས་པ་ལྡན་པ་སྟེ། ཁེ་དབང་འཛིན་མཁན་གྱིས་རྔན་སྤྲོད་བརྡ་ཁྱབ་བཏང་སྟེ་བོར་དངོས་བཙལ་ཚེ་བོར་དངོས་ལེན་སྐབས་ཁས་བླངས་པའི་འོས་འགན་སྒྲུབ་དགོས་ཀྱི་ཡོད།

26.ས་ཞིང་འགན་གཙང་གཉེར་སྐྱོང་དབང་ཆའི་ཐད་འགན་གཙང་གཏོང་རིང་འགན་གཙང་གཏོང་མཁན་གྱིས་ས་ཞིང་ཚུར་བསྡུས་ན་འགྲིག་གམ།

ལན། མི་འགྲིག བཅའ་ཁྲིམས་ནང་གཏན་འབེབས་གཞན་དག་ཡོད་པ་ཕུད།

27.ས་ཞིང་གཉེར་སྐྱོང་དབང་ཆ་མི་གཞན་ལ་བརྒྱུད་བཤུག་བྱེད་ཆོག་གམ།

ལན། ས་ཞིང་འགན་གཙང་གཉེར་སྐྱོང་དབང་ཆ་ཡོད་མཁན་གྱིས་རང་བདག་ངང་ཁྲིམས་ལྟར་བོགས་གཏོང་དང་། མ་རྐང་ནང་ཞུགས་པའམ་ཡང་ན་བྱེད་ཐབས་གཞན་དག་བརྒྱུད་མི་གཞན་ལ་ས་ཞིང་གཉེར་སྐྱོང་དབང་ཆ་བརྒྱུད་བཤུག་བྱེད་ཆོག

28.སྡོད་ཁང་འཛུགས་སྐྲུན་གྱི་ས་ཆ་སྤྱོད་དབང་གི་དུས་ཚད་ཐིམ་རྗེས་ཇི་ལྟར་ཐག་གཅོད་བྱེད་དགོས་སམ།

ལན། རང་འགུལ་ངང་ཡུན་ཚད་རིང་དུ་གཏོང་དགོས། ཡུན་སྲིང་གི་འགྲོ་གྲོན་འཇལ་བའམ་ཡང་ན་ཆག་ཡང་དང་རྩ་ཆག་གཏོང་བར་བཅའ་ཁྲིམས་དང་སྲིད་འཛིན་ཁྲིམས་སྲོལ་གྱི་གཏན་འབེབས་ལྟར་ལག་བསྟར་བྱེད་དགོས།

29.སྡོད་གནས་དབང་ཆའི་བཅའ་ཁྲིམས་ཀྱི་གོ་ཆོད་ནུས་པ་ཇི་ལྟར་ཐོན་ནམ།

ལན། དོ་བདག་གིས་དང་ཐོག་ཡིག་ཐོག་ནས་སྡོད་གནས་དབང་ཆའི་གན་རྒྱ་འཇོག་དགོས་པ་མ་ཟད་ཐོ་འགོད་ལས་ཁུངས་ལ་སྡོད་གནས་དབང་ཆ་ཐོ་འགོད་རེ་ཞུ་བྱེད་པ་དང་སྡོད་གནས་དབང་ཆ་ཐོ་འགོད་བྱས་པའི་ཉིན་ནས་ལྡན་ཡོད།

30.སྡོད་གནས་དབང་ཆ་ཡོད་པའི་ཁང་པ་མི་གཞན་ལ་བོགས་མར་གཏོང་ཆོག་གམ།

ལན། དོ་བདག་ལ་ཁ་ཆད་གཞན་དག་ཡོད་པ་ཕུད་མི་གཞན་ལ་བོགས་མར་གཏོང་མི་ཆོག

31.ཁག་ཐེག་གན་རྒྱའི་ནང་གན་རྒྱ་གང་དག་ཚུད་ཡོད་དམ།

ལན། ཁག་ཐེག་གན་རྒྱའི་ནང་གཏའ་འཇོག་གན་རྒྱ་དང་། རྒྱུ་འཛིན་གཏའ་འཇོག་གན་རྒྱ། ཁག་ཐེག་བྱེད་ནུས་ལྡན་པའི་གན་རྒྱ་གཞན་དག་བཅས་ཚུད་ཡོད།

32.གཏའ་འཇོག་དངོས་དབང་གི་ཁྲིམས་གཏན་འཁེལ་བའི་ཁག་ཐེག་ཁྱབ་ཁོངས་གང་དག་ཡོད་དམ།

ལན། གཏའ་འཇོག་དངོས་དབང་གི་ཁག་ཐེག་ཁྱབ་ཁོངས་ནང་བུན་དབང་གཙོ་བོ་དང་དེའི་སྐྱེད་ཁ་དང་། གན་དོན་ལས་འགལ་བའི་དངུལ་ཆད། གནོད་འཚེའི་སྐྱིན་ཚབ་དངུལ། གཏན་འཇོག་རྒྱུ་ནོར་བདག་སྐྱོང་དང་གཏའ་འཇོག་བུན་དབང་གྲུབ་པའི་འགྲོ་གྲོན་བཅས་ཚུད་ཡོད།

33.ཁང་སའི་སྤྱོད་དབང་གཏའ་མར་འཇོག་ཆོག་གམ།

ལན། བཅའ་ཁྲིམས་ཀྱི་གཏན་འབེབས་ལྟར་གཏའ་མར་འཇོག་ཆོག་པ་ཕུད་ཁང་སའི་སྤྱོད་དབང་གཏའ་མར་འཇོག་མི་ཆོག

34.ཁེ་གཉེར་མིན་པའི་ཁྲིམས་མིའི་སློབ་གསོའི་སྒྲིག་བཀོད་དང་། སྨན་བཅོས་དང་འཕྲོད་བསྟེན་གྱི་སྒྲིག་བཀོད། སྤྱི་ཕན་སྒྲིག་བཀོད་གཞན་དག་བཅས་གཏའ་མར་འཇོག་ཆོག་གམ།

ལན། འཇོག་མི་ཆོག

35.ས་ཞིང་བདག་དབང་གཏའ་མར་འཇོག་ཆོག་གམ།

ལན། འཇོག་མི་ཆོག

36.སྒོ་ཐེལ་བརྒྱབ་པའི་རྒྱུ་ནོར་གཏའ་མར་འཇོག་ཆོག་གམ།

ལན། འཇོག་མི་ཆོག

37.གཏའ་མར་འཇོག་རིང་གཏའ་མ་འཇོག་མཁན་གྱིས་གཏའ་འཇོག་རྒྱུ་ནོར་བརྒྱུད་བཤུག་བཏང་ཆོག་གམ།

ལན། བཏང་ཆོག གཏའ་འཇོག་རྒྱུ་ནོར་བརྒྱུད་བཤུག་བཏང་ཡང་གཏའ་འཇོག་དབང་ཆར་ཤུགས་རྐྱེན་ཐེབས་ཀྱི་མེད།

38.གཏའ་མ་ལེན་མཁན་གྱིས་ཁྲིམས་ཁང་བརྒྱུད་མི་དགོས་པར་ཐད་ཀར་གཏའ་མ་འཇོག་མཁན་དང་རིན་གཅོག་གྲོས་མཐུན་འཇོག་ཆོག་གམ།

ལན། འཇོག་ཆོག གཏའ་འཇོག་དབང་ཆ་ཡོད་པའི་གནས་ཚུལ་ཐོན་སྐབས་གཏའ་མ་ལེན་མཁན་གྱིས་གཏའ་མ་འཇོག་མཁན་དང་གཏའ་འཇོག་རྒྱུ་ནོར་རིན་ཕབ་བམ་ཡང་ན་ཕམ་ཚོང་དང་ཚོང་སྒྱུར་བྱས་པ་ལས་ཐོབ་པའི་རིན་གོང་གིས་སྔོན་ལ་སྐྱིན་ཚབ་འཇལ་ཆོག གལ་ཏེ་གྲོས་མཐུན་དེས་བུན་བདག་གཞན་དག་གི་ཁེ་ཕན་ལ་གནོད་འཚེ་བཟོས་ཚེ་བུན་བདག་གཞན་དག་གིས་ཁྲིམས་ཁང་ལ་གྲོས་མཐུན་དེ་ཕྱིར་འཐེན་བྱེད་དགོས་པའི་རེ་བ་འདོན་ཆོག

39.གང་འདྲ་ཞིག་ལ་རྣམ་གཞག་དོན་ཚན་ཟེར་རམ།

ལན། རྣམ་གཞག་དོན་ཚན་ཞེས་པ་ནི་དོ་བདག་གིས་ཡང་ཡང་སྤྱོད་ཆེད་སྔོན་ཚུད་ནས་གཏན་འཁེལ་བྱེད་པ་དང་འབྲེལ་གན་རྒྱ་འཇོག་སྐབས་ཕ་རོལ་པོ་དང་གྲོས་མཐུན་མ་བཞག་པའི་དོན་ཚན་ལ་ཟེར། རྒྱུན་དུ་མཐོང་རྒྱུ་ཡོད་པའི་རྣམ་གཞག་གན་རྒྱ་དཔེར་ན་འགན་བཅོལ་གན་རྒྱ་དང་ཚོང་ཟོག་ཉོ་ཚོང་གན་རྒྱ་སོགས་ཡོད།

40.ཁྲིམས་གཏན་འཁེལ་བའི་འཐུས་མིས་དབང་ཚད་ལས་བརྒལ་ནས་གན་རྒྱ་བཞག་པར་ནུས་པ་ཐོན་ནམ།

ལན། བལྟོས་བཅས་ཀྱི་མིས་ཁྲིམས་གཏན་འཁེལ་བའི་མིས་དབང་ཚད་ལས་བརྒལ་ནས་གན་རྒྱ་བཞག་པ་ཤེས་པའམ་ཡང་ན་ཤེས་འོས་པ་ཕུད། གན་རྒྱ་དེར་ནུས་པ་ཐོན་པའི་ངོས་འཛིན་དགོས་པ་མ་ཟད་ཁྲིམས་མིར་ཡང་ནུས་པ་ཐོན་གྱི་ཡོད།

41.འགྱུར་རྟེན་དང་གན་དོན་ལས་འགལ་བའི་དངུལ་གཉིས་ཀའི་རེ་བ་འདོན་ཆོག་གམ།

ལན། སྤྱིར་བཏང་དུ་འདོན་མི་ཆོག་པར། གན་དོན་ལས་འགལ་བའི་དངུལ་ལམ་ཡང་ན་འགྱུར་རྟེན་དོན་ཚན་ལས་གཅིག་འདེམས་དགོས། གལ་ཏེ་དོ་བདག་གིས་འགྱུར་རྟེན་གྱི་དོན་ཚན་སྤྱོད་རྒྱུ་བདམས་རུང་། འགྱུར་རྟེན་གྱིས་ཕྱོགས་གཅིག་གི་གན་དོན་ལས་འགལ་བའི་གྱོང་གུན་གསབ་མི་ཐུབ་ཚེ་ཕ་རོལ་པོས་འགྱུར་རྟེན་གྱི་གྲངས་འབོར་ལས་བརྒལ་བའི་གྱོང་གུན་སྐྱིན་ཚབ་འཇལ་རྒྱུའི་རེ་ཞུ་འདོན་ཆོག དེར་བརྟེན་དོན་དམ་པའི་ཐོག་ནས་བཤད་ན་དེ་གཉིས་པོ་ལས་གཅིག་མ་གཏོགས་འདེམས་མི་ཆོག

ཡོང་ཁུངས། བོད་ལྗོངས་ཁྲིམས་ལུགས་ཚགས་པར་ལས།