འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ་3ཚེས་22ཉིན་ནི“འཛམ་གླིང་གི་ཆུའི་ཉིན་མོ”སྐབས་སོ་གསུམ་པ་དང་ཟླ་3ཚེས་22ཉིན་ནས་ཚེས་28ཉིན་བར་ནི“ཀྲུང་གོའི་ཆུའི་གཟའ་འཁོར”སྐབས་སོ་བརྒྱད་པ་ཡིན་པ་རེད། ཟླ་3ཚེས་22ཉིན་གྲོང་ཁྱེར་ཆུ་བེད་ཅུས་ཀྱིས“ཆུ་བེད་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ནས་རང་རྒྱལ་གྱི་ཆུའི་བདེ་འཇགས་ལ་འགན་སྲུང་བྱེད”ཅེས་པ་བརྗོད་དོན་གཙོ་བོར་བཟུང་ནས་དྲིལ་བསྒྲགས་བྱེད་སྒོ་སྤེལ་ཡོད།

ཇ་རྟའི་ཐང་ཆེན་དུ་གྲོང་ཁྱེར་ཆུ་བེད་ཅུད་ཀྱིས་ཚན་པ་བརྒྱད་དང་མཉམ་འབྲེལ་ཐོག་ནས་ཆུ་བེད་ཀྱི་གྲུབ་འབྲས་འགྲེམ་བྱང་བསྒྲིགས་པ་དང་དྲིལ་བསྒྲགས་ལག་དེབ་སྤྲད་པ། བློ་འདྲི་ས་བཙུགས་པ་བཅས་ཀྱི་ལམ་ནས་གྲོང་མི་ཚོར་ཆུ་ཡི་ཐོན་ཁུངས་ཀྱི་གནས་སྟངས་དང་ཆུ་གྲོན་ཆུང་བྱེད་ཐབས། ཆུ་ཁམས་སྲུང་སྐྱོབ་སྐོར་གྱི་སྲིད་ཇུས་བཅས་ཁྱབ་གདལ་བཏང་ཞིང་། ཡུལ་དངོས་སུ་ཡིག་ཆ10000ལྷག་དང་དྲིལ་བསྒྲགས་ཅ་དངོས5000ལྷག་སྤྲད་པས་ཆུ་ཁམས་སྲུང་སྐྱོབ་ཀྱི་རྣམ་པ་ཟབ་མོ་གཏོད་ཡོད།