འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ3པའི་ཚེས25ཉིན་གྱི་ཕྱི་དྲོར། རང་རེའི་གྲོང་ཁྱེར་གྱིས་བོད་ལ་དམངས་གཙོའི་བཅོས་སྒྱུར་བྱས་ནས་ལོ་65འཁོར་བར་དྲན་གསོ་ཞུ་བའི་སྒྲོག་འགྲེལ་སྙན་ཞུའི་ཚོགས་འདུ་འཚོགས་པ་དང་། རང་སྐྱོང་ལྗོངས་སྒྲོག་འགྲེལ་ཚོགས་པའི་ཁོངས་མི་དང་གྲོང་ཨུད་ཏང་གི་སློབ་གྲྭའི་མཐོ་རིམ་གཙོ་ཁྲིད་དགེ་རྒན་ལིས་ཞ་ཡིས་ཁ་བྱང་ལ《རླབས་ཆེན་གྱི་འཕོ་འགྱུར—བོད་ལ་དམངས་གཙོའི་བཅོས་སྒྱུར་བྱས་ནས་ལོ66འཁོར་བ》ཞེས་པའི་ཆེད་དོན་སྒྲོག་འགྲེལ་སྙན་ཞུ་གནང་བ་རེད།

གྲོང་ཨུད་ཀྱི་རྒྱུན་ཨུ་དྲིལ་བསྒྲགས་པུའུ་ཀྲང་དངོས་གྲུབ་ཟླ་བ་ཡིས་གཙོ་སྐྱོང་ཞུས་པ་མ་ཟད་གསུང་བཤད་ཀྱང་གནང་ཡོད། གྲོང་ཁྱེར་གྱི་འགོ་ཁྲིད་ཐུབ་དགའ་དང་། ཕུའུ་ཡུས་ཧུའེ། ཡང་ཝུན་ཧྲན། འཕྲིན་ལས། ཀྲང་ཧུང་ཅོན་བཅས་ཞུགས་ཡོད།

ལིས་ཞ་ཡིས་སྒྲོག་འགྲེལ་ཉམས་མྱོང་དང་བརྩེ་བ་ཟབ་མོའི་ཐོག་ནས་བོད་ཀྱི་ཆོས་སྲིད་ཟུང་འབྲེལ་གྱི་བཀས་བཀོད་རྒྱུད་འཛིན་ཞིང་བྲན་ལམ་ལུགས་ཀྱི་སྤྱི་ཚོགས་དང་། དམངས་གཙོའི་བཅོས་བསྒྱུར་བྱས་པས་བོད་ལ་སླར་ཡང་འཚོ་བ་གསར་པ་ཐོབ་པ། ད་ཆའི་བོད་འདི་ཉིད་ལོ་རྒྱུས་ཐོག་གི་འཕེལ་རྒྱས་ཡག་ཤོས་ཀྱི་དུས་སྐབས་སུ་གནས་པ། སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་པ་དང་རྒྱང་ལམ་གསར་པ་གཏོད་པ་སོགས་ཕྱོགས་བཞིའི་ཐད་ནས་རང་རེའི་གྲོང་ཁྱེར་གྱི་ལས་བྱེད་མང་ཚོགས་ལ་གསོན་ཉམས་དོད་པོའི་སྒྲོག་འགྲེལ་སྙན་ཞུ་ཞིག་གནང་ཡོད།

དངོས་གྲུབ་ཟླ་བས་གྲོང་ཁྱེར་ཡོངས་ཀྱི་རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ལས་བྱེད་པས“གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ་དང་།“འདུ་ཤེས་བཞི”ཟབ་ཏུ་གཏོང་བ།“གདེང་ཚོད་བཞི”བརྟན་དུ་གཏོང་བ།“སྲུང་སྐྱོང་གཉིས”ཐུབ་པ་བཅས་བྱས་ཏེ་བོད་ལ་དམངས་གཙོའི་བཅོས་སྒྱུར་བྱས་ནས་ལོ་ངོ66འཁོར་བར་དྲན་གསོ་ཞུ་བའི་བྱེད་སྒོ་ཁག་ཆབ་སྲིད་ཀྱི་ལས་འགན་གལ་ཆེན་ཞིག་ཏུ་བརྩིས་ནས་ད་ལྟའི་དུས་མཚམས་སུ་གཅིག་སྡུད་སྒྲོག་འགྲེལ་ཡག་པོ་བྱེད་དགོས། རང་སྐྱོང་ལྗོངས་ཏང་ཨུད་ཀྱི་ཆབ་མདོའི་ལས་དོན་གྱི“འགྱུར་བ་གསུམ”གྱི་འཐབ་ཇུས་ངེས་གནས་ལ་གཞི་ཚུགས་པ་དང་། གྲོང་ཨུད་ཀྱི་ལྟེ་བའི་ལས་དོན་ལ་དམིགས་ནས་ཆབ་མདོ་དེ་བས་དར་ཞིང་རྒྱས་པའི་ཐོག་ནས་རང་སྐྱོང་ལྗོངས་དབུ་བརྙེས་ནས་ལོ་ངོ60འཁོར་བར་བསུ་བ་ཞུ་དགོས་ཞེས་ནན་བཤད་གནང་ཡོད།

སྒྲོག་འགྲེལ་སྙན་ཞུའི་ཚོགས་འདུ་དེ་བརྙན་འཕྲིན་ཁ་པར་གྱི་ལམ་ནས་འཚོགས་པ་རེད། ཆབ་མདོར་ཚོགས་ར་གཙོ་བོ་བཙུགས་པ་དང་། རྫོང་ཆུས་དང་གྲོང་རྡལ་ཁག་ཏུ་ཡན་ལག་ཚོགས་ར་བཙུགས་ཡོད།