འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ3པའི་ཚེས18ཉིན་གྱི་སྔ་དྲོར། གྲོང་ཨུད་ཀྱི་ཧྲུའུ་ཅི་གཞོན་པ་ཧྲེ་ཀྲང་ལའོ་ཆིན་འུའུ་ཡིས་འབྲེལ་ཡོད་ཚན་པའི་འགན་འཁུར་བ་ཁྲིད་དེ་སྔ་རྗེས་སུ་ཁ་རུབ་ཆུས་དམའ་རིམ་སློབ་འབྲིང་གཉིས་པ་དང་། ཆབ་མདོ་གྲོང་ཁྱེར་མཐོ་རིམ་སློབ་འབྲིང་དྲུག་པ། མཐོ་རིམ་སློབ་འབྲིང་དང་པོ་སོགས་སུ་སོང་ནས་སློབ་ཁྲིད་སློབ་དཔྱོད་ཀྱི་སྤུས་ཚད་དང་། དགེ་རྒན་གྱི་དཔུང་ཁག་གསོ་སྐྱོང་། བྱེད་ལས་རང་བཞིན་གྱི་ཞོར་གཏོགས་སྒྲིག་བཀོད་འཛུགས་སྐྲུན་སོགས་ཀྱི་ལས་དོན་ལ་བརྟག་ཞིབ་གནང་ཡོད།

བརྟག་ཞིབ་སྐབས་ལའོ་ཆིན་འུའུ་ཡིས་འབྲེལ་ཡོད་འགན་འཁུར་བའི་གནས་ཚུལ་ངོ་སྤྲོད་བྱས་པར་ཉན་རྗེས་སློབ་གསོ་ནི་མི་རིགས་དར་རྒྱས་དང་སྤྱི་ཚོགས་ཡར་ཐོན་གྱི་རྨང་རྡོ་གལ་ཆེན་ཞིག་ཡིན་པས། སློབ་གྲྭ་ནི་སློབ་ཁྲིད་དང་མི་གསོ་སྐྱོང་བྱེད་པའི་གཡུལ་ས་གཙོ་བོ་ཡིན་པའི་ངོས་ནས་ངེས་པར་དུ་ཏང་ལ་མི་གསོ་སྐྱོང་དང་རྒྱལ་ཁབ་ལ་ཤེས་ལྡན་མི་སྣ་གསོ་སྐྱོང་བྱ་རྒྱུ་མཐའ་འཁྱོངས་བྱས་ཏེ། བསྒྱུར་བཅོས་གསར་གཏོད་ལ་བརྟེན་ནས་སློབ་གསོའི་གསོན་ཤུགས་འཕེལ་བར་བྱེད་པ་དང་། དགེ་སློབ་ཀྱི་བདེ་འཇགས་ལ་སྲུང་སྐྱོང་བྱས་ཏེ། ཏང་བློ་བདེ་བ་དང་མི་དམངས་བློ་ཡིད་ཚིམ་པའི་སློབ་གསོ་ལེགས་པར་གཉེར་དགོས། སློབ་གསོའི་བྱ་གཞག་གི་ཐོན་ཁུངས་དང་པོ་ཡིན་པའི་དགེ་རྒན་ནི་སློབ་གསོའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འགག་རྩའི་སྟོབས་ཤུགས་ཡིན་པས། སློབ་གྲྭ་ཁག་གིས་དགེ་རྒན་དཔུང་ཁག་འཛུགས་སྐྱོང་ལ་མཐོང་ཆེན་བྱེད་པ་དང་། དགེ་རྒན་གསོ་སྦྱོང་བྱེད་ཤུགས་ཆེ་རུ་གཏོང་བ། སློབ་ཁྲིད་འགྲན་སྡུར་སྤེལ་བ་བརྒྱུད་དགེ་རྒན་གྲགས་ཅན་གསོག་འཇོག་གི་མཛོད་བཙུགས་ནས་སློབ་གསོ་སློབ་ཁྲིད་ཀྱི་སྤུས་ཚད་ཏན་ཏིག་མཐོར་འདེགས་གཏོང་དགོས་ཤིང་། དགེ་རྒན་ལ་ཐུགས་ཁུར་དང་གཅེས་སྐྱོང་བྱེད་པ་དང་དགེ་རྒན་གྱི་ཐོབ་ཐང་འགན་སྲུང་དོན་འཁྱོལ་བྱས་ནས་དགེ་རྒན་ལ་བརྩི་བཀུར་དང་སློབ་གསོར་མཐོང་ཆེན་བྱེད་པའི་རྣམ་པ་བཟང་པོ་བསྐྲུན་དགོས་ཞེས་བསྟན་ཡོད།