2024ལོའི་རྒྱལ་ཡོངས་ཀྱི་དགུན་དུས་ལུས་རྩལ་འགྲན་ཚོགས་ཀྱི་ཡ་པང་གངས་ཤུད་བཀག་བརྒལ་རྗེས་འདེད་རྣམ་གྲངས་ཀྱི་གཞོན་ནུའི་འགྲན་བསྡུར་གྱི་བུད་མེད་ཚོགས་ཆུང་གི་འགྲན་རྩོད་དྲག་པོའི་ཁྲོད། བོད་ལྗོངས་ཆབ་མདོ་གྲོང་ཁྱེར་མཛོ་སྒང་རྫོང་ཝ་མདའ་གྲོང་རྡལ་ཕུ་རོང་གྲོང་ཚོ་ནས་ཡོང་བའི་ལུས་རྩལ་པ་དབྱངས་ཅན་ལྷ་མོར་ཡ་པང་གངས་ཤུད་བཀག་བརྒལ་རྗེས་འདེད་རྣམ་གྲངས་ཀྱི་གཞོན་ནུའི་འགྲན་བསྡུར་གྱི་བུད་མེད་ཚོགས་ཆུང་གི་ཨང་དང་པོ་ཐོབ་ཡོད།

2021དང་2022ལོའི་འགྲན་དུས་ཀྱི་རྒྱལ་སྤྱིའི་གངས་ཤུད་མཉམ་འབྲེལ་གྱི་ཡ་པང་གངས་ཤུད་ཀྱི་བཀག་བརྒལ་རྗེས་འདེད་འཛམ་གླིང་བུམ་པའི་ཨུ་རུ་སུ་ས་ཚིགས་ཀྱི་འགྲན་བསྡུར་ཁྲོད་ཁོ་མོ་ལ་ཨང་17པ་ཐོབ་པ་དང་འབྲེལ། པེ་ཅིང་དགུན་དུས་ཨོ་རྩལ་འགྲན་ཚོགས་ཀྱི་འགྲན་བསྡུར་ནང་ཞུགས་པའི་ཐོབ་ཐང་ཡང་རག་ཡོད། འོན་ཀྱང་འཇིག་རྟེན་གྱི་བྱ་བ་ཐབས་ཅད་སྔོན་དཔག་དཀའ་བ་ཞིག་ཡིན་སྟབས། པེ་ཅིང་དགུན་དུས་ཨོ་རྩལ་འགྲན་ཚོགས་མ་འཚོག་གོང་གི་ཡོངས་བསྒྲགས་སྦྱོང་བརྡར་ཞིག་གི་ཁྲོད་ཁོ་མོར་བསམ་ཡུལ་ལས་འདས་པར་རྨས་སྐྱོན་ཕོག་ནས་ཨོ་རྩལ་འགྲན་ཚོགས་ཀྱི་འགྲན་བསྡུར་ནང་ཞུགས་ཐུབ་མེད།

ལོ་གཉིས་ལྷག་ཙམ་སོང་རྗེས། རྒྱལ་ཡོངས་ཀྱི་དགུན་དུས་ལུས་རྩལ་འགྲན་ཚོགས་ཀྱི་ཡ་པང་གངས་ཤུད་བཀག་བརྒལ་རྗེས་འདེད་རྣམ་གྲངས་ཀྱི་གཞོན་ནུའི་འགྲན་བསྡུར་གྱི་བུད་མེད་ཚོགས་ཆུང་གི་འགྲན་རྩོད་དྲག་པོའི་ཁྲོད་ཁོང་ལ་ཨང་དང་པོ་ཐོབ་ཡོད། “གསེར་གྱི་རྟགས་མ་འདིས་སྔོན་ཆད་ང་དགུན་དུས་ཨོ་རྩལ་འགྲན་ཚོགས་སྐབས་རྨས་སྐྱོན་ཕོག་ནས་འགྲན་བསྡུར་ནང་ཞུགས་མ་ཐུབ་པའི་བློ་ཕམ་སེལ་སོང”ཞེས་དབྱངས་ཅན་ལྷ་མོས་བཤད།

དབྱངས་ཅན་ལྷ་མོ་གངས་ཤུད་ལུས་རྩལ་བྱས་ནས་ལོ་ངོ་བདུན་ལྷག་འགོར་ཟིན། དེའི་ཡར་སྔོན་དུ་ཁོ་མོ་ནི་རྐང་རྩེད་སྤོ་ལོའི་ལུས་རྩལ་པ་ཞིག་ཡིན།

2017ལོར། སྟེས་དབང་གི་གོ་སྐབས་ཤིག་ལས་ཁོ་མོ་བོད་རང་སྐྱོང་ལྗོངས་ལུས་རྩལ་ལག་རྩལ་སློབ་གྲྭའི་རྐང་རྩེད་སྤོ་ལོའི་བདམས་ཐོན་པ་ཞིག་ཏུ་གྱུར། དུས་དེ་ནས་བཟུང་ཁོ་མོ་ལུས་རྩལ་གྱི་ལམ་བུར་སྐྱོད་འགོ་ཚུགས།

དབྱངས་ཅན་ལྷ་མོས། མཛོ་སྒང་རྫོང་སློབ་ཆུང་དུ་སྐྱོད་སྐབས་ངའི་རིག་གནས་སློབ་ཚན་ཁག་གི་སྦྱངས་འབྲས་འབྲིང་ཙམ་ལས་མེད། འོན་ཀྱང་རྒྱུག་ཤར་གློད་རྒྱུར་ཧ་ཅང་དགའ་པོ་ཡོད་པས་ལུས་རྩལ་རྒན་ལགས་ཀྱིས་ངར་ཧ་ཅང་དགའ་པོ་བྱེད་ཀྱི་ཡོད། ལུས་རྩལ་པར་དངོས་སུ་འགྱུར་ཉེའི་མཚམས་སུ་ངའི་སེམས་ནང་དངངས་སྐྲག་ཆེན་པོ་སྐྱེས་བྱུང་། དེ་སྔོན་ང་ཐག་རིང་ཤོས་ཆབ་མདོ་གྲོང་ཁུལ་ལས་བསྐྱོད་མྱོང་མེད། གྲོང་མི་ཚོས་ང་ལྷ་སར་རྐང་རྩེད་སྤོ་ལོ་སྦྱོང་བར་འགྲོ་གི་ཡོད་ལུགས་ཐོས་སྐབས་ཚང་མས་ངའི་ཁྱིམ་དུ་རྟེན་འབྲེལ་ཞུ་བར་ཡོང་ནས་དཀར་གཙང་ཁ་བཏགས་གཡོགས་བྱུང”ཞེས་བཤད།

འགྲུལ་སྐྱེལ་རླངས་འཁོར་ནང་ཉིན་གཉིས་དང་མཚན་གཅིག་བསྡད་མཐར་གཞི་ནས་ལྷ་སར་འབྱོར་བ་དང་། ནམ་རྒྱུན་བརྙན་འཕྲིན་ནས་མཐོང་བའི་ཕོ་བྲང་པོ་ཏ་ལ་དངོས་སུ་མིག་ལམ་དུ་མངོན་སྐབས་སེམས་ནང་དགའ་ཚོར་ཆེན་པོ་བྱུང་། ཡུན་རིང་མ་སོང་བར་ཛ་དྲག་ཆེ་བའི་སྦྱོང་བརྡར་བྱེད་འགོ་བརྩམས་པ་ནས་བཟུང་ཁོ་མོའི་ལུས་རྩལ་པའི་འཚོ་བ་དངོས་སུ་འགོ་ཚུགས། ལོ་གཅིག་གི་རྗེས་སུ། ཁོང་ལས་རིགས་དང་རྣམ་གྲངས་བརྒལ་ནས་གདམ་ག་བྱས་པ་བརྒྱུད་ཡ་པང་གངས་ཤུད་ལུས་རྩལ་པ་ཞིག་ཏུ་གྱུར།

དེ་རྗེས་ཀྱི་ལོ་འགའི་རིང་། ཁོང་གིས་རུ་ཁག་དང་མཉམ་དུ་ཅང་སུའུ་དང་། ཅི་ལིན། ཧོ་པེ་སོགས་སུ་ཆེད་ལས་སྦྱོང་བརྡར་ལ་བསྐྱོད།

ཧྥ་རན་སེ་བ་མཱ་སེར་ནི་དབྱངས་ཅན་ལྷ་མོའི་བློ་འབྱེད་རྩལ་ཁྲིད་པ་ཡིན་ཞིང་། ཁོང་གི་མཛུབ་ཁྲིད་འོག་དབྱངས་ཅན་ལྷ་མོར་གྲུབ་འབྲས་བཟང་པོ་ཡང་ཡང་ཐོབ་ཡོད།

དབྱངས་ཅན་ལྷ་མོའི་ཕ་མ་གཉིས་ལ་བུ་ཕྲུག་བཞི་ཡོད་པ་དང་ཁོ་མོ་ཆུང་ཤོས་དེ་ཡིན་ཞིང་། མ་གཞི་ཕ་མ་གཉིས་ཀྱིས་བུ་མོའི་གྲུབ་འབྲས་ཇི་ལྟར་ལེགས་སུ་གཏོང་རོགས་བྱེད་དགོས་མིན་ཤེས་ཀྱི་མེད་མོད། འོན་ཀྱང་ཁྱིམ་དུ་ལོག་རིམ་བཞིན་ཁོང་གཉིས་ཀྱིས་དབྱངས་ཅན་ལྷ་མོར་ཞོགས་པ་སྔ་པོ་ནས་ལངས་ནས་རྒྱུག་ཤར་གློད་རྒྱུའི་ལྕག་སྐུལ་བྱེད་ཀྱི་ཡོད། “པཱ་ལགས་ཀྱིས་ང་ཞོགས་པ་སྤྱི་ལེ་8རྒྱུགས་ཚར་རྗེས་ཁོང་གི་རླངས་འཁོར་རྙིང་པས་ང་ཁྱིམ་དུ་བསུ་རྒྱུའི་ཞལ་བཞེས་གནང་བྱུང་བས། སླད་ཕྱིན་ངར་དངུལ་བྱུང་ཚེ་པཱ་ལགས་ལ་རླངས་འཁོར་ཡག་ཙམ་ཞིག་ངེས་པར་དུ་ཉོ་གི་ཡིན”ཞེས་དབྱངས་ཅན་ལྷ་མོས་བཤད།