2019ལོའི་ཟླ་བདུན་པར་ཁྲུང་ཆིང་གྲོང་ཁྱེར་གྱི་བོད་སྐྱོར་ཁག་དགུ་པའི་ལས་བྱེད་པ་ཏིའོ་ཝེ་ཆབ་མདོ་གྲོང་ཁྱེར་སྨར་ཁམས་རྫོང་དུ་ཁ་གཏད་བོད་སྐྱོར་ལས་དོན་བསྒྲུབ་པར་འོང་།

བགྲང་བྱ་3གྱི་རིང་བོད་སྐྱོར་འཆར་གཞིའི་རྩེ་རིམ་ཇུས་འགོད་ནས་ཕྱོགས་མང་པོ་ནས་བོད་སྐྱོར་མ་དངུལ་བརྩོན་ལེན་བྱེད་པའི་བར་དང་། དེ་ནས་དམངས་འཚོ་དང་འབྲེལ་བའི་བྱ་བ་ཆུང་ཙག་བསྒྲུབ་པའི་བར་ཏིའོ་ཝེ་མ་ཞུགས་པ་གཅིག་ཀྱང་མེད།

དེ་གའི་མང་ཚོགས་ཀྱིས་ཁོང་ལ“གྲོགས་པོ་བློས་ཐུབ”ཅེས་འབོད་ལ།ལས་རོགས་དང་གྲོགས་པོ་ཚོས་ཁོང་ལ“སྲོག་འབེན་ལ་འཛུག་མཁན”ཞེས་འབོད་ཀྱི་ཡོད།ཏིའོ་ཝེ་ཡིས“སྨར་ཁམས་ཀྱི་བྱ་བ་རེ་རེ་ནི་ངའི་སེམས་ཀྱི་འཕྲེང་ས་ཡིན”ཞེས་བརྗོད། ཁོང་ལོ་གསུམ་བསྟུད་མར་ཕུལ་བྱུང་གུང་ཁྲན་ཏང་ཡོན་ལ་བདམས་པ་མ་ཟད། ཆབ་མདོ་གྲོང་ཁྱེར་གྱི་བོད་སྐྱོར་ཁག་དགུ་པའི་ཕུལ་བྱུང་ལས་བྱེད་ཤེས་ལྡན་པ་དང་བོད་རང་སྐྱོང་ལྗོངས་ཀྱི་བོད་སྐྱོར་ཁག་དགུ་པའི་སྔོན་ཐོན་མི་སྒེར་ལའང་བདམས་ཡོད།

ཐབས་བརྒྱ་ཇུས་སྟོང་གིས་བྱ་བ་དངོས་བསྒྲུབས་ནས་དཀའ་ངལ་སེལ་རོགས་བྱས་པ།

སྨར་ཁམས་སུ་སླེབས་མ་ཐག་ཏིའོ་ཝེ་ཡིས་བརྟག་ཞིབ་བྱེད་སྐབས་སྨར་ཁམས་ལ་སྦྲང་ནོར་བུ་གསོ་བའི་རྨང་གཞི་ངེས་ཅན་ཡོད་ཀྱང་འཕེལ་རྒྱས་དེ་ཙམ་བྱུང་མེད་པ་ཤེས།

དེར་བརྟེན། ཏིའོ་ཝེ་ཡིས་ལས་དོན་ཚོགས་ཆུང་གི་སྣེ་ཁྲིད་དེ་ཕྱོགས་གཅིག་ནས་སྦྲང་ནོར་བུ་གསོ་མཁན་དུད་ཆེན་དང་ཁ་ཐོར་དུ་གསོ་མཁན་སར་བསྐྱོད་པ་དང་། ཕྱོགས་གཞན་ཞིག་ནས་རྒྱལ་ཡོངས་ས་གནས་ཁག་གི་སྦྲང་ནོར་བུ་གསོ་མཁན་རིགས་གཅིག་མཁས་ཅན་སར་བློ་འདྲི་བྱེད་པར་བསྐྱོད་དེ་མཐར་ལས་དོན་ཚོགས་ཆུང་གིས་སྦྲང་ནོར་བུ་སྣེ་ཁ་གསར་པ་ནང་འདྲེན་བྱེད་རྒྱུའི་སེམས་ཐག་བཅད།

ཐོག་མར་སྦྲང་ནོར་བུ་གསོ་མཁན་གྱིས་སྣེ་ཁ་གསར་པ་ཉེན་ཁ་ཆེ་ཚུལ་བཤད་ནས་ཚོད་ལྟ་བྱེད་འདོད་བྱེད་ཀྱི་མེད།

ཏིའོ་ཝེ་ཡིས་སྦྲང་ནོར་བུ་གསོ་མཁན་དུད་ཁྱིམ་མི་རེ་ངོ་རེའི་སར་བསྐྱོད་དེ་ལས་ཀ་བསྒྲུབས་པ་མ་ཟད། རྟོག་ཞིབ་ཚོགས་པ་སྒྲིག་འཛུགས་བྱས་ནས་ཡུན་ནན་གྱི་སེམས་ཀྱི་ཉི་ཟླར་ལྟ་སྐོར་སློབ་སྦྱོང་ལ་བསྐྱོད་ཅིང་། རྟོག་ཞིབ་བྱེད་རིང་། སྦྲང་ནོར་བུ་གསོ་མཁན་གྱིས་ཀྲུང་ཧྭའི་སྦྲང་ནོར་བུར་ཕྱིར་འཚོ་ཐབས་བྱེད་ནུས་ཧ་ཅང་ཆེ་བས། ས་བབ་མཐོ་ཚད་སྨི་3000ཡན་གྱི་སར་འཚོ་ཐུབ་པ་མ་ཟད། དེ་ལས་བྱུང་བའི་སྦྲང་རྩི་སྤུས་ཀ་དག་ཅིང་ཐོན་ཚད་མཐོ་བས་རིན་གོང་ཡང་རྒྱུན་གཏན་གྱི་སྦྲང་རྩིའི་ལྡབ་གཉིས་ནས་གསུམ་བར་ཡིན་པ་ཤེས་རྗེས། ཚང་མའི་སེམས་ལ་གཡོ་འགུལ་ཐེབས་ཤིང་། དེ་འཕྲལ་ལས་དོན་ཚོགས་ཆུང་གིས་མ་དངུལ་སྒོར་ཁྲི་200ལྷག་ཙམ་གྲབས་གསོག་གིས་ཀྲུང་ཧྭའི་སྦྲང་ནོར་བུ་ལྕགས་ཀྲིན་3000ལྷག་ཙམ་ནང་འདྲེན་བྱས་ནས་ཡུལ་མིར་བགོས་པ་དང་། སྦྲང་ནོར་བུ་གསོ་མཁན་རིགས་གཅིག་མཁས་ཅན་སྒྲིག་འཛུགས་ཐེངས་མང་བྱས་ཏེ་སྦྲང་ནོར་བུ་གསོ་བའི་ལག་རྩལ་དམར་ཁྲིད་བྱས་པར་བརྟེན་སྨར་ཁམས་ཀྱི་སྦྲང་ནོར་བུ་གསོ་བའི་ལས་རིགས་མྱུར་དུ་འཕེལ་རྒྱས་ཕྱིན་ཞིང་། མིག་སྔའི་བར། སྨར་ཁམས་ཀྱི་སྦྲང་རྩི་དེ་སྔོན་ལོར་རྒྱ་མ་ཁྲི་10ནས་ད་ཆའི་རྒྱ་མ་ཁྲི་30ཡས་མས་བར་འཕར་ཏེ་སྦྲང་ནོར་བུ་གསོ་མཁན་1100ལ་སྣེ་ཁྲིད་ཐུབ་ནས་ཆ་སྙོམས་ཡོང་འབབ་སྒོར་ཁྲི་2ཙམ་བྱུང་ཡོད།

2020ལོར་སྨར་ཁམས་རྫོང་བོད་ཤར་ཞིང་ལས་ཚན་རྩལ་གསར་སྤེལ་ཚད་ཡོད་ཀུང་སིའི་བོད་ཕག་2000ལྷག་ཙམ་འཚོང་མ་ཐུབ་པར་ལུས་ཡོད། ཀུང་སིའི་འགན་འཁུར་བས་ལས་དོན་ཚོགས་ཆུང་བཙལ་ནས་རོགས་པ་བྱེད་རོགས་ཞུས་ཤིང་། ཏིའོ་ཝེ་ཡིས་ཕྱོགས་གཅིག་ནས་ས་གནས་ཀྱི་སློབ་གྲྭ་དང་ལས་ཁུངས་ཀྱི་ཟ་ཁང་གིས་ཉོ་བར་འབྲེལ་བ་བྱས་པ་དང་། ཕྱོགས་གཞན་ཞིག་ནས་ཁྲུང་ཆིང་དང་ཧྥུའུ་ཅན་གྱི་བོད་སྐྱོར་ལས་དོན་རུ་ཁག་ལ་འབྲེལ་གཏུག་མཐུན་སྦྱོར་བྱས་མཐར་ཀུང་སི་དེའི་བོད་ཕག་ཧྥུའུ་ཅན་ཁྲོམ་རར་འཚོང་རྒྱུར་རོགས་རམ་ཐུབ་ཡོད།

བོད་སྐྱོར་ལོ་གསུམ་རིང་། འདི་དང་དེ་འདྲ་བའི་ལས་དོན་མང་པོ་ཞིག་བསྒྲུབས་ཡོད་པ་རེད།

རྣམ་གྲངས་འཛུགས་སྐྲུན་ལ་དམ་འཛིན་བྱས་ནས་འཕེལ་རྒྱས་ལ་སྐུལ་འདེད་བཏང་བ།

སྨར་ཁམས་རྫོང་གི་ཁ་སྨད་གློག་སྒྱུར་ས་ཚིགས་ནི་བོད་ཤར་གྱི“ནུབ་གློག་ཤར་འདྲེན”གྱི་གྲུབ་ཆ་གལ་ཆེན་ཞིག་ཡིན་པས་འཛུགས་སྐྲུན་གྱི་དོན་སྙིང་ཆེན་པོ་ལྡན།

རྣམ་གྲངས་དོན་འཁྱོལ་ལ་སྐུལ་འདེད་ཧུར་ཐག་གཏོང་ཆེད། ཏིའོ་ཝེ་ཡིས་ལས་དོན་ཚོགས་ཆུང་གི་ཁོངས་མིའི་སྣེ་ཁྲིད་དེ་ཟླ་བ་གཉིས་ཀྱི་རིང་། སྨི་4300ཡན་གྱི་རི་ཁུག་ཏུ་རྟོག་ཞིབ་བྱེད་པར་ཐེངས་8བསྐྱོད་ཅིང་། རི་སྟེང་གི་ལམ་ཡག་པོ་མེད་པའི་ཁར་ཆར་པ་ཆེན་པོ་འབབ་སྐབས་གཟབ་གཟབ་མ་བྱས་ཚེ་རླངས་འཁོར་འདམ་བག་ནང་ལུས་པ་དང་། སྐབས་རེ་ཕྱིན་ཕྱིན་ནས་འགྲོ་སའི་ལམ་མེད་པར་ཆགས་སྐབས། རླངས་འཁོར་དུ་བླུགས་པའི་འཇོར་སྦྱག་གིས་ལམ་བཟོ་དགོས་ཀྱི་ཡོད། ཉེན་ཁ་ཆེ་ཤོས་ཤིག་ནི་རླངས་འཁོར་གྱི་འཁོར་ལོ་འདྲེད་ནས་ལམ་གྱི་ཕྱིར་ཕྱེད་ཙམ་ཤོར་བ་དེ་རེད།

རྗེས་སུ་ཚང་མས་ཁོང་ལ“སྲོག་འབེན་ལ་འཛུག་མཁན”ཞེས་པའི་མིང་བཏགས་ཡོད། ཁོང་གིས“དཀའ་ངལ་འཕྲད་པ་ནི་དངོས་གནས་ཡིན། གནས་ཚུལ་ཐོན་ཚར་རྗེས་དེ་དག་དྲན་སྐབས་སེམས་ལ་ཚ་ཤུར་རྒྱག་གི་འདུག ཡིན་ནའང་ལས་འགན་དུས་བཀག་ལྟར་འགྲུབ་ཐུབ་པ་བྱུང་བས། དཀའ་ལས་རྒྱག་རིན་ཆོག་སོང”ཞེས་བརྗོད།

ཆན་ཝ་ཁྲི་180ཟིན་པའི་འགག་མདོའི་འོད་ཤུགས་རྣམ་གྲངས་དེ་སྨར་ཁམས་རྫོང་འགག་མདོ་ཤང་གི་ས་ཁོངས་སུ་གནས་པ་དང་ས་བབ་མཐོ་ཚད་སྨི་4000ལྷག་ཙམ་ཟིན་ཡོད། རྣམ་གྲངས་དེ་དང་ཐོག་གྲབས་འཛུགས་བྱེད་དུས་ས་གནས་དེའི་འབྲོག་པས་རྣམ་གྲངས་ཀྱིས་འབྲོག་ས་བཟུང་ནས་ཕྱུགས་འཚོ་བར་ཤུགས་རྐྱེན་ཐེབས་ཚུལ་བཤད་དེ་སྐབས་ཤིག་རིང་བེད་མེད་དུ་འཇོག་དགོས་འཁེལ་ཡོད།

འབྲོག་པ་ཚོའི་སེམས་ཁྲལ་སེལ་ཆེད་ཏིའོ་ཝེ་ཡིས་འབྲོག་པ་སྒྲིག་འཛུགས་ཐེངས་མང་བྱས་ནས་མཚོ་སྔོན་གྱི་མཚོ་ནུབ་འོད་ཤུགས་རྟེན་གཞིར་ལྟ་སྐོར་དང་རྒྱུས་ལོན་བྱེད་པར་ཁྲིད། མཐོ་ཚད་ལ་སྨི་1.8ཟིན་པའི་རྣམ་གྲངས་ཀྱིས་འབྲོག་པར་ཤུགས་རྐྱེན་མི་ཐེབས་པ་མ་ཟད། ཕྱུགས་རྩྭ་སྐྱེ་འཚར་ལ་ཕན་ཐོགས་ཡོད་ཚུལ་ཤེས་རྟོགས་བྱུང་ཞིང་། གནས་ཚུལ་མིག་མཐོང་ལག་ཟིན་བྱུང་རྗེས་འབྲོག་པ་ཚོའི་རྣམ་འགྱུར་ཡང་རིམ་བཞིན་ཡག་ཏུ་ཕྱིན་ཡོད། ཏིའོ་ཝེ་ཡིས་རྣམ་གྲངས་འཛུགས་སྐྲུན་ཕྱོགས་དང་འབྲོག་ས་བརྒྱུད་བཤུག་གི་དངུལ་ཕུད་ད་དུང་ས་གནས་དེ་གའི་འབྲོག་པར་ལག་རྩལ་གསོ་སྦྱོང་བྱས་ནས་ལས་མི་སྤྱོད་སྐབས་སྔོན་ལ་ས་གནས་དེ་གའི་འབྲོག་པ་སྤྱོད་རྒྱུའི་ཁ་ཆད་བྱས་ཡོད། ད་ཆ་ས་གནས་ཀྱི་འབྲོག་པ་3000ལྷག་ཙམ་གྱིས་རྣམ་གྲངས་དེའི་ནང་གླ་པ་རྒྱུག་བཞིན་ཡོད་པ་དང་། ཚང་མས“ཁྱིམ་གྱི་སྒོ་རྩ་ནས་གླ་ཆ་ལེན་རྒྱུ་འདུག་པས། བོད་སྐྱོར་ལས་དོན་ཚོགས་ཆུང་ལ་ཐུགས་རྗེ་ཆེ་ཞུ་རྒྱུ་ཡིན”ཞེས་བརྗོད།

བགྲང་བྱ་གསུམ་རིང་། ཏིའོ་ཝེའི་སྣེ་ཁྲིད་འོག་སྨར་ཁམས་རྫོང་གིས་འཆར་གཞིའི་ནང་མ་ཚུད་པའི་བོད་སྐྱོར་མ་དངུལ་སྒོར་དུང་ཕྱུར་1.3བརྩོན་ལེན་བྱས་ནས་རྣམ་གྲངས་45ལག་ལེན་བསྟར་བར་འཆར་གཞིའི་ནང་ཚུད་པ་དང་མ་ཚུད་པ་ཁྱོན་སྒོར་དུང་ཕྱུར་2.3ལྷག་ཙམ་ལེགས་སྒྲུབ་བྱས་ཡོད།

མང་ཚོགས་ཀྱི་བདེ་སྡུག་སེམས་ལ་བཞག་པ།

སྨར་ཁམས་རྫོང་སྒར་ཐོག་གྲོང་རྡལ་དང་། སྤང་མདའ་ཤང་། གཙང་ཤོད་ཤང་སོགས་སུ་བརྟག་ཞིབ་བྱེད་སྐབས། ཏིའོ་ཝེ་ཡིས་ཤང་དང་གྲོང་རྡལ་གྱི་ཉེ་འཁོར་གྱི་སློབ་གྲྭ་དང་ཡུལ་མིས་སྤྱིར་ན་གནམ་ཆུ་བསྒུགས་ནས་འཚོ་བ་སྐྱེལ་བ་དང་། རི་ཆུ་དང་གཙང་ཆུ་དྭངས་གསིང་མ་བྱས་པར་ཐད་ཀར་བཏུངས་ནས་གྲུམ་བུ་ཚིགས་ཆེན་ནད་དང་། སྟོད་སྒུར་ནད། རྡོ་སྐྲན་ནད་སོགས་ཡང་ཡང་ཐོན་བཞིན་ཡོད་པ་ཤེས་རྟོགས་བྱུང་ཡོད།

མང་ཚོགས་ཀྱི་འཐུང་ཆུའི་ཆ་རྐྱེན་ལེགས་སུ་གཏོང་ཆེད། ཏིའོ་ཝེ་ཡིས་ཕྱོགས་མང་པོ་དང་མཐུན་སྦྱོར་བྱས་ཏེ་འཆར་གཞིའི་ནང་མ་ཚུད་པའི་མ་དངུལ་སྒོར་ཁྲི་1400ལྷག་ཙམ་གྲབས་གསོག་བྱས་ནས་ཤང་དང་གྲོང་རྡལ་དེ་དག་ལ་ཆུ་གཙང་བཟོའི་སྒྲིག་ཆས་དང་། ཆུ་འདྲེན་སྒྲིག་ཆས། ཆུ་ཚ་བཟོའི་ཡོ་ཆས་བཅས་སྒྲིག་སྦྱོར་བྱས་པ་མ་ཟད། སློབ་གྲྭ་9ཡི་མི་གྲངས་3000ལྷག་ཙམ་ལ་འཐུང་ཆུ་གཙང་མ་འཐུང་རྒྱུ་ཡོང་བར་བྱས་ཡོད།

སྒར་ཐོག་གྲོང་རྡལ་སྤ་པ་གྲོང་ཚོར་འཚམས་འདྲིར་སྐྱོད་སྐབས། ཏིའོ་ཝེ་ཡིས་དེ་གའི་དུད་ཚང་10ལྷག་ཙམ་ཡོད་པའི་གྲོང་ཚོ་དེའི་ཕྱིར་སྐྱོད་ལམ་བུ་ཆུ་བོ་གཅིག་གིས་བཅད་པའི་དབང་གིས་ཕྱིར་སྐྱོད་ཐེངས་རེར་སྤྱི་ལེ་10ཙམ་སྐོར་དགོས་ཀྱི་ཡོད། ཡུལ་མི་མི་རབས་མང་པོའི་བསམ་འདུན་ནི་ཟམ་པ་གཅིག་གིས་ངོགས་གཉིས་སྦྲེལ་རྒྱུ་དེ་ཡིན་པར་བརྟེན་ཏིའོ་ཝེ་ཡིས་ཐབས་ཤེས་ཡོད་རྒུ་རྩལ་སྤྲུགས་ཀྱིས་མ་དངུལ་སྒོར་ཁྲི་200ལྷག་གྲབས་གསོབ་བྱས་ཏེ་རིང་ཚད་ལ་སྨི་26དང་ཞེང་ཚད་ལ་སྨི་6ཙམ་ཟིན་པའི་ཟམ་པ་ཞིག་བསྐྲུན་ཡོད། རླངས་འཁོར་ཤར་གཏོང་ཐུབ་པའི་ཉིན་དེར་ཡུལ་མི་ཚོས་ཏིའོ་ཝེ་ཡི་ལག་ནས་བཟུང་སྟེ་སེམས་འགུལ་ཐེབས་བཞིན་དུ“ཧྲུའུ་ཅི་ཏེའོ་ལགས་ནི་ང་ཚོའི་གྲོགས་པོ་བློས་ཐུབ་ཅིག་ཡིན”ཞེས་བརྗོད།

སྨར་ཁམས་རྫོང་གི་སྨན་བཅོས་ཆུ་ཚད་མཐོ་རུ་གཏོང་ཆེད། ཏིའོ་ཝེ་ཡིས་ཁྲུང་ཆིང་གི་བོད་སྐྱོར་མ་དངུལ་སྒོར་ཁྲི་2800བརྩོན་ལེན་བྱས་ནས་རྫོང་མི་དམངས་སྨན་ཁང་ལ་དགོས་མཁོ་ཆེ་བའི་སྨན་བཅོས་ཡོ་ཆས་བསྒར་བ་མ་ཟད། བོད་སྐྱོར་སྨན་བཅོས་ཤེས་ལྡན་པ་སྒྲིག་འཛུགས་བྱས་ནས་ལས་སྒོའི་གསོ་སྦྱོང་བྱས་ཏེ“བརྒྱུད་རོགས་ཁྲིད་གསུམ”གྱི་ལས་དོན་ཡག་པོ་བསྒྲུབས་ནས། ཁག་བགོས་ཏེ་རྫོང་གི་ས་གནས་དེ་གའི་སྨན་དོན་པ་ཁྲུང་ཆིང་གི་འབྲེལ་ཡོད་སྨན་ཁང་དུ་སློབ་སྦྱོང་དང་སྤེལ་རེས་བྱེད་པར་བཀོད་སྒྲིག་བྱས་པས་སྨར་ཁམས་རྫོང་གི་ས་གནས་དེ་གའི་སྨན་དོན་པའི་ཆེད་ལས་ཀྱི་རྩལ་ནུས་དང་སྨན་ཁང་ཧྲིལ་པོའི་སྨན་བཅོས་ཀྱི་ཆུ་ཚད་ཟམ་མི་ཆད་པར་མཐོ་རུ་འགྲོ་བར་སྐུལ་མ་ཐེབས་ཡོད།

སྨར་ཁམས་སུ་ཏིའོ་ཝེས་བསྒྲུབས་པའི་ལས་དོན་ད་དུང་མང་པོ་ཡོད། ཁོང་གིས་བོད་ཀྱི་འཕེལ་རྒྱས་ཆེད་རང་ནུས་ཅི་ཡོད་འདོན་པ་ནི་བོད་སྐྱོར་ལས་བྱེད་པ་ཞིག་ཡིན་པའི་ངས་སྒྲུབ་དགོས་ངེས་ཀྱི་འོས་འགན་ཞིག་རེད་ཅེས་བརྗོད།

( ཚེ་རིང་བསམ་གྲུབ་ཀྱིས་བསྒྱུར།)