འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ11ཚེས12ཉིན་གྱི་སྔ་དྲོར། ངེད་གྲོང་ཁྱེར་གྱིས་གྲོང་ཁྱེར་ཁོངས་གཏོགས་ཀྱི་གཞུང་ཁོངས་ཁེ་ལས་སྒྱུར་བཅོས་ལས་ཀའི་ཆེད་དོན་ཚོགས་འདུ་འཚོགས་ནས་གཞུང་ཁོངས་ཁེ་ལས་ཀྱི་སྒྱུར་བཅོས་འཕེལ་རྒྱས་དང་ཏང་གི་འཛུགས་སྐྱོང་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་གྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ་དང་། ཆབ་མདོའི་རྒྱལ་ཁབ་གཞུང་ཁོངས་ཁེ་ལས་སྒྱུར་བཅོས་སྤྱིའི་གནས་ཚུལ་སོགས་ཀྱི་ལས་དོན་སྙན་སེང་ལ་གསན་པ། གོམ་སྟབས་རྗེས་མའི་ལས་དོན་བཀོད་སྒྲིག་བཅས་བྱས་ཡོད། གྲོང་ཨུད་ཀྱི་ཧྲུའུ་ཅི་གཞོན་པ་ཧྲེ་ཀྲང་ལའོ་ཆིན་འུའུ་ཚོགས་འདུར་ཕེབས་པ་མ་ཟད་གསུང་བཤད་ཀྱང་གནང་ཡོད།གྲོང་ཨུད་ཀྱི་ཧྲུའུ་ཅི་གཞོན་པ་རྒྱུན་ལས་ཧྲེ་ཀྲང་གཞོན་པ་ལིས་གོ་ཅན་གྱིས་ཚོགས་འདུ་གཙོ་སྐྱོང་ཞུས་ཡོད།

ལའོ་ཆིན་འུའུ་ཡིས་གཞུང་ཁོངས་ཁེ་ལས་སྒྱུར་བཅོས་གཏོང་རྒྱུ་ནི་རང་རྒྱལ་གྱི་དཔལ་འབྱོར་སྒྲིག་སྲོལ་སྒྱུར་བཅོས་གཏོང་བའི་གྲུབ་ཆ་གལ་ཆེན་ཞིག་ཡིན་ལ། དཔལ་འབྱོར་སྤུས་ཚད་མཐོ་བའི་འཕེལ་རྒྱས་དང་། དམངས་འཚོ་ལེགས་གཏོང་། ཁྲོམ་རའི་དཔལ་འབྱོར་སྐྱོན་བྲལ་འཕེལ་རྒྱས་གཏོང་རྒྱུ་བཅས་དང་འབྲེལ་བ་ཡོད། འབྲེལ་ཡོད་ཚན་པ་ཁག་དང་གྲོང་ཁྱེར་ཁོངས་གཏོགས་ཀྱི་གཞུང་ཁོངས་ཁེ་ལས་ཀྱིས་ངེས་གནས་ཁ་གསལ་བཟོ་བ་དང་སྒུལ་ཤུགས་འཕེལ་བར་བྱེད་པ། ཁྲོམ་རའི་བརྟག་ཞིབ་ལ་ཤུགས་སྣོན་རྒྱག་པ། ཁྲོམ་རའི་དགོས་མཁོ་འཚོལ་བ། ཁྲོམ་རའི་ངེས་གནས་གནད་འཁེལ་འཚོལ་བ་བཅས་བྱས་ཏེ་ཚོང་རྟགས་ཀྱི་ཤུགས་རྐྱེན་དང་ཁྲོམ་རའི་འགྲན་རྩོད་ནུས་པ་ཆེ་རུ་གཏོང་བ་བཅས་བྱེད་དགོས། གོ་སྐབས་དམ་འཛིནདང་ཚན་རིག་འཆར་འགོད་བཅས་བྱས་ཏེ་ཐོན་རྫས་ཁག་ཅིག་གི་སྤུས་ཀ་ཚད་ལྡན་གཏོང་བ་དང་། ལས་གཞི་ཁག་ཅིག་ལེགས་སུ་གཏོང་བ། ཐོན་ལས་ཁག་ཅིག་ཆེ་རུ་བྱས་ནས་ཁེ་ལས་ཁྲོམ་རའི་ཤུགས་རྐྱེན་ཆེ་རུ་གཏོང་དགོས། རིགས་དབྱེ་ནས་སྐུལ་འདེད་དང་གནད་འཕིགས་ཇུས་འདོན་བཅས་བྱས་ཏེ། ཐོན་ཁུངས་རང་བཞིན་དང་། སྤྱི་ཕན་རང་བཞིན། འགྲན་རྩོད་རང་བཞིན་བཅས་རིགས་གསུམ་གྱི་ངེས་གནས་ལ་དམིགས་ནས་ཁ་གཏད་རང་བཞིན་གྱིས་སྒྱུར་བཅོས་བྱེད་དགོས། གྲོང་ཨུད་དང་གྲོང་ཁྱེར་སྲིད་གཞུང་གི་བཀོད་སྒྲིག་ལ་དམ་པོར་དམིགས་ནས་ཡུལ་བབ་དང་བསྟུན་ཏེ་སྤུས་ཚད་མཐོ་བའི་ཐོན་སྐྱེད་ནུས་ཤུགས་འཕེལ་རྒྱས་བཏང་སྟེ་སྤུས་ཚད་མཐོ་བའི་འཕེལ་རྒྱས་ཀྱི་དངོས་ཤུགས་རྒྱུན་ཆད་མེད་པར་ཆེ་རུ་གཏོང་དགོས། ལམ་སྲོལ་འཐུས་ཚང་དུ་གཏོང་བ་དང་དོ་དམ་ལ་ཤུགས་སྣོན་བརྒྱབ་སྟེ་ལམ་ལུགས་བསྒྱུར་བཅོས་གཏིང་ཟབ་ཏུ་བཏང་སྟེ་དུས་བཀག་ནང་བཀོད་གཏོང་བྱེད་པ་དང་དུས་ཐོག་ཏུ་ཉམས་མྱོང་ཕྱོགས་བསྡོམས་བྱེད་པ། སྒྱུར་བཅོས་ཁྲོད་གནས་པའི་དཀའ་ངལ་ཞིབ་འཇུག་དང་མཐུན་སྦྱོར་ངང་ཐག་གཅོད་བྱེད་དགོས། ཤེས་ལྡན་མི་སྣ་གསོ་སྐྱོང་བྱེད་པར་དོ་སྣང་བྱས་ཏེ་ལས་སྒོ་ཤེས་པ་དང་གཉེར་སྐྱོང་ཤེས་པ། དོ་དམ་ཤེས་པ། ཚོང་འི་གནས་ཚུལ་ཤེས་པ་སོགས་བྱང་ཚད་མཐོ་བའི་ཆེད་ལས་ཅན་གྱི་ཤེས་ལྡན་མི་སྣ་རིམ་བཞིན་གསོ་སྐྱོང་བྱས་ཏེ། དེང་རབས་ཁེ་ལས་འཕེལ་རྒྱས་ཀྱི་དགོས་མཁོ་དང་འཚམ་པའི་ཆེད་ལས་ཅན་གྱི་གཉེར་སྐྱོང་དོ་དམ་དཔུང་ཁག་ཅིག་འཛུགས་དགོས་པ་དང་ རིགས་དབྱེ་དཔྱད་ཞིབ་ལ་སྐུལ་འདེད་གཏོང་བ་དང་། དཔྱད་ཞིབ་བྱ་ཐབས་སྔར་བས་འཐུས་ཚང་དུ་གཏོང་བ། དཔྱད་ཞིབ་གྲུབ་འབྲས་སྤྱོད་ཤུགས་ཆེ་རུ་གཏོང་བ། ཁེ་ལས་ཀྱི་ལས་བྱེད་ལས་བཟོ་ཚོའི་ལས་སྒྲུབ་ལས་གཏོད་ཀྱི་སྤྲོ་སེམས་ཆེ་རུ་གཏོང་བ་བཅས་བྱས་ནས། ནུས་ཤུགས་ཡོད་རྒུས་གཞུང་ཁོངས་མ་རྩའི་བདེ་འཇགས་དང་ཁེ་དབང་སྲུང་སྐྱོང་བྱེད་དགོས་ཅེས་བསྟན།

ལའོ་ཆིན་འུའུ་ཡིས་འབྲེལ་ཡོད་ཚན་པ་ཁག་དང་གྲོང་ཁྱེར་ཁོངས་གཏོགས་ཀྱི་གཞུང་ཁོངས་ཁེ་ལས་ཀྱིས་མུ་མཐུད་འགག་སྒྲོལ་དཀའ་སེལ་གྱི་སྙིང་སྟོབས་དར་སྤེལ་བཏང་ནས་གཞུང་ཁོངས་ཁེ་ལས་ཟླ་སྒྲིལ་བསྐྱར་སྒྲིག་གི་གྲུབ་འབྲས་སྲ་བརྟན་དུ་གཏོང་བ་དང་། གཞུང་ཁོངས་ཁེ་ལས་ཀྱིས་གྲོང་ཁྱེར་ཡོངས་ཀྱི་དཔལ་འབྱོར་འཕེལ་རྒྱས་ཁྲོད་ནུས་པ་དེ་བས་ཆེ་བ་འདོན་པ་དང་སྤུས་ཚད་དེ་བས་མཐོ་བའི་འཕེལ་རྒྱས་མངོན་འགྱུར་ཡོང་རྒྱུར་སྐུལ་སྤེལ་བཏང་སྟེ། ཆབ་མདོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཡོང་ཆེད་གཞུང་ཁོངས་ཁེ་ལས་ཀྱི་སྟོབས་ཤུགས་སྐྱེས་སུ་འབུལ་དགོས་ཞེས་ནན་བཤད་གནང་ཡོད།