འདི་ག་ཚགས་པར་ཁང་དུ་གནས་ཚུལ་འབྱོར་གསལ། དཔལ་འབར་རྫོང་གིས་ཟླ་10ཚེས་28ཉིན་2024ལོའི་ཞིང་འབྲོག་པའི་ཐད་གཏོང་ཚོང་ཟོག་གསོ་སྦྱོང་བྱས་པ་དེས“ནང་དུ་གདན་དྲངས་པ་དང་ཕྱིར་གཏོང་བྱེད་པའི”འཕེལ་རྒྱས་ཀྱི་འདུ་ཤེས་གང་ལེགས་མངོན་ནས་ས་གནས་དེ་གའི་ཞིང་འབྲོག་པའི་དྲ་ཐོག་ཚོང་དོན་ཐད་གཏོང་ཐད་རྩལ་ནུས་མི་འདང་བ་དང་ཉམས་མྱོང་མི་འདང་བ་སོགས་ཀྱི་གནད་དོན་ཐག་གཅོད་བྱས་པ་རེད།

ད་ཐེངས་ཀྱི་སྦྱོང་བརྡར་ནང་། ཐད་གཏོང་གི་ལམ་ནས་ཚོང་ཟོག་ཚོང་གཉེར་གྱི་ཉམས་མྱོང་ཕུན་སུམ་ཚོགས་པའི་ཆེད་ལས་དགེ་རྒན་གདན་འདྲེན་ཞུས་ཏེ། ཞིང་འབྲོག་མང་ཚོགས་ལ་ཐད་གཏོང་གི་འདུ་ཤེས་དང་ཐད་གཏོང་བྱེད་ཐབས་གསར་པ་བསླབས་ཡོད། ཐད་གཏོང་བྱ་ས་འདེམས་སྟངས་དང་བེད་སྤྱོད་གཏོང་ལུགས། ཐད་གཏོང་བྱ་རྒྱུའི་ནང་དོན་བཟོ་སྟངས་སོགས་ཀྱི་ཤེས་བྱ་གོ་བདེ་ཤེས་སླའི་སྒོ་ནས་འགྲེལ་བཤད་བརྒྱབ་ཡོད་པ་རེད། གསོ་སྦྱོང་ཁྲོད་ད་དུང་ས་ཁུལ་གཞན་གྱི་གྲུབ་འབྲས་ཐོབ་པའི་ཐད་གཏོང་བརྡར་པ་གདན་དྲངས་ནས་ཉམས་མྱོང་མཉམ་སྤྱོད་བྱས་པ་རེད།

ཀྲུང་གོའི་གློག་འཕྲིན་ཐེན་ཧུའུ་ཡོན་ཚོང་ཟོག་པུའུ་ཡི་ཅིང་ལི་ཝང་ཝུན་གྱིས་“དཔལ་འབར་རྫོང་ནི་ཀྲུང་གོ་གློག་འཕྲིན་ཚོགས་པས་གནས་གཏན་འཁེལ་གྱིས་རོགས་སྐྱོར་བྱེད་པའི་བོད་སྐྱོར་རྫོང་གི་གྲས་ཤིག་ཡིན། ལོ་ལྟར་ཀྲུང་གོ་གློག་འཕྲིན་གྱི་གློག་རྡུལ་ཚོང་དོན་སྟེགས་བུ་སྟེ་ཐེན་ཧུའུ་ཡོན་ཚོང་པ་བརྒྱུད་འཛད་སྤྱོད་རོགས་སྐྱོར་བྱེད་ཀྱི་ཡོད། དཔལ་འབར་རྫོང་གིས་ད་ཐེངས་ཀྱི་དྲ་ཐོག་ཚོང་དོན་ལས་སྟེགས་ཀྱི་གསོ་སྦྱོང་དཔེར་ན། ཐད་གཏོང་ཁང་གཏོད་པ་དང་། གཉེར་སྐྱོང་། བརྙན་ལམ་པར་ལེན་སོགས་ཀྱི་སློབ་ཚན་ཁག་གཅིག་བརྒྱུད་དྲ་ཐོག་ཚོང་དོན་གྱི་ཤེས་ལྡན་མི་སྣ་གསར་པ་ཁག་གཅིག་གསོ་སྐྱོང་ཐུབ་རྒྱུའི་རེ་བ་ཡོད་ཅེས་བཤད་པ་རེད།

གསོ་སྦྱོང་ཐོག་ཐད་གཏོང་བརྒྱུད་དེས་དཔལ་འབར་རྫོང་གི་ཁྱད་ལྡན་ཞིང་ལས་ཐོན་རྫས་ཕྱི་ལ་བཙོང་རྒྱུའི་གལ་ཆེའི་རང་བཞིན་ནན་བཤད་བྱས་ཡོད། ཞིང་འབྲོག་མང་ཚོགས་ཀྱིས་ས་གནས་དེ་གའི་ཞིང་ལས་ཐོན་རྫས་ཀྱི་ཁྱད་ཆོས་དང་ལེགས་ཆ་སྔོག་འདོན་ཇི་ལྟར་བྱེད་པ་དང་ཐུན་མོང་མ་ཡིན་པའི་ཐོན་རྫས་ཁྱབ་གདལ་གཏོང་བའི་ཇུས་གཞི་བཟོས་ནས། འཛད་སྤྱོད་པས་དོ་ཁུར་ཇེ་ཆེར་ཡོང་ཐབས་ཐད་ནས་མཛུབ་སྟོན་བྱས་ཡོད། དེ་བཞིན་ཐད་གཏོང་གི་སྟེགས་བུ་ཇི་ལྟར་སྤྱད་དེ་ཚོང་ར་རྒྱ་སྐྱེད་གཏང་རྒྱུ་དང་ཡུལ་ལུང་གི་ས་མཚམས་ལས་སྒྲོལ་ཏེ་དཔལ་འབར་རྫོང་གི་ཞིང་ལས་ཐོན་རྫས་རྒྱལ་ནང་ཡང་ན་རྒྱལ་སྤྱིའི་ཁྲོམ་རར་ཁྱབ་གདལ་གཏོང་རྒྱུར་ཁྲིད་སྟོན་དང་། ཞིང་འབྲོག་མང་ཚོགས་ཀྱིས་ཡུལ་གཞན་གྱི་ཚོང་པ་དང་མཉམ་ལས་ཧུར་ཐག་བྱས་ནས་ཡུན་རིང་ཕུགས་བརྟན་གྱི་ཚོང་ལམ་གཏོད་རྒྱུར་སྐུལ་ལྕག་བྱས་ཡོད་པ་རེད།