འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ10ཚེས30ཉིན་གྱི་ཕྱི་དྲོར། གྲོང་ཨུད་ཀྱི་ཧྲུའུ་ཅི་གཞོན་པ་ཧྲི་ཀྲང་ལའོ་ཆིན་འུའུ་ཡིས་གྲོང་ཁྱེར་མི་དམངས་སྲིད་གཞུང་གི་ཏང་ཙུའི（རྒྱ་ཆེ）ཚོགས་འདུ་འཚོགས་ནས་གྲོང་ཁྱེར་ཡོངས་ཀྱི་བདེ་འཇགས་ཐོན་སྐྱེད་ལས་དོན་གྱི་སྙན་སེང་ལ་གསན་པར་མ་ཟད་བདེ་འཇགས་ཐོན་སྐྱེད་ལས་དོན་སྔར་བས་ཡག་པོ་བསྒྲུབ་རྒྱུའི་ཐད་སླར་ཡང་བཀོད་སྒྲིག་གནང་ཡོད།
གྲོང་ཨུད་ཀྱི་ཧྲུའུ་ཅི་གཞོན་པ་རྒྱུན་ལས་ཧྲི་ཀྲང་གཞོན་པ་ཝེ་ཤིན་ཀུའེ་དང་ལིས་གོ་ཅན། གྲོང་ཨུད་ཀྱི་རྒྱུན་ཨུ་རྒྱུན་ལས་ཧྲི་ཀྲང་གཞོན་པ་ཝུའུ་དབྱིན་ཧའེ། ཧྲི་ཀྲང་གཞོན་པ་ཉི་མ་ཚེ་རིང་དང་།ཝུའུ་ཅན། ཐོགས་མེད་ཤེས་རབ། ཡང་ཝུན་ཧྲེང་བཅས་ཚོགས་འདུར་ཞུགས་ཡོད།
ལའོ་ཆིན་འུའུ་ཡིས་བདེ་འཇགས་ཐོན་སྐྱེད་ནི་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་དང་འབྲེལ་བ་ཡོད་ལ།སྤྱི་ཚོགས་བརྟན་ལྷིང་སྤྱི་ཡོངས་དང་དཔལ་འབྱོར་སྤུས་དག་འཕེལ་རྒྱས་བཅས་དང་འབྲེལ་བ་ཡོད་པས། གྲོང་ཁྱེར་སྲིད་གཞུང་ཁོངས་གཏོགས་ཀྱིས་བདེ་འཇགས་ཐོན་སྐྱེད་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཆབ་སྲིད་ཀྱི་ཚུགས་གནས་སྔར་བས་མཐོ་རུ་གཏོང་བ། ལྷོད་གཡེང་དང་སྒྱིད་ལུག་གི་བསམ་བློ་ཁྱད་བསད་མཐའ་གཅིག་ཏུ་བྱེད་པ། དུས་བཞིའི་བདེ་འཇགས་དོན་རྐྱེན་འབྱུང་མང་པ་དང་འབྱུང་སླ་བ་བཅས་ལ་དམིགས་ནས་བདེ་འཇགས་ལས་འཛོལ་ཆེ་ཙམ་དང་དེའི་ཡན་གྱི་སྣང་ཚུལ་བཀག་འགོག་བྱ་རྒྱུར་དམ་འཛིན་ནན་པོ་བྱེད་དགོས་པ་དང་། འགན་འཁྲི་དོན་འཁྱོལ་དང་བྱ་ཐབས་དོན་འཁྱོལ་བྱ་རྒྱུར་དམ་འཛིན་ནན་པོ་བྱས་ཏེ། ལོ་ཧྲིལ་པོའི་བདེ་འཇགས་ཐོན་སྐྱེད་ཀྱི་རྣམ་པ་བརྟན་པོ་ཡོང་བའི་འགན་ལེན་བྱེད་དགོས་ཞེས་བསྟན།
ལའོ་ཆིན་འུའུ་ཡིས་བདེ་འཇགས་ཐོན་སྐྱེད་ཀྱི་རྩ་བཅོས་འགག་སྒྲོལ་གྱི་ལོ་གསུམ་བྱ་སྤྱོད་དམ་འཛིན་བྱ་གཞིར་བྱས་ཏེ་གཙོ་གནད་ཁྱབ་ཁོངས་དང་གཙོ་གནད་ཁུལ་ལ་དམ་པོར་དམིགས་པ་དང་བདེ་འཇགས་ཀྱི་མངོན་མེད་རྐྱེན་ངན་གྲལ་བཤེར་བཅོས་སྒྲིག་མུ་མཐུད་གཏིང་ཟབ་ཏུ་གཏོང་དགོས། ཚོང་ལས་ཕྱོགས་བསྡུས་ཐོག་ཁང་དང་ཐོག་བརྩེགས་མཐོ་བའི་ཁང་པ། སྡེ་ཁུལ་རྙིང་པ་སོགས་མི་སྣ་འདུ་འཛོམས་ཆེ་སའི་མེ་ཟོན་བདེ་འཇགས་ལ་ཞིབ་བཤེར་བྱ་རྒྱུར་ཤུགས་སྣོན་བརྒྱབ་ནས་མེ་ཟོན་བདེ་འཇགས་ཀྱི་རྐྱེན་ངན་གྲལ་བཤེར་དང་བཅོས་སྒྲིག་གཏིང་ཟབ་བྱས་ཏེ་མེ་ཟོན་ཁྱབ་ཁོངས་ཀྱི་བདེ་འཇགས་ལ་དམ་འཛིན་ཡག་པོ་བྱེད་དགོས། ཞབས་ཞུའི་འགན་སྲུང་གི་རྣམ་གྲངས་གལ་ཆེན་གྱི་སྤུས་དག་འཛུགས་སྐྲུན་ལ་དམིགས་པ་དང་། གཞུང་ལམ（ལྕགས་ལམ）དང་ལས་གྲྭ་ཆེ་གྲས་ཁག་གི་བདེ་འཇགས་ལྟ་སྐུལ་དོ་དམ་ལ་ཤུགས་སྣོན། ཨར་ལས་འཛུགས་སྐྲུན་སྡེ་ཚན་གྱིས་ཉེན་མེད་ཐོན་སྐྱེད་ཀྱི་བྱེད་པོའི་འགན་འཁྲི་དོན་འཁྱོལ་ཡོང་བར་སྐུལ་འདེད། ཨར་ལས་ཁྱབ་ཁོངས་ཀྱི་བདེ་འཇགས་ལ་དམ་འཛིན་བཅས་བྱེད་དགོས། གྲོང་ཁྱེར་དང་གྲོང་རྡལ་གྱི་སོལ་རླངས་སྒྲིག་ཆས་ཉེན་མེད་ཡོང་བར་ལྟ་སྐུལ་དོ་དམ་གཏིང་ཟབ་ཏུ་སྤེལ་བ་དང་། སོལ་རླངས་ཁྱབ་ཁོངས་ཀྱི་བདེ་འཇགས་ལ་དམ་འཛིན་བྱེད་དགོས། ཟས་རིགས་ཉེན་མེད་ལྟ་སྐུལ་དོ་དམ་དང་ཡུལ་སྐོར་རྣམ་གྲངས་ཀྱི་སྒྲིག་ཆས་ལ་ཞིབ་བཤེར་བྱེད་ཤུགས་ཆེ་རུ་གཏོང་བ་དང་ཁྱབ་ཁོངས་གཞན་དག་གི་ཉེན་མེད་ལྟ་སྐུལ་དོ་དམ་ལ་དམ་འཛིན་ལེགས་པོ་བྱེད་དགོས་ཞེས་ནན་བཤད་གནང་ཡོད།