འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ་7ཚེས་25ཉིན་གྱི་ཞོགས་པ་སྔ་པོ་ཆབ་མདོ་གྲོང་ཁྱེར་བོད་སྨན་རྩིས་ཁང་སྒོ་བསྟེན་སྨན་བཅོས་པུའི་ཐོག་སོ་གཉིས་པའི་ཚོམས་ཆེན་དུ་མི་ཚོགས་ཀྱིས་ཁེངས་ཤིང་།རུ་རིང་པོ་སྒྲིག་ནས་འཛུལ་སྒོའི་བར་དུ་བསྲིངས་ཡོད། མི་རྣམས་ཀྱིས་ལག་ཏུ་སྨན་བཅོས་འགན་བཅོལ་གཱ་དང་ཐོ་འགོད་རེའུ་མིག་བཟུང་ནས་སྨན་དོན་མི་སྣས་ཁོང་ཚོར་བརྟག་དཔྱད་བྱ་རྒྱུར་ངང་རྒྱུད་རིང་པོས་སྒུག་ནས་བསྡད་ཡོད།

ཟླ་7ཚེས་24ཉིན་གྱི་ཕྱི་དྲོ། ཐེན་ཅིན་གྲོང་ཁྱེར་བུད་མེད་མཉམ་འབྲེལ་ལྷན་ཚོགས་ཀྱིས་ཆབ་མདོ་གྲོང་ཁྱེར་བོད་སྨན་རྩིས་ཁང་དུ“འོད་ཟེར་སྦྱིན་པའི་བྱ་སྤྱོད”དང“མི་རིགས་མཐུན་སྒྲིལ་ཁྱིམ་ཚང་གཅིག་ཉེའི་ལས་རིགས་བརྒྱ་སྤེལ་རེས་བྱ་སྤྱོད”ཀྱི་བྱེད་སྒོ་སྤེལ་འགོ་ཚུགས་པའི་མཛད་སྒོ་འཚོགས་ནས་དུས་ཡུན་ཉིན་གསུམ་གྱི་རིན་མེད་སྐྱ་འགྲིབ་སླར་གསོའི་གཤགས་བཅོས་ཀྱི་སྤྱི་ཕན་རྣམ་གྲངས་འགོ་ཚུགས་པ་རེད།

ཐེན་ཅིན་གསོ་རིག་སློབ་ཆེན་མིག་ནད་ཚན་ཁག་སྨན་ཁང་ཏང་ཨུད་ཀྱི་ཧྲུའུ་ཅི་ཝེ་རུའེ་ཧྭ་དང་དེ་བཞིན་ཁོང་གིས་སྣེ་ཁྲིད་པའི་སྨན་དོན་མི་སྣ་13དང་སྒྲིག་ཆས་བཟོ་བཀོད་མཁན་ལས་གྲུབ་པའི་སྨན་བཅོས་ཚོགས་པ་ཡིན་པ་རེད། ཁོང་ཚོས་ཆབ་མདོ་བོད་སྨན་རྩིས་ཁང་གི་སྨན་པ་ཚོ་དང་ཕན་ཚུན་གཞོགས་འདེགས་བྱས་ཏེ་ངང་རྒྱུད་རིང་པོས་ནད་པའི་མིག་ནད་ཀྱི་ལོ་རྒྱུས་འདྲི་རྩད་དང་ཟིན་ཐོ་བཀོད་པ་མ་ཟད། ནད་པའི་མིག་ནད་ལ་བརྟག་དཔྱད་དང་། མིག་བཀྲུ་བ། མཐོང་ནུས་ལ་བརྟག་དཔྱད་སོགས་བརྟག་དཔྱད་ལས་དོན་སྤེལ་བ་རེད།

ཆབ་མདོ་གྲོང་ཁྱེར་བོད་སྨན་རྩིས་ཁང་གཤགས་བཅོས་ཁང་གི་ཕྱི་རོལ་ཚོམས་ཆེན་དུ་ད་དུང་སྐྱ་འགྲིབ་ནད་པ་ཁག་གཅིག་ནང་མིའི་རོགས་རམ་འོག་ཨང་རྟགས་འབོད་རྒྱུར་སྒུག་བཞིན་ཡོད། ནད་པའི་ཁྱིམ་མི་འཇམ་དབྱངས་ཀྱིས་ངའི་ཨ་ཕས་ལོ་མང་པོའི་རིང་མིག་གིས་གསལ་པོ་མཐོང་གི་མེད། ད་རེས་ཐེན་ཅིན་བོད་སྐྱོར་རུ་ཁག་ང་ཚོའི་ཕ་ཡུལ་དུ་རིན་པ་མི་དགོས་པའི་གཤགས་བཅོས་བྱེད་པར་ཡོང་བས། ཁོང་ཚོར་ཐུགས་རྗེ་ཆེ་ཞུ་རྒྱུ་ཡིན་ཞེས་བཤད།

སུའུ་ཀྲོའུ་ཝེ་ཧྲི་ཅན་སྨན་བཅོས་ཡོ་བྱད་སྒྲིག་ཆས་ཕྱིར་གཏོང་ནང་འདྲེན་ཚད་ཡོད་ཀུང་སིའི་སྤྱི་ཁྱབ་ཅིང་ལི་ཧྲེན་ཀྲའོ་ཁྲེང་གིས་ད་རེས་ཀྱི་གཤགས་བཅོས་ལ་རོགས་སྐྱོར་ཡག་པོ་བྱེད་ཐུབ་ཆེད་ང་ཚོས་མིག་ནད་ཚན་ཁག་གི་གཤགས་བཅོས་ཕྲ་ཤེལ་གཉིས་དང་སྒྲ་འདས་ནུར་འགྱུར་ཡོ་བྱད་གཉིས་ཁྱེར་ཡོད། དེ་སྔ་ཡིན་ནའང་ང་ཚོ་ལྷ་ས་དང་ཉིང་ཁྲི་སོགས་བོད་ཀྱི་ས་ཁུལ་དུ་སོང་ནས་གཅེས་སེམས་སྤྱི་ཕན་བྱེད་སྒོ་སྤེལ་ནས་བོད་ཀྱི་མི་དམངས་ཀྱི་འཚོ་བའི་ཆུ་ཚད་མཐོ་རུ་ཕྱིན་ཐུབ་པ་དང་ཁོང་ཚོའི་མིག་གི་བདེ་ཐང་སྲུང་སྐྱོབ་ལས་དོན་ལ་ལེགས་སྐྱེས་ཕྲན་ཙམ་ཕུལ་ཡོད་ཅེས་བཤད།

ཟླ་7ཚེས་26ཉིན་གྱི་དགོང་མོར། ནད་པ་རྗེས་མ་དེ་གཤགས་བཅོས་ཁང་ནས་དོན་པ་དང་ཆབས་ཅིག་2024ལོའི་ལོ་འཁོར་གྱི“འོད་ཟེར་སྦྱིན་པའི་བྱ་སྤྱོད”ཀྱི་བྱེད་སྒོ་ཕུན་སུམ་ཚོགས་པོའི་ངང་མཇུག་འགྲིལ་བ་རེད། ཐེན་ཅིན་གྲོང་ཁྱེར་བུད་མེད་མཉམ་འབྲེལ་ལྷན་ཚོགས་དང་བོད་ལྗོངས་འཕེལ་རྒྱས་རོགས་སྐྱོར་ཐེབས་རྩ་ལྷན་ཚོགས་སོགས་གཅེས་སེམས་རྩ་འཛུགས་ཀྱི་ཞལ་འདེབས་འོག ཐེན་ཅིན་དང་ཆབ་མདོ་ས་གནས་གཉིས་ཀྱི་སྨན་དོན་མི་སྣའི་སྟོབས་ཤུགས་གཅིག་སྒྲིལ་གྱི་མཉམ་ལས་འོག ད་ཐེངས་ཀྱི་བྱེད་སྒོའི་ནང་ཁྱོན་ནད་པ་300ལྷག་ཙམ་ལ་བརྟག་དཔྱད་བྱས་པ་དང་ནད་པ་168ལ་སྐྱ་འགྲིབ་སླར་གསོའི་གཤགས་བཅོས་བྱས་པ་རེད།

“ཐེན་ཅིན་གྲོང་ཁྱེར་བུད་མེད་མཉམ་འབྲེལ་ལྷན་ཚོགས་ཏང་ཙུའུ་ཡི་ཁོངས་མི། ཀྲུའུ་ཞི་གཞོན་པ་ཡུས་མའེ་ཡིས་བྱེད་སྒོ་སྤེལ་འགོ་ཚུགས་པའི་མཛད་སྒོའི་ཐོག་ཐེན་ཅིན་གྲོང་ཁྱེར་བུད་མེད་མཉམ་འབྲེལ་ལྷན་ཚོགས་ཀྱིས་ཐེན་ཅིན་གསོ་རིག་སློབ་ཆེན་མིག་ནད་ཚན་ཁག་གི་རིགས་གཅིག་མཁས་ཅན་དང་མཉམ་དུ་ཆབ་མདོ་རུ་‘འོད་སྣང་སྦྱིན་པའི་བྱ་སྤྱོད་’སྤེལ་བ་དེ་ནི་བོད་ཀྱི་མང་ཚོགས་ཀྱི་བདེ་ཐང་དང་བདེ་རྩར་དམིགས་ཏེ། མཐོང་རྒྱུ་ཡོད་པ་དང་། ཚོར་རྒྱུ་ཡོད་་པ། ཕན་ནུས་ཡོད་པ་བཅས་ཀྱི་སྒོ་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་བསྐྱེད་པ་དང་ཆ་སྒྲིག་ས་ཁུལ་གྱིས་དབུལ་སྒྲོལ་འགག་སྒྲོལ་གྱི་གྲུབ་འབྲས་རྒྱུན་མཐུད་སྲ་བརྟན་དུ་གཏོང་བའི་ཞིབ་ཕྲའི་བྱ་ཐབས་ཤིག་རེད། “འོད་སྣང་སྦྱིན་པའི་བྱ་སྤྱོད་”ཀྱི་རྗེས་མཐུད་ཕན་འབྲས་ཆེ་རུ་གཏོང་གང་ཐུབ་བྱེད་པ་དང་། རོགས་སྐྱོར་བྱ་ཐབས་ཁག་ལ་གཅིག་གྱུར་འཆར་འགོད་དང་སྐུལ་འདེད་གཏོང་བ། སྤྱི་ཚོགས་ཀྱི་ཐོན་ཁུངས་རྒྱ་ཁྱབ་ངང་སྐུལ་སློང་བྱས་ནས་ཁ་གཏད་རོགས་སྐྱོར་དང་རོགས་སྐྱོར་ལས་དོན་སྤེལ་བ། ས་གནས་གཉིས་ཀྱི་མཉམ་ལས་གཉིས་ཕན་གྱི་གཏིང་ཟབ་ཚད་དང་ཁྱབ་རྒྱ་ཆེ་རུ་གཏོང་བ་བཅས་བྱ་རྒྱུ་ཡིན་ཞེས་གསུངས་པ་རེད།