བསྟན་འཛིན་ཟླ་བས་ཞོགས་པའི་ཆུ་ཚོད་7པ་ཙམ་ལ་བསྐུར་མ་དབྱེ་འབྱེད་དང་སྐྱེལ་སྤྲོད་ཀྱི་ལས་ལ་གཞོལ་འགོ་ཚུགས།བསྟན་འཛིན་ཟླ་བ་ནི་ཀྲུང་གོ་སྦྲག་སྲིད་ཚོགས་པ་ཚད་ཡོད་ཀུང་སི་ཆབ་མདོ་ཡན་ལག་ཀུང་སིའི་ཡིག་མྱུར་སྐྱེལ་བ་ཡིན་པ་དང་། ལོ་31ལ་སླེབས་པའི་ཁོང་གིས་མྱུར་སྐྱེལ་གྱི་ལས་ཀ་གཞོལ་ནས་ལོ་7སོང་ཞིང་ ད་ལོ་ནི་ཁོང་གིས་དཔྱིད་གསར་དུས་ཆེན་རིང་ལས་གནས་བརྟན་སྲུང་བྱས་པའི་ལོ་7པ་དེ་རེད།

བསྟན་འཛིན་ཟླ་བས་མྱུར་སྐྱེལ་གྱི་འགན་གཙོ་བོ་ནི་ཆབ་མདོའི་ནུབ་ལམ་ཡུག་ཁུལ་ཡིན་པ་དང་། འདི་གར་ཁུལ་ཆུང་དང་ཐོག་ཁང་མང་བས་ཉིན་ལྟར་ཞོགས་པ་ནས་དགོང་མོའི་བར་ལས་ཀ་བྱེད་དགོས་ཀྱི་ཡོད།“དུས་ཆེན་གོང་དང་བསྡུར་ན་ཉིན་འདི་དག་ནང་མྱུར་སྐྱེལ་གྲངས་འབོར་ཅུང་ཉུང་དུ་ཕྱིན་ཡོད། འོན་ཀྱང་ཉིན་གཅིག་ནང་མི་རེས་མྱུར་སྐྱེལ་100ལྷག་ཙམ་བྱེད་དགོས་ཀྱི་ཡོད”ཅེས་བསྟན་འཛིན་ཟླ་བས་བཤད།

“སྐུ་ཁམས་བཟང་།ང་སྦྲག་སྲིད་མྱུར་སྐྱེལ་པ་ཡིན།ཁྱེད་རང་གི་བསྐུར་མ་སྡེ་ཁུལ་གྱི་སྒོ་ཁར་འབྱོར་བས་ཁྱེད་རང་ལེན་དུ་ཤོག”“སྐུ་ཁམས་བཟང་།དེ་རིང་བསྐུར་མ་ལེན་རྒྱུར་སྟབས་བདེ་ཡོད་དམ”ཞེས་པ་སོགས་རྒྱུན་གཏན་དང་མི་འདྲ་བར་དཔྱིད་གསར་དུས་ཆེན་རིང་བསྐུར་མ་ལེན་མཁན་གཉེན་ཉེ་དང་གྲོགས་པོར་འཚམས་འདྲི་བྱེད་པར་ཕྱིན་པ་དང་ཕྱིར་ཡུལ་སྐོར་ལ་ཕྱིན་པ་སོགས་རྒྱུ་རྐྱེན་སྣ་ཚོགས་ཀྱིས་རྐྱེན་པས་རྟག་ཏུ་མི་རྙེད་ཀྱི་མེད།དེ་ལྟར་ཡིན་ནའང་བསྟན་འཛིན་ཟླ་བས་ཀྱང་ངེས་པར་དུ་རེ་རེ་བཞིན་ཁ་པར་བཏང་ནས་རྩིས་ལེན་མཁན་དང་འབྲེལ་གཏུག་བྱས་ཏེ་ཁང་པ་དང་སྒོ་འགྲམ་དུ་འཇོག་པའམ་ཡང་ན་བསྐྱར་དུ་སྐྱེལ་བའི་དུས་ཚོད་དང་ས་གནས་ཁ་ཆད་འཇོག་རྒྱུའི་གྲོས་བསྡུར་བྱེད་བཞིན་ཡོད་པ་རེད།

“ལོ་གསར་གཏོང་སྐབས་ཚང་མས་འཕྲལ་དུ་མྱུར་སྐྱེལ་ལེན་འདོད་བྱེད་པ་མ་ཟད། མི་མང་པོ་ཞིག་ཕྱིར་ཐོན་ནས་ཁྱིམ་དུ་མེད་པས་སྔ་སྣུར་དུ་ཁ་པར་བརྒྱབ་ནས་འབྲེལ་གཏུག་ཡག་པོ་བྱེད་དགོས”ཞེས་ཁ་བརྡ་བྱེད་སྐབས་བསྟན་འཛིན་ཟླ་བའི་ངོ་གདོང་ནས་བྱམས་བརྩེའི་འཛུམ་མདངས་དང་གཤིས་བཟང་གིས་བབ་ཆགས་ཤིག་མངོན།

གསར་འགོད་པས་བསྟན་འཛིན་ཟླ་བར་ལོ་སར་གྱི་སྐབས་སུ་ཁྱིམ་མི་དང་ལྷན་འཛོམས་ཡག་པོ་ཞིག་བྱེད་འདོད་མིན་སྐོར་འདྲི་སྐབས།ཁོང་གིས་དགོད་འཚེར་ངང“ལོ་གསར་རིང་ནང་མི་དང་ཕྲུ་གུ་ཚོར་དང་མཉམ་དུ་མང་ཙམ་འདུག་འདོད་ཡོད། འོན་ཀྱང་ལས་ཀའི་རྒྱུ་རྐྱེན་གྱིས་རྐྱེན་པས་དུས་ཚོད་ཐུང་དུ་འགྲོ་སྲིད་མོད། འོན་ཀྱང་ངའི་ལས་ཀས་ཚང་མར་སྟབས་བདེ་བསྐྲུན་ཐུབ་ཚེ་ངས་བསམ་ན་དེ་ནི་བྱེད་རིན་ཡོད་པ་ཞིག་རེད”ཅེས་བཤད།

ཤེས་རྟོགས་བྱུང་བར་གཞིགས་ན། དུས་ཆེན་རིང་ཀྲུང་གོ་སྦྲག་སྲིད་ཚོགས་པ་ཚད་ཡོད་ཀུང་སི་ཆབ་མདོ་ཡན་ལག་ཀུང་སིའི་མྱུར་སྐྱེལ་མི་སྣ་22ཀྱིས་ལས་གནས་བརྟན་སྲུང་བྱས་ཏེ་ཟླ་2ཚེས་9ཉིན་ནས་ཟླ་2ཚེས་15ཉིན་བར་ཁོང་ཚོས་མྱུར་སྐྱེལ་25530ལྷག་ཙམ་འཛད་སྤྱོད་པའི་ལག་ཏུ་བདེ་འཇགས་ངང་བསྐྱལ་བ་རེད།

བསྟན་འཛིན་ཟླ་བ་ནི་མྱུར་སྐྱེལ་པ་གྲངས་མེད་ཀྱི་བསྡུས་རིས་ཙམ་རེད། ཁོང་ཚོས་རང་ཉིད་ཀྱི་རྔུལ་ཆུ་དང་དཀའ་སྤྱད་ལ་བརྟེན་ནས་གྲོང་མི་ཚོར་སྟབས་བདེ་ལ་ནུས་ཆེའི་ཞབས་འདེགས་ཞུས་བཞིན་ཡོད། ཁོང་ཚོས་རང་ཉིད་ཀྱི་ལས་གནས་བརྟན་སྲུང་དང་ལེགས་སྐྱེས་ལ་བརྟེན་ནས་ལས་རིགས་ཀྱི་སྙིང་སྟོབས་དང་སྤྱི་ཚོགས་ཀྱི་འགན་འཁྲི་འཁུར་སེམས་མཚོན་པར་བྱས་ཡོད།དཔྱིད་གསར་དུས་ཆེན་འདིར་ང་ཚོས་བསྟན་འཛིན་ཟླ་བ་དང་འདྲ་བར་ལས་གནས་བརྟན་སྲུང་བྱེད་མཁན་ངལ་རྩོལ་པ་ཚང་མར་གུས་འདུད་ཞུ་རྒྱུ་ཡིན། ཁོང་ཚོ་ནི་ང་ཚོའི་བདེ་སྐྱིད་འཚོ་བར་སྲུང་མཁན་ཡིན་ལ་ང་ཚོའི་མཛེས་སྡུག་ལྡན་པའི་འབྱུང་འགྱུར་གྱི་གསར་གཏོད་པའང་ཡིན། ཁོང་ཚོའི་ལས་དོན་བདེ་བླག་དང་གཟུགས་གཞི་བདེ་ཐང་། ཁྱིམ་ཚང་བདེ་སྐྱིད་བཅས་ཡོང་བའི་སྨོན་འདུན་ཞུ་རྒྱུ་ཡིན།