འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ7པའི་ཚེས13ཉིན་“བློ་སེམས་གཅིག་ཏུ་འགྲིལ་ནས་ཀྲུང་གོའི་སེམས་པ་མཉམ་དུ་བསྐྲུན”པའི་2023ལོའི་བོད་ལྗོངས་ཆབ་མདོར་བསྐྱོད་པའི་སྤྱི་ཕན་བྱེད་སྒོའི་ཐོག་བོད་རང་སྐྱོང་ལྗོངས་ཆབ་མདོ་གྲོང་ཁྱེར་སྲིད་གཞུང་གི་གྲོང་སྤྱི་གཞོན་པ་སྒྲོལ་དཀར་གྱིས་བོད་ལྗོངས་ཆབ་མདོར་བསྐྱོད་པའི་སྤྱི་ཕན་བྱེད་སྒོ་ཡིས་ཆབ་མདོ་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་རོགས་སྤེལ་བྱ་རྒྱུ་ཡིན་པའི་བསམ་པ་བསྟན་ཡོད།

འབྲེལ་ཡོད་མི་སྣས་ངོ་སྤྲོད་བྱས་པར་གཞིགས་ན། ད་ཐེངས་ཀྱི་བོད་ལྗོངས་ཆབ་མདོར་སྐྱོད་པའི་བྱ་སྤྱོད་ཀྱིས་ཆབ་མདོ་གྲོང་ཁྱེར་གྱི་རྫོང་ཆུས་11གི་ཤང་གྲོང140ལ་བརྗོད་དོན་གཙོ་བོའི་སྤྱི་ཕན་བྱེད་སྒོ་སྤེལ་བ་དང་། མི52661ལ་སྨན་བཅོས་ལེགས་སྒྲུབ་བྱས་ཡོད་པ་དེ་ཆབ་མདོའི་སྤྱིའི་མི་འབོར་གྱི་བརྒྱ་ཆའི་བདུན་ཟིན་ཡོད།

ད་ཐེངས་ཀྱི་བྱེད་སྒོའི་སྒྲིག་འཛུགས་ཨུ་ལྷན་གྱིས་སྔོན་ཚུད་ནས་ས་གནས་དེ་གའི་སྨན་བཅོས་དགོས་མཁོར་དམིགས་ནས་བརྟག་ཞིབ་བྱས་པ་གཞིར་བཟུང་། སྨན་དོན་དང་བླངས་པ་ཚོས་སྙིང་ཁམས་ཁྲག་རྩ་དང་། ཀླད་པའི་ཁྲག་རྩ། ཀྲུང་ལུགས་གསོ་རིག མཁོ་ཆོད་ཚན་ཁག མོ་ནད་ཚན་ཁག རུས་ནད་ཚན་ཁག དབུགས་རྔུབ་ལེན་དང་ཚབས་ཆེའི་ནད། དབང་པོ་བཅོས་བཟོའི་ཕྱི་བཅོས་ཚན་ཁག་དང་བརྙན་པར་སོགས་ཆེད་ལས་ཁྱབ་ཁོངས་ལ་གཞིགས་ནས་ས་གནས་དེ་གའི་སྨན་བཅོས་དགོས་མཁོ་དངོས་དང་ཟུང་འབྲེལ་གྱིས་སྨན་བཅོས་ཐོན་ཁུངས་བསྐྱར་དུ་བསྡུ་སྒྲིལ་བྱེད་པ་མ་ཟད། མི་སྣ་ཁག་བགོས་ནས་ས་གནས་དེ་གའི་མི་རིགས་ཁག་གི་མི་སེར་དང་། གཞི་རིམ་ལས་བྱེད་པ། ཆོས་ལུགས་ལས་རིགས་ཀྱི་མི་སྣ། བཅའ་སྡོད་དཔོན་དམག་སོགས་ལ་སྙིང་ཁམས་ཁྲག་རྩ་དང་། ཀླད་པའི་ཁྲག་རྩ། འདུས་འདྲིལ་གློ་ནད་སོགས་ཀྱི་གཅོང་ནད་སྨན་བཅོས་དང་། ལྷན་སྐྱེས་སྙིང་ནད་དང་། མཆུ་ཤོ། མོ་ནད་ཚན་ཁག་གི་HPVགྲལ་བཤེར། མཆིན་པའི་ཐུམ་འབུའི་ནད། རུས་ཚིགས་ཀྱི་ནད་བཅས་སྨན་བཅོས་བྱ་རྒྱུ་དང་གཟུགས་པོ་བརྟག་དཔྱད་སོགས་དམིགས་སའི་རང་བཞིན་ལྡན་པའི་བདེ་ཐང་རོགས་སྐྱོར་ལས་དོན་སྤེལ་རྒྱུ་རེད། དེ་དང་ཆབས་ཅིག་ད་དུང་གཞི་རིམ་གྱི་སྨན་དོན་མི་སྣ་དང་མང་ཚོགས་ལ་ཕྱོགས་ནས་བདེ་ཐང་སློབ་གླིང་དང་བདེ་ཐང་སློབ་ཁང་སོགས་ཆེད་དོན་གསོ་སྦྱོང་བྱ་རྒྱུ་རེད།