ཡུམ་མྱང་ཚ་ཡི་ལྷུམས་ནས་འཕོས་པའི་གཏམ།།

ཡབ་ཤེས་རབ་ཀྱི་ཐོས་ན་དགའ་བའི་བུ།།

ཡུལ་སྐྱ་རྔ་རུ་འཁྲུངས་བའི་ཐོས་པ་དགའ།།

དམན་སོ་སྐྱེས་བཞིན་འཁྲུངས་ཁྱེད་དེ་རིང་དྲན།།

གཉེན་ཨ་ནེ་གཙོས་དགྲ་བོའི་དྭངས་མར་གྱུར།།

ནང་མ་སྨད་ཀྱི་རེ་བའི་གཞི་མར་གྱུར།།

མཐུ་གཏད་སེར་ལ་སྦྱངས་བ་ཐོགས་མེད་མཛད།།

ལན་བུ་ལོན་ཅིག་གནངས་ཁྱེད་དེ་རིང་དྲན།།

མ་མྱང་ཚ་ཡིས་ཐ་མའི་རེ་བ་བཞགས།།

སྲིང་པེ་ཏ་ཡི་མིག་ཆུས་བསྐྱེད་མ་མཛད།།

ཡུལ་གུང་ཐང་གི་ལ་མོ་བརྒལ་ནས་སོང་།།

སྨན་མཛེས་སེ་ཡང་བསྐྱུར་ཁྱེད་དེ་རིང་དྲན།།

ཀློག་ཐོས་བསམ་ལ་འཇུག་པའི་སློབ་དཔོན་ནས།།

མཐུ་གཏད་སེར་ལ་མཁས་པའི་གཡུང་སྟོན་བརྒྱུད།།

ཕ་མར་བ་ཡི་ཞབས་ཟུང་ཟིན་གྱི་བར།།

མགོན་དབྱེར་མེད་དུ་བརྟེན་ཁྱེད་དེ་རིང་དྲན།།

ཐུགས་བཙན་པོ་ཡི་སྒྲ་སྒྱུར་མར་བ་དང་།།

རྒྱུད་འཇམ་པོ་ཡི་བདག་མེད་ཡུམ་གྱི་དྲིན།།

མཁར་དགུ་ཐོག་ཞིག་བརྩིགས་པའི་དཀའ་སྤྱད་མཛད།།

ལུས་སྒྲིབ་པ་ཀུན་བྱིངས་ཁྱེད་དེ་རིང་དྲན།།

རྗེ་ནོ་རོ་བས་གུས་པའི་ཕྱག་ཀྱང་འཚལ།།

ལྷ་བླ་མ་ཡིས་རྨི་ལམ་ལུང་ཡང་བསྟན།།།

ཕ་མར་བ་ཁོང་སྣོད་ལྡན་སློབ་མར་མཁྱེན།།

དབང་མན་ངག་ཡོངས་ཐོབ་ཁྱེད་དེ་རིང་དྲན།།

སྐྱེས་ཤེས་རབ་གྱི་རལ་གྲི་རྣོ་བའི་ཁར།།

སྦྱངས་བརྩོན་འགྲུས་ཀྱི་ཡོན་ཏན་ཁུར་དུ་དུལ།།

སྒོམ་ཉམས་རྟོགས་ཀྱི་མྱུ་གུ་མྱུར་ཏུ་འཁྲུངས།།

མགོན་ཡི་དམ་གྱིས་བསྐྱངས་ཁྱེད་དེ་རིང་དྲན།།

མནལ་རྨི་ལམ་དུ་རང་ཡུལ་གུང་ཐང་འགྲིམས།།

དྲིན་ཨ་མ་དང་བྲལ་བའི་གདུང་ཡུས་བྱུང་།།

ཕ་བླ་མ་ལ་མཐའ་མའི་གྱེས་ཕྱག་ཕུལ།།

རྗེས་གདམས་པ་བཞིན་བྱོན་ཁྱེད་དེ་རིང་དྲན།།

ཁྱིམ་ཀ་བཞི་དང་གདུང་བརྒྱད་འགྱེད་པ་མཐོང་།།

ཆོས་དཀོན་བརྩེགས་ཀྱང་ཐིག་པའི་བརྡུང་བར་མཇལ།།

ཞིང་འོར་མ་ལ་འཇག་མའི་བཀང་བ་གཟིགས།།

ཚུལ་མི་རྟག་ལ་མཇལ་ཁྱེད་དེ་རིང་དྲན།།

གནས་མཆོག་གྱུར་ཏེ་བྲག་དཀར་རྟ་སོ་ནས།།

ཆོས་ཟབ་མོ་དེ་དབུ་མའི་ལྟ་བ་རྟོགས།།

ཐུགས་ཡེངས་མེད་དུ་རི་ལ་བསྒོམས་མགོ་བརྩམས།།

མགུར་སྣ་ཚོགས་ཀྱི་གདངས་ཁྱེད་དེ་རིང་དྲན།།

དྲིན་བླ་མ་དང་ཡི་དམ་དབྱེར་མེད་སྒོམ།།

གྲུབ་ཟུང་འཇུག་གི་གོ་འཕང་ཚེ་གཅིག་ཐོབ།།

བསྟན་འགྲོ་བ་ལ་ཕན་པའི་བྱ་བ་མཛད།།

རྗེ་བཞད་པ་རྡོ་རྗེ་ཁྱེད་དེ་རིང་དྲན།།