འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ་3ཚེས་30ཉིན་གྱི་སྔ་དྲོ། ཆབ་མདོ་གྲོང་ཁྱེར་གྱི་མངལ་སྐེའི་སྐྲན་ནད་དང་ནུ་མའི་འབྲས་སྐྲན་དབྱེ་བཤེར་ལྟེ་གནས་དེ་ཆབ་མདོ་གྲོང་ཁྱེར་མ་བུ་འཕྲོད་སྦྱོར་བདེ་སྲུང་ཁང་དུ་སྒོ་བྱང་བཀལ་ནས་བཙུགས་པ་དང་ཁོངས་གཏོགས་ཁུལ་གྱི་བུད་མེད་ཚོས་སྒོ་འགྲམ་དུ་སྟབས་བདེ་ལ་མྱུར་བའི་ངང་སྤུས་ལེགས་ཀྱི་ཞབས་ཞུ་རིན་མེད་སྒོ་ནས་ལོངས་སྤྱོད་བྱེད་ཆོག་གི་ཡོད་པ་རེད།

སྐྲན་ནད་གླེང་བ་དང་ངོ་མདོག་འགྱུར་བ་ཞེས་པ་ལྟར། ལྷག་པར་དུ་བུད་མེད་ཀྱི་ངོས་ནས་བརྗོད་ན་མངའ་སྐེའི་སྐྲན་ནད་དང་ནུ་མའི་འབྲས་སྐྲན་དེ“བདེ་ཐང་གི་ལག་དམར་ཨང་དང་པོར”གྱུར་ནས་བུད་མེད་ཀྱི་སྐྲན་ནག་གི་མིང་གྲལ་ཁྲོད་ཨང་དང་པོ་དང་གཉིས་པར་སླེབས་ཡོད་པ་མ་ཟད། ཉེ་བའི་ལོ་ཤས་རིང་རང་རྒྱལ་གྱི་བུད་མེད་ཀྱི་འབྲས་སྐྲན་ཐོན་ཚད་ལོ་རེ་བཞིན་མང་དུ་འགྲོ་བ་དང་ནད་ཐོན་པའི་ལོ་ཚད་ཀྱང་རིམ་བཞིན་ལོ་ན་ཆུང་དུ་འགྱུར་བཞིན་ཡོད།

“ནད་ཐོག་ལག་ལེན་ཐོག་ནས་སྔ་དུས་ཤེས་རྟོགས་བྱུང་བའི་ནུ་མའི་འབྲས་སྐྲན་དང་མངལ་སྐེའི་སྐྲན་ནད་90%ཡན་ཚང་མ་དྲག་སྐྱེད་ཐུབ་ཀྱི་ཡོད། དེར་བརྟེན་སྐྲན་ནད་རིགས་གཉིས་ལ་དུས་ཐོག་དུ་བརྟག་དཔྱད་བྱ་རྒྱུར་དོན་སྙིང་ཧ་ཅང་ཆེན་པོ་ལྡན་ཡོད། གལ་ཏེ་སྔ་ཙམ་ཤེས་རྟོགས་དང་། སྔ་ཙམ་བརྟག་དཔྱད། སྔ་ཙམ་སྨན་བཅོས་བྱས་ཚེ་ནད་ཕོག་པའི་བུད་མེད་འཚོ་ཕྱོད་ཚད་མངོན་གསལ་དོད་པོས་རིང་དུ་འགྲོ་ཐུབ”ཀྱི་ཡོད། ཆབ་མདོ་གྲོང་ཁྱེར་མ་བུ་འཕྲོད་སྦྱོར་གྱི་ཡོན་ཀྲང་ཞུས་ཡིང་གིས“བུད་མེད་གཅིག་སྐྱོབ་བཅོས་བྱེད་ཐུབ་ན། ཁྱིམ་ཚང་གཅིག་སྐྱོབ་པ་དང་ཁྱད་མེད། དེར་བརྟེན་འབྲས་སྐྲན་གཉིས་དབྱེ་བཤེར་བྱ་རྒྱུ་ནི་བུད་མེད་ཀྱི་བདེ་ཐང་འགན་ལེན་གྱི་སྲུང་སྐྱོབ་བྱ་ཡུལ་གལ་ཆེན་ཤོས་རེད”ཅེས་བཤད།

“འབྲས་སྐྲན་གཉིས”དབྱེ་བཤེར་ལྟེ་གནས་སྒོ་བྱང་བཀལ་ནས་བཙུགས་པ་དེའི་ཐོག་ནས་ཆབ་མདོ་གྲོང་ཁྱེར་གྱི“འབྲས་སྐྲན་གཉིས”གྲལ་བཤེར་ལས་དོན་དེ་རྣམ་གྲངས་ཅན་གྱི་འཁོར་སྐྱོད་ནས་དངོས་ཚན་ཅན་དང་རྒྱུན་རྣམ་ཅན་གྱི་འཁོར་སྐྱོད་ཕྱོགས་སུ་བསྒྱུར་ཏེ་ཆབ་མདོ་གྲོང་ཁྱེར་ལོ་ན་རན་པའི་བུད་མེད་མངལ་སྐེ་སྐྲན་ནད་གང་མགྱོགས་དབྱེ་བཤེར་ཐུབ་པར་རོགས་རམ་བྱ་ཆེད་སྔ་ཙམ་ཞིབ་བཤེར་དང་། སྔ་ཙམ་ཤེས་རྟོགས། སྔ་ཙམ་སྨན་བཅོས་བཅས་བྱེད་དགོས།